ଲୋଇସିଂହା,୨୭।୩(ଡି.ଏନ୍.ଏ): ବଲାଙ୍ଗୀର ଜିଲା ଲୋଇସିଂହା ବ୍ଲକ ତଲିଉଡାର ତଳିବନ୍ଧ ନିକଟରେ ଏକ ଅଟୋ ଭାରସାମ୍ୟ ହରାଇ ଓଲଟି ପଡିବାରୁ ଜଣେ ବୃଦ୍ଧାଙ୍କ ମୃତ୍ୟୁ ଘଟିଛି । ଏଥିରେ ଥିବା ଅନ୍ୟ ୮ ଯାତ୍ରୀ ଗୁରୁତର ହୋଇଛନ୍ତି। ମୃତକ ହେଲେ ରୋଥ ଗ୍ରାମର ବିମଳା ଭୋଇ(୮୫)। ମୃତଦେହ ବ୍ୟବଚ୍ଛେଦ କରି ପୋଲିସ ପରିବାର ଲୋକଙ୍କୁ ହସ୍ତାନ୍ତର କରିଛି।
ସୂଚନାମତେ, ରୋଥ ଓ ବାଦିମୁଣ୍ଡା ଅଞ୍ଚଳର କେତେକ ବ୍ୟକ୍ତି ଦୁଆନାପାଲିକୁ ଏକ ବିବାହ ଉତ୍ସବରେ ଯୋଗଦେବାକୁ ଯାଇଥିଲେ। ବିବାହ ଉତ୍ସବ ସାରି ଅଟୋରେ ଘରକୁ ଫେରୁଥିବା ବେଳେ ବଲାଙ୍ଗୀର-କୁଶଙ୍ଗ ରାସ୍ତାର ତଳିବନ୍ଧ ନିକଟରେ ଗାଡି ଓଲଟି ପଡିଥିଲା। ଅଟୋରେ ବସିଥିବା ସମସ୍ତ ଯାତ୍ରୀ ରାସ୍ତାରେ ଛିଟିକି ପଡି ଗୁରୁତର ହୋଇଥିଲେ। ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ବଲାଙ୍ଗୀର ପଠାଇଥିଲେ । ସେଠାରେ ବିମଳାଙ୍କୁ ଡାକ୍ତର ମୃତ ଘୋଷଣା କରିଥିଲେ।
