ପୁରୁଷୋତ୍ତମପୁର,୨୫।୧୦ (ସବିତା ମିଶ୍ର) ସରକାର ଓ ପ୍ରଶାସନ ମହିଳା,ଶିଶୁ ଓ ବରିଷ୍ଠ ନାଗରିକଙ୍କ ସୁରକ୍ଷାର କଥା କହିବା ସହ ପୂରୀ ଜଗନ୍ନାଥଙ୍କ ନିକଟକୁ ଆସୁଥିବା ହବିଷ୍ୟାଳୀଙ୍କ ଲାଗି ସୁବିଧା ସୁଯୋଗ ଯୋଗାଇ ଦେଉଥିବାର କହୁଥିବା ବେଳେ ଗଞ୍ଜାମ ଜିଲା ପୁରୁଷୋତ୍ତମପୁର ରଥସାହି ଜଗନ୍ନାଥ ମନ୍ଦିରରେ ମହିଳା, ଶିଶୁ ଓ ବରିଷ୍ଠ ନାଗରିକ ଅସୁରକ୍ଷିତ ହୋଇପଡିଛନ୍ତି।
ଅପରପକ୍ଷରେ ପବିତ୍ର କାର୍ତ୍ତିକ ମାସ ଅବସରରେ ସନ୍ଧ୍ୟା ସମୟ ଓ ବଡିଭୋରରୁ ଦର୍ଶନ ଲାଗି ଆସୁଥିବା ହବିଷ୍ୟାଳୀ ଓ ମହିଳାମାନେ ସମ୍ପୁର୍ଣ୍ଣ ଅସୁରକ୍ଷିତ ହୋଇପଡିଥିଲେ ମଧ୍ୟ ଏଥିପ୍ରତି କୌଣସି ପ୍ରଶାସନିକ ଅଧିକାରୀଙ୍କ ନଜର ପଡୁ ନ ଥିବା ଚିନ୍ତାର ବିଷୟ ପାଲଟିଛି। ମନ୍ଦିର ପରିଷରରେ ଏନଏସି ପ୍ରଶାସନ ପକ୍ଷରୁ ଦୁଇଗୋଟି ସ୍ଥାନରେ ଲଗାଯାଇଥିବା ମିନି ହାଇମାକ୍ସ ଲାଇଟ ମାନ ଦୀର୍ଘ ଦିନ ହେଲା ଅଚଳ ହୋଇପଡିଛି। ଫଳରେ ସମ୍ପୂର୍ଣ୍ଣ ଅନ୍ଧକାର ପରିବେଶ ହୋଇ ରହିଛି। ଏହି ମନ୍ଦିର ପରିସରରେ ବିଭିନ୍ନ ବିଷଧର ସାପମାନ ବୁଲୁଛନ୍ତି। ଅନ୍ଧାର ପରିବେଶରେ ଅସାମାଜିକ କାର୍ଯ୍ୟକଳାପ ଘଟିବା ଆଶଙ୍କାକୁ ବଢିଛି। ମହିଳାମାନେ ଭୟଭୀତ ହୋଇ ନିଜକୁ ଅସୁରକ୍ଷିତ ମଣୁଛନ୍ତି। କେବଳ ଭଗବାନଙ୍କ ଭରସାରେ ପୂଣ୍ୟ ଅର୍ଜିବା ଆଶାରେ ଜଗନ୍ନାଥଙ୍କ ଦର୍ଶନ ଲାଗି ଆସୁଛନ୍ତି।
ଅପରପକ୍ଷରେ ଏହି ମନ୍ଦିର ପରିସରର ପଛ ପାଶର୍ବରେ କୋମଳମତି ଶିଶୁ ଓ ବରିଷ୍ଠ ନାଗରିକମାନଙ୍କ ଆମୋଦପ୍ରମୋଦ ଓ ମନୋରଞ୍ଜନ ଲାଗି ମୁକ୍ତ ବ୍ୟାୟାମ ସ୍ଥଳ ଓ ପାର୍କ ଏନସି ପକ୍ଷରୁ ନିର୍ମାଣ କରାଯାଇଛି। ହେଲେ ଏହି ସ୍ଥାନଟି ମଧ୍ୟ ଦୀର୍ଘ ଦିନ ହେଲା ଅନ୍ଧକାର ମଧ୍ୟରେ ଅଛି। ଅନ୍ଧକାର ମଧ୍ୟରେ ବିପଦଜନକ ଭାବରେ କୁନିକୁନି ଶିଶୁମାନେ ଖେଳୁଥିବା ସାଙ୍ଗକୁ ବରିଷ୍ଠ ନାଗରିକମାନେ ବ୍ୟାୟାମ କରୁଛନ୍ତି। ଏହି ଅନ୍ଧାର କାରଣରୁ କେତେବେଳେ କାହାର କିଛି ଅଘଟଣ ଘଟିବ କହିବା କଷ୍ଟକର ହୋଇପଡିଛି। ଏହାକୁ ନେଇ ଜନସାଧାରଣ ଓ ମନ୍ଦିର ପ୍ରଶାସନ ପକ୍ଷରୁ ଏନଏସି ପ୍ରଶାସନଠାରେ ବାରମ୍ବାର ଅଭିଯୋଗ ସତ୍ତ୍ୱେ କେହି ଗୁରୁତ୍ୱ ଦେଇନାହାନ୍ତି। ଅଭିଯୋଗ କଲେ କେବଳ ଲାଇଟ ଲଗାଇବାର ଦାୟିତ୍ୱ ନେଇଥିବା ସଂସ୍ଥାକୁ କୁହାଯାଇଛି, ଲାଇଟ ପଠାଇବାକୁ ମେଲ କରାଯାଇଥିଲେ ମଧ୍ୟ ଏନଏସି କର୍ତ୍ତୁପକ୍ଷଙ୍କଠାରୁ କୌଣସି ଉତ୍ତର ମିଳୁଥିବାର ଜନସାଧାରଣ ଅଭିଯୋଗ କରିଛନ୍ତି। ଏହାକୁ ନେଇ ମହିଳା ଓ ବରିଷ୍ଠ ନାଗରିକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ଏପରିକି କୌଣସି ମହିଳା,ଶିଶୁଙ୍କ କୌଣସି ଅଘଟଣ ଘଟିଲେ ଏନଏସି ପ୍ରଶାସନ ହିଁ ଦାୟୀ ରହିବେ ବୋଲି ଲୋକେ ଚେତାବନୀ ଦେଇଛନ୍ତି। ଏଣୁ ମହିଳା ଓ ଶିଶୁଙ୍କ ସୁରକ୍ଷା ଦୃଷ୍ଟିକୁ ଗୁରୁତ୍ୱଦେଇ ରାଜ୍ୟ ସରକାରଙ୍କ ସଂସ୍କୁତି ବିଭାଗୀୟ ମନ୍ତ୍ରୀ, ପ୍ରଶାସନ, ନଗର ଉନ୍ନୟନ ବିଭାଗୀୟ ଅଧିକାରୀ, ଗଞ୍ଜାମ ଜିଲାପାଳ ଓ ନୂତନ ଭାବରେ ଦାୟିତ୍ୱ ନେଇଥିବା ଏନଏସି ନିର୍ବହୀ ଅଧିକାରୀ ଏଥିପ୍ରତି ତୁରନ୍ତ ପଦକ୍ଷେପ ନେଇ ଅଚଳ ହୋଇପଡିଥିବା ଲାଇଟକୁ ଲଗାଇବାର ବ୍ୟବସ୍ଥା କରିବା ସହ ମନ୍ଦିର ପରିଷରକୁ ଆଲୋକୀକରଣ କରିବା ଲାଗି ସହରବାସୀ ଦାବି କରିଛନ୍ତି।
Dharitri – Odisha’s No.1 Odia Daily
