ବ୍ରହ୍ମପୁର ଅଫିସ,୨୭ା୩: ରେଳଧାରଣା ପାର ବେଳେ ଘଟିଛି ଅଘଟଣ। ଏଥିରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି। ଆଉ ଜଣେ ଅଳ୍ପକେ ବର୍ତ୍ତିଯାଇଛନ୍ତି। ମୃତକଙ୍କ ପରିଚୟ ମିଳିପାରି ନ ଥିବା ବେଳେ ତାଙ୍କ ବୟସ ଆନୁମାନିକ ୫୮ ବର୍ଷ ହେବ ବୋଲି ରେଳ ପୋଲିସ କହିଛି। ଅନ୍ୟପଟେ ରେଳ ସୁରକ୍ଷା ବଳ କର୍ମଚାରୀମାନେ ଆହତଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଛନ୍ତି।
ମିଳିଥିବା ସୂଚନା ମୁତାବକ, ସୋମବାର ପୂର୍ବାହ୍ନରେ ହଳଦିଆପଦର ନିକଟ ରେଳଧାରଣାରେ ଜଣେ ବ୍ୟକ୍ତିଙ୍କ ମୃତଦେହ ପଡ଼ିଥିବା ଖବର ମିଳିଥିଲା। ପୋଲିସ ସେଠାରେ ପହଞ୍ଚି ମୃତଦେହ ଜବତ କରି ନଂ.୨୫/୨୩ରେ ଏକ ଅପମୃତ୍ୟୁ ମାମଲା ରୁଜୁ କରିଛି। ପରିଚୟ ମିଳି ନ ଥିବାରୁ ମୃତଦେହ ବ୍ୟବଚ୍ଛେଦ ପରେ ସଂରକ୍ଷଣ ଗୃହରେ ରଖାଯାଇଛି ବୋଲି ପୋଲିସ କହିଛି। ସେହିପରି କନ୍ଧମାଳ ଜିଲା ସାରଙ୍ଗଗଡ଼଼ ଗ୍ରାମର ଦୁଇ ପରିବାର କାମ କରିବାକୁ ଚେନ୍ନାଇ ଯିବା ପାଇଁ ସୋମବାର ସକାଳେ ବ୍ରହ୍ମପୁର ଆସିଥିଲେ। ବାଳକୃଷ୍ଣ ବେହେରା(୩୫) ଓ ଚିତ୍ରସେନ ନାୟକ(୪୫)ଙ୍କ ପରିବାର ସଦସ୍ୟ ରେଳଷ୍ଟେଶନର ପ୍ଲାଟ୍ଫର୍ମ-୨ରେ ଟ୍ରେନ୍କୁ ଅପେକ୍ଷା କରିଥିଲେ। ହେଲେ ବାଳକୃଷ୍ଣ ଓ ଚିତ୍ରସେନ କୌଣସି କାରଣରୁ ବାହାରକୁ ଯାଇଥିଲେ। କିଛି ସମୟ ପରେ ଶୁଣିବାକୁ ମିଳିଥିଲା, ରେଳଧାରଣା ପାର ହେଉଥିବା ଜଣେ ଲୋକ ଯଶୱନ୍ତପୁର-ହାୱଡା ସୁପରଫାଷ୍ଟ ଟ୍ରେନ୍ ଧକ୍କାରେ ଆହତ ହୋଇଛନ୍ତି। ବାଳକୃଷ୍ଣ ସେଠାକୁ ଯାଇ ଦେଖିବା ବେଳକୁ ଆହତ ଚିତ୍ରସେନଙ୍କୁ ପୋଲିସ ମେଡିକାଲ ନେଉଛି। ଫଳରେ ଉଭୟ ପରିବାରର ଚେନ୍ନାଇ ଯିବା ଯୋଜନା ଅଧାରେ ରହିଯାଇଥିଲା। ବାଳକୃଷ୍ଣ ନିଜ ପରିଚୟ ପୋଲିସକୁ ଦେବା ସହ ଚିତ୍ରସେନ ସୁସ୍ଥ ହେବା ପରେ ଆମେ ତାଙ୍କୁ ଗଁାଙ୍କୁ ନେଇଯିବୁ ବୋଲି ରେଳ ସୁରକ୍ଷା ବଳ(ଆରପିଏଫ) ଅଧିକାରୀଙ୍କୁ ଲିଖିତ ଭାବେ ଜଣାଇଛନ୍ତି।
