ଲସ୍ ଏଞ୍ଜେଲସ୍,୨୨।୮: ହଲିଉଡ୍ ଅଭିନେତ୍ରୀ ଆଞ୍ଜେଲିନା ଜୋଲି ସୋସିଆଲ ମିଡିଆ ପ୍ଲାଟଫର୍ମ ଇନ୍ଷ୍ଟାଗ୍ରାମରେ ଯୋଗଦେଇଛନ୍ତି। ନିଜର ପ୍ରଥମ ପୋଷ୍ଟରେ ସେ କହିଛନ୍ତି, ମୌଳିକ ମାନବାଧିକାର ପାଇଁ ଲଢ଼େଇ କରୁଥିବା ଲୋକଙ୍କ ସ୍ବର ଉଠାଇବା ଲାଗି ଏହାକୁ ସେ ବ୍ୟବହାର କରିବେ, ଯାହାଙ୍କ ମଧ୍ୟରେ ଆଫଗାନିସ୍ତାନରେ ତାଲିବାନ ବର୍ବରତାକୁ ନେଇ ଦେଶ ଛାଡ଼ୁଥିବା ନାଗରିକ ସାମିଲ ଅଛନ୍ତି। ପାଶ୍ଚାତ୍ୟର ୪୬ ବର୍ଷୀୟା ଓସ୍କାର ବିଜେତା ଏହି ଷ୍ଟାର ଉକ୍ତ ପୋଷ୍ଟରେ ଏକ ପତ୍ର ଶେୟାର କରିଛନ୍ତି। ଆଫଗାନିସ୍ତାନର ଜଣେ ଅଚିହ୍ନା ସ୍ବଳ୍ପବୟସ୍କା ଝିଅ ତାଙ୍କୁ ଏହି ଚିଠି ପଠାଇଥିଲେ। ସମ୍ପ୍ରତି ଆଫଗାନିସ୍ତାନରେ ତାଲିବାନ ଆତଙ୍କରେ ଜର୍ଜରିତ ଝିଅ ଜଣକ ଏଥିରେ ତାଙ୍କୁ ସହାୟତା ମାଗିଛନ୍ତି। ସୋସିଆଲ ମିଡିଆ ଉପରେ ତାଲିବାନ କଟକଣା ଜାରି କରିଥିବାରୁ ଲୋକେ ନିଜ ଦୁଃଖ ଦୁର୍ଦ୍ଦଶା ସମ୍ପର୍କରେ କୌଣସି ପ୍ଲାଟ୍ଫର୍ମରେ ପୋଷ୍ଟ କରି ବିଶ୍ୱର ଦୃଷ୍ଟି ଆକର୍ଷଣ କରିପାରୁ ନାହାନ୍ତି। ସେମାନେ ନିଜ ଅଭିବ୍ୟକ୍ତିର ପରିପ୍ରକାଶ କରିବା ପାଇଁ ମୁକ୍ତ ନୁହନ୍ତି। ତେଣୁ ଜୋଲି ଇନ୍ଷ୍ଟାଗ୍ରାମକୁ ଆସି ପୀଡ଼ିତଙ୍କ କାହାଣୀ ବୟାନ କରିବା ପାଇଁ ନିଷ୍ପତ୍ତି ନେଇଥିବା ଉଲ୍ଲେଖ କରିଛନ୍ତି। ୨୦୦୧ ସେପ୍ଟେମ୍ବର ୧୧ ନ୍ୟୁୟର୍କ ଆତଙ୍କବାଦୀ ଆକ୍ରମଣର ଦୁଇ ସପ୍ତାହ ପୂର୍ବରୁ ଜୋଲି ଆଫଗାନିସ୍ତାନ ସୀମାରେ ଥିବାବେଳର ସ୍ମୃତିକୁ ମନେପକାଇଛନ୍ତି। ସେତେବେଳେ ତାଲିବାନ ଭୟରେ ଦେଶ ଛାଡ଼ିଥିବା ଜଣେ ଆଫଗାନ ଶରଣାର୍ଥୀଙ୍କ ସହ ତାଙ୍କର ସାକ୍ଷାତ ହୋଇଥିଲା। ଆଜି ମଧ୍ୟ ୨୦ ବର୍ଷ ତଳର ସେହି ଆତଙ୍କ ଲୋକଙ୍କ ମନରେ ଲାଗିରହିଥିବା ସେ କହିଛନ୍ତି। ଏହି ଅବସରରେ ଜୋଲି ଆଫଗାନ ଶରଣାର୍ଥୀଙ୍କ ପ୍ରତି କରାଯାଉଥିବା ବ୍ୟବହାରକୁ ନେଇ ବିଶ୍ୱନେତାଙ୍କୁ ସମାଲୋଚନା କରିଛନ୍ତି। କହିଛନ୍ତି, ସ୍କୁଲଗୁଡ଼ିକୁ ତାଲିବାନ କବ୍ଜା କରିବା ପରେ ସେଇ ଝିଅ ପାଠପଢ଼ାରୁ ବଞ୍ଚତ୍ତ ହୋଇଛନ୍ତି। ପୂର୍ବରୁ ନିଜ ଅଧିକାର ସୁରକ୍ଷା ପାଇଁ ଆଫଗାନମାନେ ମୁକ୍ତ ଥିଲେ। କିନ୍ତୁ ତାଲିବାନ ବର୍ବରତାରେ ଆତଙ୍କିତ ଦେଶବାସୀଙ୍କ ସ୍ବପ୍ନ ଏବେ ଧୂଳିସାତ୍ ହୋଇଯାଇଛି। ଜୋଲିଙ୍କ ଏହି ପ୍ରଥମ ପୋଷ୍ଟକୁ ୧.୩ ନିୟୁତ ଲାଇକ୍ ମିଳିଥିବାବେଳେ ଏହି ସୋସିଆଲ ମିଡିଆ ପ୍ଲାଟ୍ଫର୍ମରେ ତାଙ୍କୁ ୪.୨ ନିୟୁତ ୟୁଜର୍ସ ଫଲୋ କରୁଛନ୍ତି।
