ଲୋଇସିଂହା,୩୧।୩(ସୁଶାନ୍ତ ବାରିକ):ବଲାଙ୍ଗୀର ଜିଲା ଲୋଇସିଂହା ବ୍ଲକ ସଭାଗୃହରେ ସୋମବାର ବ୍ଲକସ୍ତରୀୟ ଜନ ଅଭିଯୋଗ ଶୁଣାଣି ଶିବିରରେ ବଲାଙ୍ଗୀର ଏଡିଏମ୍ ପବିତ୍ର ବେହେରା ଓ ଜିଲା ଆଦିବାସୀ ସଂଘ ନେତା ସତ୍ୟନାରାୟଣ ଭୋଇ ମୁହାଁମୁହିଁ ହୋଇଥିଲେ। ଲୋଇସିଂହା ପଞ୍ଚାୟତ ଅନ୍ତର୍ଗତ ସୁଜିଆ ଗ୍ରାମର କେତେଜଣ ଅସହାୟ ହିତାଧିକାରୀଙ୍କୁ ଉପଯୁକ୍ତ ନ୍ୟାୟ ପାଇଁ ବ୍ଲକରୁ ଜିଲାସ୍ତରୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରାଯାଇଛି। ହେଲେ ବହୁ ଅଭିଯୋଗ ସତ୍ତ୍ୱେ ଅସହାୟ ହିତାଧିକାରୀଙ୍କୁ ଉପଯୁକ୍ତ ନ୍ୟାୟ ପ୍ରଦାନ କରିବାରେ ଜିଲା ପ୍ରଶାସନ ବିଫଳ ହୋଇଛି। ଏହାକୁ ନେଇ ଶିବିରରେ ଅଧ୍ୟକ୍ଷତା କରୁଥିବା ଏଡିଏମ୍ ବେହେରା ଓ ଆଦିବାସୀ ନେତା ଭୋଇ କଥା କଟାକଟି ହେବା ଚର୍ଚ୍ଚାର ବିଷୟ ହୋଇଛି। ଶିବିର ସମ୍ପର୍କରେ ଜାଣି ଆଦିବାସୀ ନେତା ଭୋଇ ସୁଜିଆ ଗ୍ରାମର କେତେଜଣ ଅସହାୟ ବ୍ୟକ୍ତି ଓ ଦିବ୍ୟାଙ୍ଗ ହିତାଧିକାରୀଙ୍କୁ ଧରି ଶିବିରକୁ ଆସିଥିଲେ। ଦିବ୍ୟାଙ୍ଗ ମଥୁରା ଧରୁଆ (୪୬)ଙ୍କ ୨ଗୋଡ ଅଚଳ ଥିବାରୁ ଘୋଷାରି ଘୋଷାରି ହୋଇ ଯିବାଆସିବା କରିଥାନ୍ତି। ତାଙ୍କୁ ବ୍ଲକ ପ୍ରଶାସନ ପକ୍ଷରୁ ଟ୍ରାଇସାଇକେଲ ମିଳିନାହିଁ। ନିକଟରେ ସ୍ବାସ୍ଥ୍ୟ ବିଭାଗ ପକ୍ଷରୁ ମଥୁରାଙ୍କୁ ମିଳିଥିବା ୟୁଡିଆଇଡି ପରିଚୟପତ୍ରରେ ୪୫ ପ୍ରତିଶତ ଭିନ୍ନକ୍ଷମ ବୋଲି ଦର୍ଶାଯାଇଛି। ସେହିପରି ମା’ବାପଛେଉଣ୍ଡ ଗ୍ରାମର ଆହ୍ଲାଦିନୀ ହନୁମାନ ଓ ଆଭା ହନୁମାନ ୨ ଭଉଣୀଙ୍କୁ ପଞ୍ଚାୟତରୁ ୫ କେଜି ଲେଖାଏ ପିଡିଏସ ଚାଉଳ ମିଳୁଥିବାବେଳେ ସେମାନେ ୩୫ କେଜି ଚାଉଳ ଦାବି କରିଛନ୍ତି। ଏପରି ଭାବେ ଗ୍ରାମର ୨୮ ଜଣ ଅସହାୟ ବ୍ୟକ୍ତି ଓ ଦିବ୍ୟାଙ୍ଗ ଉପଯୁକ୍ତ ସରକାରୀ ସହାୟତା ନ ପାଇ ଦୁର୍ଦ୍ଦିନରେ ଦିନ କାଟୁଛନ୍ତି। ଏହାକୁ ନେଇ ଆଦିବସୀ ନେତା ଭୋଇ ଶିବିରର ଅଧ୍ୟକ୍ଷ ଏଡିଏମ୍ ବେହେରା ଏବଂ ସେଠାରେ ଉପସ୍ଥିତ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ। ଶିବିରର ଅଧ୍ୟକ୍ଷ ବେହେରା ବ୍ଲକ ପ୍ରଶାସନ ଉପରେ ଦୋଷାରୋପ କରିଥିଲେ ା ଅଧିକାରୀଙ୍କ ଆରୋପପ୍ରତ୍ୟାରୋପରେ ଅସହାୟ ବ୍ୟକ୍ତି ଓ ଦିବ୍ୟାଙ୍ଗ ବଳିପଡୁଥିବା ଅଭିଯୋଗ କରି ଆଦିବାସୀ ନେତା ଭୋଇ ଶିବିରରେ ଅସନ୍ତୋଷ ବ୍ୟକ୍ତ କରିଥିଲେ। ଏହି ଘଟଣାକୁ ନେଇ ଏଡିଏମ୍ ବେହେରା ଓ ଭୋଇ କଥା କଟାକଟି ହୋଇଥିଲେ। ବ୍ଲକ ପ୍ରଶାସନର ମନମାନିକୁ ବ୍ଲକ ଅଧ୍ୟକ୍ଷ ଯତୀନ୍ଦ୍ର ପଟେଲ ମଧ୍ୟ ଅସନ୍ତୋଷ ବ୍ୟକ୍ତ କରି ଭୋଇଙ୍କ ଦାବିକୁ ସମର୍ଥନ ଜଣାଇଥିବା ଦେଖିବାକୁ ମିଳିଥିଲା। ଏହି ଖବରପାଇ ଲୋଇସିଂହା ପୋଲିସ ଶିବିରରେ ପହଞ୍ଚତ୍ଥିଲା। ସେହିପରି ଲୋଇସିଂହା ପଞ୍ଚାୟତ ଅଧୀନ ପତ୍ରପାଲି ଗ୍ରାମର ମହିଳାମାନେ ପିଇବା ପାଣି ପାଇଁ ହନ୍ତସନ୍ତ ହେଉଥିବା ଅଭିଯୋଗ କରିଥିଲେ। ମହିଳାମାନେ ଓଭରହେଡ ଟାଙ୍କି କାହା ସ୍ବାର୍ଥରେ ନିର୍ମାଣ ହୋଇଛି ବୋଲି ଜିଲା ପ୍ରଶାସନକୁ ପ୍ରଶ୍ନ କରିଥିଲେ। ସେହିପରି ବ୍ଲକରେ ବନ୍ଦ ଥିବା ତଲିଉଡାର ପଞ୍ଚାୟତର ଜଟିପାଲି ଗ୍ରାମର ପ୍ରାଥମିକ ବିଦ୍ୟାଳୟକୁ ପୁନଃ ଖୋଲିବାକୁ ଶିବିର ଦ୍ୱାରସ୍ଥ ହୋଇଥିଲେ ଗ୍ରାମବାସୀ।
Dharitri – Odisha’s No.1 Odia Daily
