ରଗଡ଼ି, ୩।୭(ଡି.ଏନ.ଏ.): ଯାଜପୁର ଜିଲା ରଗଡ଼ି ଉପକାରାଗାରରେ ବନ୍ଦୀ ଜୀବନ କାଟୁଥିବା ଜଣେ ବିଚାରାଧୀନ ବନ୍ଦୀ କଟକ ବଡ଼ ମେଡିକାଲରୁ ଶୁକ୍ରବାର ପୂର୍ବାହ୍ନ ପ୍ରାୟ ୧୦ଟାରେ ଫେରାର ହୋଇଯାଇଥିବା ସୂଚନା ମିଳିଛି। ଫେରାର ଅଭିଯୁକ୍ତ ଜଣକ ହେଲେ କାଳିଆପାଣି ଥାନା ଅଞ୍ଚଳର ଶୁକ୍ରା ମୁଣ୍ଡା। ସେ ୩୦ା୬ା୨୦୨୨ରେ ହଠାତ ଅସୁସ୍ଥ ହେବାରୁ ତାଙ୍କୁ ଚିକିତ୍ସା ନିମନ୍ତେ କଟକ ବଡ ଡାକ୍ତରଖାନାରେ ଭର୍ତ୍ତି କରାଯାଇଥିଲା।
ରଗଡ଼ି ଜେଲ ଅଧୀକ୍ଷକ ପ୍ରକାଶ ଚନ୍ଦ୍ର ରଣାଙ୍କ ସୂଚନା ଅନୁଯାୟୀ, ଶୁକ୍ରା ଗତ ୨ ବର୍ଷ ହେଲା ରଗଡ଼ି ଜେଲରେ ଏକ ହତ୍ୟା ଅଭିଯୁକ୍ତ ଭାବେ ରହି ଆସୁଥିଲେ। ସେ ଯକ୍ଷ୍ମା ରୋଗରେ ଆକ୍ରାନ୍ତ ହୋଇ ଚିିକିତ୍ସାଧୀନ ଥିଲେ। ଶୁକ୍ରବାର ତାଙ୍କ ଅବସ୍ଥା ସଙ୍କଟାପନ୍ନ ହେବାରୁ କାରାଗାରର ୩ ଜଣ ସୁରକ୍ଷା କର୍ମୀ ଓ ଜଣେ ଫାର୍ମାସିଷ୍ଟଙ୍କ ସହ ତାଙ୍କୁ କଟକ ବଡ ମେଡିକାଲରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଥିଲା ା କିନ୍ତୁ ଢିଲା ସୁରକ୍ଷା ବଳୟର ସୁଯୋଗ ନେଇ ସେ ମେଡିକାଲ ପରିସରରୁ ଚମ୍ପଟ ମାରିବାକୁ ସକ୍ଷମ ହୋଇଥିଲେ। କଏଦୀ ଜଣଙ୍କ ଫେରାର ହେବା ନେଇ ଉପ କାରାଗାର କର୍ତ୍ତୃପକ୍ଷ କଟକ ମଙ୍ଗଳାବାଗ ଥାନାରେ ଲିଖିତ ଅଭିଯୋଗ କରିଛନ୍ତି। ଫେରାର ଅଭିଯୁକ୍ତଙ୍କୁ ଧରିବା ପାଇଁ ଥାନା ପୋଲିସ ବିଭିନ୍ନ ସ୍ଥାନରେ ଚଢାଉ ଜାରି ରଖିଥିବା ସୂଚନା ମିଳିଛି।
