ଟିକିରି,୨୬।୫(ଡି.ଏନ୍.ଏ.): ରାୟଗଡ଼ା ଜିଲା କାଶୀପୁର ଥାନା ସିରିପାଇ ପଞ୍ଚାୟତ ଅନ୍ତର୍ଗତ ବାହାରଦୁଲକି ଗ୍ରାମରେ ଧାରୁଆ ଅସ୍ତ୍ରରେ ବୃଦ୍ଧାଙ୍କ ତଣ୍ଟି କାଟି ସୁନାଚେନ୍ ଲୁଟ ଘଟଣାର ପର୍ଦ୍ଦାଫାସ ହୋଇଛି। କାଶୀପୁର ପୋଲିସ ମଙ୍ଗଳବାର ଅଭିଯୁକ୍ତଙ୍କୁ ଗିରଫ କରି ଲୁଟ୍ ହୋଇଥିବା ଚେନ୍ ଏବଂ ସୁନା ଅଳଙ୍କାର ଜବତ କରିଛି। ଗିରଫ ବ୍ୟକ୍ତି ହେଲେ ଉକ୍ତ ଗ୍ରାମର ଚଇତୁ ମାଝି। ମଦ ପିଇବା ପାଇଁ ନିଶାସକ୍ତ ଅବସ୍ଥାରେ ସେ ବୃଦ୍ଧାଙ୍କ ଠାରୁ ଲୁଟ୍ କରିଥିବା ପୋଲିସ ସୂଚନା ଦେଇଛି। ସୂଚନାଯୋଗ୍ୟ, ବାହାରଦୁଲକି ଗ୍ରାମରେ ରବିବାର ବୃଦ୍ଧା ସଦାମଣି ନାଏକ ଜଙ୍ଗଲକୁ କାଠ ଆଣିବାକୁ ଯାଇଥିଲେ। ଏହି ସମୟରେ ଚଇତୁ ବୃଦ୍ଧାଙ୍କ ହାତ, ଗୋଡ଼ ଗଛରେ ବାନ୍ଧି ଧାରୁଆ ଅସ୍ତ୍ର ସାହାଯ୍ୟରେ ତଣ୍ଟି କାଟି ସୁନାଚେନ୍ ଏବଂ ଅନ୍ୟ ଅଳଙ୍କାର ଲୁଟି ନେଇଥିଲେ। ସଦାମଣି ତାଙ୍କୁ ଚିହ୍ନିଥିବାରୁ ପ୍ରମାଣ ନଷ୍ଟ କରିବାକୁ ସେ ତାଙ୍କର ଗଳା କାଟି ଦେଇଥିଲେ। ପୋଲିସ ଚଇତୁ ନିକଟରୁ ଧାରୁଆ ଅସ୍ତ୍ର ଜବତ କରିଥିବା ଖବରଦାତା ସମ୍ମିଳନୀରେ ରାୟଗଡ଼ା ଏସ୍ଡିପିଓ ଦିବ୍ୟଜ୍ୟୋତି ଦାସ ସୂଚନା ଦେଇଛନ୍ତି। କାଶୀପୁର ଥାନା ଅଧିକାରୀ ମଧ୍ୟ ଉପସ୍ଥିତ ଥିଲେ।
