ଢେଙ୍କାନାଳ ଅଫିସ, ୧୭।୪ ଭୟଙ୍କର ରୂପ ନେଇ ବାହୁଡ଼ିଛି କରୋନା। ଦେଶ ତଥା ରାଜ୍ୟରେ ସଂକ୍ରମଣ ମାମଲା ରେକର୍ଡ ଭାଙ୍ଗୁଛି। ଦ୍ୱିତୀୟ ଲହରିର ମୁକାବିଲା କରିବାକୁ ରାଜ୍ୟ ସରକାର ଅଣ୍ଟା ଭିଡ଼ିଛନ୍ତି। ଏଥିଲାଗି ଜାରି କରାଯାଇଛି ବିଭିନ୍ନ କଟକଣା। ଏହି ପରିପ୍ରେକ୍ଷୀରେ ଢେଙ୍କାନାଳ ଜିଲାପାଳ ଭୂମେଶ ଚନ୍ଦ୍ର ବେହେରା ଶନିବାରଠାରୁ ସହରାଞ୍ଚଳରେ ନାଇଟ୍ କର୍ଫ୍ୟୁ ଘୋଷଣା କରିଛନ୍ତି। ରାତି ୯ଟାରୁ ପରଦିନ ସକାଳ ୫ଟା ଯାଏ ଏହି କଟକଣା ବଳବତ୍ତର ରହିବ। ପରବର୍ତ୍ତୀ ନିର୍ଦ୍ଦେଶନାମା ଯାଏ ଏହା କାର୍ଯ୍ୟକାରୀ ହେବ। ଜନତାଙ୍କ ଧନଜୀବନ ସୁରକ୍ଷା ପାଇଁ ଏହି ପଦକ୍ଷେପ ନିଆଯାଇଛି। ଏହାକୁ ଉଲ୍ଲଂଘନ କଲେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲା ପ୍ରଶାସନ ପକ୍ଷରୁ ସତର୍କ କରାଯାଇଛି।
ରାତ୍ରିକାଳୀନ କର୍ଫ୍ୟୁ ସମୟ ମଧ୍ୟରେ ବିନା ଜରୁରୀ କାର୍ଯ୍ୟରେ ଜନସାଧାରଣ ବାହାରକୁ ବାହାରି ପାରିବେନାହିଁ। ସମସ୍ତ ସାମାଜିକ, ସାଂସ୍କୃତିକ, ରାଜନୈତିକ କାର୍ଯ୍ୟକ୍ରମ ବନ୍ଦ ରହିବ। ତେବେ ଏହି ସମୟ ଭିତରେ ସ୍ବାସ୍ଥ୍ୟ, ଅଗ୍ନିଶମ, ଅତ୍ୟାବଶ୍ୟକ ସାମଗ୍ରୀ ପରିବହନ ଭଳି କାର୍ଯ୍ୟ ଜାରି ରହିବ। ଅନ୍ୟପଟେ କରୋନାକୁ ନେଇ ଗୁଜବ କିମ୍ବା ଅପପ୍ରଚାର କଲେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଗୁଜବ ସୃଷ୍ଟିକାରୀ ବନ୍ଧା ହେବେ। କରୋନା ଉପରେ ବିଜୟ ହାସଲ କରିବା ଲାଗି ପ୍ରଶାସନକୁ ସମସ୍ତ ପ୍ରକାର ସହଯୋଗ କରିବାକୁ ଜିଲାପାଳ ନିବେଦନ କରିଛନ୍ତି। ଅପରପକ୍ଷେ ନାଇଟ୍ କର୍ଫ୍ୟୁ ସମୟରେ କଟକଣା ଜଗିବାକୁ ଏସ୍ପି, ଉପଖଣ୍ଡ ମାଜିଷ୍ଟ୍ରେଟ୍, ନିର୍ବାହୀ ମାଜିଷ୍ଟ୍ରେଟ୍ଙ୍କ ସମେତ ସମସ୍ତ ଥାନାର ଅଧିକାରୀଙ୍କୁ ଅବଗତ କରାଯାଇଛି। ରାତିରେ ପାଟ୍ରୋଲିଂ କଡ଼ାକଡ଼ି କରିବା ସହ ଦିନ ସମୟରେ ମଧ୍ୟ ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି।
ତ୍ରୁଟି ସୁଧାରିଲେ କରୋନା ହାରିବ
ରାତି କର୍ଫ୍ୟୁ ସ୍ବାଗତଯୋଗ୍ୟ ପଦକ୍ଷେପ। ତେବେ କେବଳ ଏହା ସମସ୍ୟାର ସମାଧାନ ନୁହେଁ। ବାହାରୁ ଆସୁଥିବା ଲୋକଙ୍କୁ ଚିହ୍ନଟ କରି ସେମାନଙ୍କ କରୋନା ପରୀକ୍ଷା କରାଯାଉ। ସେମାନଙ୍କୁ ଅନୂ୍ୟନ ୭ଦିନ ହୋମ୍ କ୍ୱାରାଣ୍ଟାଇନ୍ରେ ରଖିବା ଲାଗି ପଦକ୍ଷେପ ନିଆଯିବା ଜରୁରୀ। କୋଭିଡ୍-୧୯ ମୁକାବିଲା ସମୟରେ ରହୁଥିବା ତ୍ରୁଟି ସୁଧାରିଲେ କରୋନା ହାରିବ।
-ପଙ୍କଜ ନାୟକ, ସାମାଜିକ କର୍ମୀ
ଜନତାଙ୍କ ସହଯୋଗ ଜରୁରୀ
କରୋନାକୁ ନିୟନ୍ତ୍ରଣକୁ ଆଣିବା ଲାଗି ପ୍ରଶାସନ ପକ୍ଷରୁ ଲାଗୁ କରାଯାଇଥିବା ରାତ୍ରିକାଳୀନ କର୍ଫ୍ୟୁ ନିଶ୍ଚିତ ଭାବେ ସ୍ବାଗତଯୋଗ୍ୟ ପଦକ୍ଷେପ। କର୍ଫ୍ୟୁ ସମୟରେ କୌଣସି ଲୋକ ରାତି କିମ୍ବା ଭୋର୍ ସମୟରେ ସହରକୁ ପ୍ରବେଶ କଲେ ପ୍ରଶାସନ ଅବଗତ ହୋଇପାରିବ। ତଦନୁଯାୟୀ ସମୁଚିତ ପଦକ୍ଷେପ ନିଆଯାଇପାରିବ। ଜନସାଧାରଣ ମଧ୍ୟ ଏଥିରେ ସହଯୋଗ କରିବା ନିହାତି ଜରୁରୀ।
-ବିଶ୍ୱନାଥ ବେହେରା, ମିଳିତବଜାର ପୂଜା କମିଟି ସଭାପତି
ଅଧିକ ପରୀକ୍ଷା କରାଯାଉ
ଜିଲାରେ କରୋନା ସଂକ୍ରମଣ ବଢୁଥିବା ବେଳେ ରାତି କର୍ଫ୍ୟୁର ଆବଶ୍ୟକତା ରହିଛି ା ଜିଲାକୁ ପ୍ରବେଶ କରୁଥିବା ପ୍ରବାସୀମାନଙ୍କ ସମ୍ପର୍କରେ ପ୍ରଶାସନ ଅବଗତ ହେବା ଉଚିତ। ଠିକ୍ ସମୟରେ ସେମାନଙ୍କ କୋଭିଡ୍ ଟେଷ୍ଟ କରାଗଲେ ସଂକ୍ରମଣକୁ ରୋକାଯାଇପାରିବ। ଏହାକୁ ବାଦ୍ଦେଲେ ଅଧିକରୁ ଅଧିକ ପରୀକ୍ଷା, ହୋମ୍ ଆେଇସୋଲେଶନ ବ୍ୟବସ୍ଥା ମଧ୍ୟ କରାଯିବା ଜରୁରୀ। ଏ କ୍ଷେତ୍ରରେ ପଞ୍ଚାୟତ ପ୍ରତିନିଧିଙ୍କ ଭୂମିକା ଗୁରୁତ୍ୱପୂର୍ଣ୍ଣ।
-ପ୍ରଦୀପ ସାହୁ, ମହର୍ଷି ଦୟାନନ୍ଦ ସର୍ଭିସ ମିଶନ ସମ୍ପାଦକ
