ପଟ୍ଟାଙ୍ଗି, ୯।୬ (ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ସୁଙ୍କି ଥାନା ଅଧୀନ ଜୋଡିମାଦିଲି ଘାଟିରେ ଏକ ଭୟାବହ ସଡ଼କ ଦୁର୍ଘଟଣା ଘଟିଯାଇଛି। ଘାଟି ଅତିକ୍ରମ କରିବା ସମୟରେ ଏକ ମକା ବୋଝେଇ ଟ୍ରକ୍ର ବ୍ରେକ୍ ଫେଲ୍ ହୋଇଯିବାରୁ ଏହା ଆଗରେ ଯାଉଥିବା ଏକ କାର୍କୁ ପଛପଟୁ ଜୋରଦାର ଧକ୍କା ଦେଇଥିଲା। ଧକ୍କା ଦେବା ପରେ ଟ୍ରକ୍ଟି ଭାରସାମ୍ୟ ହରାଇ ଜାତୀୟ ରାଜପଥ କଡ଼ରେ ଥିବା ଏକ ଗଭୀର ଗାତ ଭିତରକୁ ଖସି ପଡି ଓଲଟି ପଡ଼ିଥିଲା। ଏହି ଦୁର୍ଘଟଣାରେ ଟ୍ରକ୍ ତଳେ ଚାପି ହୋଇ ହେଲପରଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। ମୃତ ହେଲପର ଜଣକ ହେଲେ ଛତିଶଗଡ଼ର ରାମ ନେତାମ୍।
ସୂଚନା ଅନୁଯାୟୀ, ଛତିଶଗଡ଼ ରାଜ୍ୟର କଣ୍ଡାଗାଁରୁ ମକା ଲୋଡ୍ କରି ଟ୍ରକ୍ (ନଂ CG27 P 0881) ପଡ଼ୋଶୀ ଆନ୍ଧ୍ରପ୍ରଦେଶର ବିଶାଖାପାଟଣା ଅଭିମୁଖେ ଯାଉଥିଲା। ଜୋଡିମାଦିଲି ଘାଟି ନିକଟରେ ହଠାତ୍ ଟ୍ରକ୍ର ବ୍ରେକ୍ ଫେଲ୍ ହୋଇଯାଇଥିଲା। ସେହି ସମୟରେ ଆନ୍ଧ୍ର ଅଭିମୁଖେ ଯାଉଥିବା ଏକ କାର୍ (ନଂ AP39 UZ 7646) କୁ ପଛପଟୁ ଧକ୍କା ଦେଇ ଟ୍ରକ୍ଟି ୨୬ ନମ୍ବର ଜାତୀୟ ରାଜପଥ କଡ଼ରେ ଥିବା ଏକ ଗାତକୁ ଖସି ଓଲଟି ପଡ଼ିଥିଲା।
ଦୁର୍ଘଟଣା ପରେ ହେଲପର ରାମ ନେତାମ୍ ଟ୍ରକ୍ ତଳେ ଚାପି ହୋଇ ରହିଯାଇଥିଲେ। ସ୍ଥାନୀୟ ଗ୍ରାମବାସୀ ତାଙ୍କୁ ଉଦ୍ଧାର କରିବାକୁ ଚେଷ୍ଟା କରିବା ସହ ସୁଙ୍କି ପୋଲିସକୁ ଖବର ଦେଇଥିଲେ। ସୁଙ୍କି ଆଇଆଇସି ଚତୁର୍ଭୁଜ ନାୟକ ସଦଳବଳେ ଘଟଣାସ୍ଥଳରେ ପହଞ୍ଚି ପଟ୍ଟାଙ୍ଗିରୁ ଅଗ୍ନିଶମ ବାହିନୀକୁ ଡକାଇଥିଲେ। ଅଗ୍ନିଶମ କର୍ମଚାରୀମାନେ ଟ୍ରକ୍ ତଳୁ ଗୁରୁତର ଅବସ୍ଥାରେ ରାମଙ୍କୁ ଉଦ୍ଧାର କରି ପଟ୍ଟାଙ୍ଗି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଇଥିଲେ ମଧ୍ୟ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅପରପକ୍ଷରେ, ଟ୍ରକ୍ ଚାଳକ ପ୍ରେମ ସାଗର ସାମାନ୍ୟ ଆହତ ହୋଇ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି। ବୁଧବାର ସକାଳେ ମୃତଦେହ ବ୍ୟବଚ୍ଛେଦ କରାଯିବ ବୋଲି ହସ୍ପିଟାଲ କର୍ତ୍ତୃପକ୍ଷ ସୂଚନା ଦେଇଛନ୍ତି।
ଦୁର୍ଘଟଣା ସ୍ଥଳରେ ଏକ ଦୁଃଖଦ ଦେଖିବାକୁ ମିଳିଛି। ଉଦ୍ଧାର କରିବା ବାହାନାରେ ସେଠାରେ ରୁଣ୍ଡ ହୋଇଥିବା କିଛି ଅସାଧୁ ଲୋକ ଆହତ ଡ୍ରାଇଭରଙ୍କ ମୋବାଇଲ୍ ଏବଂ ପାଖରେ ଥିବା ଖର୍ଚ୍ଚ ଟଙ୍କା ଚୋରି କରି ନେଇଯାଇଥିବା ଚାଳକ ପ୍ରେମ ସାଗର ଅଭିଯୋଗ କରିଛନ୍ତି। ଚାଳକଙ୍କ ପାଖରେ ଖାଇବାକୁ ବି ଟଙ୍କା ନ ଥିବାରୁ ହସ୍ପିଟାଲ ପକ୍ଷରୁ ତାଙ୍କୁ ମାନବିକତା ଆଧାରରେ ଖାଦ୍ୟ ଯୋଗାଇ ଦିଆଯାଇଛି। ପୋଲିସ ଏହି ଘଟଣାର ତଦନ୍ତ ଜାରି ରଖିଛି।