ସମ୍ବଲପୁର,୧୫ା୧(ବ୍ୟୁରୋ): ସମ୍ବଲପୁର ଜିଲା ବୁର୍ଲାସ୍ଥିତ ଭିସୁଟ୍ର ଦ୍ୱିତୀୟ ବର୍ଷ ଛାତ୍ର ମାନସ ସିଂଙ୍କୁ ମାଡ଼ ଘଟଣାରେ କର୍ତ୍ତୃପକ୍ଷ ସମ୍ପୃକ୍ତ ୬ଜଣ ସିନିୟର ଛାତ୍ରଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଗତ ସେମିଷ୍ଟର ପରୀକ୍ଷାରେ ସେମାନଙ୍କ ଗୋଟିଏ ଲେଖାଏ ଗ୍ରେଡ୍ ପଏଣ୍ଟ କଟାଯିବ। ଏହାସହ ଜାନୁୟାରୀ ୩୧ ତାରିଖ ସୁଦ୍ଧା ପ୍ରତ୍ୟେକ ଛାତ୍ର ୧୫ ହଜାର ଟଙ୍କା ଲେଖାଏ ଜରିମାନା ଦେବାକୁ ଅଭିଭାବକଙ୍କୁ ଚିଠି କରାଯାଇଛି।
ଅଭିଯୋଗକାରୀ ଛାତ୍ର ମାନସଙ୍କୁ ମଧ୍ୟ ତାଗିଦ କରାଯାଇଛି। କଲେଜ ଓ ହଷ୍ଟେଲରେ ଶାନ୍ତି ବଜାୟ ରଖିବାକୁ କୁହାଯାଇଛି। ସମସ୍ତ ଛାତ୍ର ୨୦ ଟଙ୍କିଆ ଷ୍ଟାମ୍ପ୍ ପେପରରେ ଘୋଷଣାନାମା ଦେବାକୁ ନିର୍ଦ୍ଦେଶ ଦିଆଯାଇଛି।
ସୂଚନାଯୋଗ୍ୟ, ଡିସେମ୍ବର ୧୭ରେ ବୁର୍ଲା ଥାନାରେ ମାନସ ଅଭିଯୋଗ କରିବା ପରେ ପୋଲିସ ୭୪୫/୨୧ରେ ଏକ ମାମଲା ରୁଜୁ କରିଥିଲା। ତାଙ୍କ ଅଭିଯୋଗକ୍ରମେ ସେ କ୍ୟାମ୍ପସ୍ ବାହାକୁ ଚା’ ପିଇବା ପାଇଁ ଯାଇଥିଲେ। ସେତେବେଳେ ଉକ୍ତ ଦୋକାନକୁ ୬ ଜଣ ସିନିୟର ଛାତ୍ର ଆସି ମାନସଙ୍କୁ ଗାଳିଗୁଲଜ କରିବା ସହ ସିନିୟର ଛାତ୍ରଙ୍କୁ କିଭଳି ସମ୍ମାନ ଦିଆଯାଏ ଜାଣିନାହୁଁ କହି ମାଡ଼ ମାରିଥିଲେ। ଏ ବିଷୟରେ କାହାକୁ ଜଣାଇଲେ ଜୀବନରେ ମାରିଦେବାକୁ ଧମକ ଦେଇଥିଲେ। ପରେ ମାନସ ଥାନାରୁ ଅଭିଯୋଗ ପ୍ରତ୍ୟାହାର କରି କଲେଜ କର୍ତ୍ତୃପକ୍ଷଙ୍କ ପାଖରେ ଅଭିଯୋଗ କରିଥିଲେ। କଲେଜ ପକ୍ଷରୁ ଶୃଙ୍ଖଳା କମିଟି ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିଛି।
