କୋକସରା,୩୧।୫(ଡି.ଏନ୍.ଏ.): କଳାହାଣ୍ଡି ଜିଲା ୨୬ ନଂ ଜାତୀୟ ରାଜପଥ ଚାରବାହାଲ ଶାନ୍ତି ନଗର ପଡା ନିକଟରେ ମଙ୍ଗଳବାର ଏକ ପେଟ୍ରୋଲ ଭର୍ତ୍ତି ଟ୍ୟାଙ୍କର ଦୁର୍ଘଟଣାଗ୍ରସ୍ତ ହୋଇଛି। ରାସ୍ତାକଡ଼ରେ ଥିବା ଏକ ବରଗଛରେ ପିଟି ହୋଇ ଯିବାରୁ ଗାଡ଼ିଟିର ସାମ୍ନାପଟ ଭାଙ୍ଗି ଚୁରମାର ହୋଇଯାଇଛି। ଦୁର୍ଘଟଣା ଏତେ ଜୋର୍ରେ ହୋଇଥିଲା ଯେ ଗାଡ଼ି ଭିତରେ ଡ୍ରାଇଭର ଦୀର୍ଘ ସମୟ ଧରି ଫସି ରହିଥିଲେ। ପରେ ସ୍ଥାନୀୟ ମୋଟେର ଫାଣ୍ଡି ପୋଲିସ ପହଞ୍ଚି କୋକସରା ଅଗ୍ନିଶମ ବିଭାଗ କର୍ମଚାରୀଙ୍କ ସହାୟତାରେ ବହୁ କୌଶଳ କ୍ରମେ ଡ୍ରାଇଭରକୁ ଉଦ୍ଧାର କରି କୋକସରା ଡାକ୍ତରଖାନାରେ ଭର୍ତ୍ତି କରିଥିଲେ। ପ୍ରାଥମିକ ଚିକିତ୍ସା ପରେ ଡ୍ରାଇଭରଙ୍କୁ ଭବାନୀପାଟଣା ହସ୍ପିଟାଲ ସ୍ଥାନାନ୍ତର କରିଥିବା ଜଣାପଡ଼ିଛି। ଗୁରୁତର ଡ୍ରାଇଭରଜଣଙ୍କ ବୌଦ୍ଧ ଜିଲାର ବାଉଁଶୁଣି ଅଞ୍ଚଳର ବିକାଶ ସାହୁ ବୋଲି ଜଣାପଡିଛି। ସେ ଝାରସୁଗୁଡାରୁ ଟ୍ୟାଙ୍କରରେ ପେଟ୍ରୋଲ ନେଇ ଜୟପାଟଣା ବ୍ଲକ ବାନେରର ଏକ ପେଟ୍ରୋଲ ଟାଙ୍କିକୁ ଯାଉଥିବା ବେଳେ ଦୁର୍ଘଟଣା ହୋଇଛି। ଘଟଣାସ୍ଥଳରେ ପହଞ୍ଚି ମୋଟେର ଫାଣ୍ଡି ଅଧିକାରୀ ଅଜୟ ନାଏକ ତଦନ୍ତ ଜାରି ରଖିଥିବା କହିଛନ୍ତି ।
