କୋଲକାତା,୨୭।୨: ତୃଣମୂଳ କଂଗ୍ରେସ (ଟିଏମସି)ର ଜାତୀୟ ସାଧାରଣ ସମ୍ପାଦକ ଅଭିଷେକ ବାନାର୍ଜୀ ଗୁରୁବାର ଦଳର ସୁପ୍ରିମୋ ମମତା ବାନାର୍ଜୀଙ୍କ ସହ ମତଭେଦ ରିପୋର୍ଟକୁ ଖାରଜ କରିଛନ୍ତି । ଅଭିଷେକ କହିଛନ୍ତି, ମୁଁ ତୃଣମୂଳ କଂଗ୍ରେସର ଜଣେ ବିଶ୍ୱସ୍ତ ସୈନିକ ଏବଂ ମୋର ନେତା ହେଉଛନ୍ତି ମମତା ବାନାର୍ଜୀ।
ଭାରତୀୟ ଜନତା ପାର୍ଟି (ଭାଜପା)ରେ ଯୋଗଦେବା ସମ୍ପର୍କରେ ଚାଲିଥିବା କଳ୍ପନାଜଳ୍ପନାକୁ ଖାରଜ କରି ସେ କହିଛନ୍ତି, ଯେଉଁମାନେ କହୁଛନ୍ତି ଯେ ମୁଁ ଭାଜପାରେ ଯୋଗ ଦେବି, ସେମାନେ ମିଥ୍ୟା ଗୁଜବ ପ୍ରଚାର କରୁଛନ୍ତି। ମୋ ମୁଣ୍ଡ କାଟି ଦେଲେ ବି ମୁଁ ତଥାପି ମମତା ବାନାର୍ଜୀ ଜିନ୍ଦାବାଦ କହିବି। ଆଜିକାଲି ଯାହା ବି ଖବର ଆସୁଛି ତାହା ସମ୍ପୂର୍ଣ୍ଣ ମିଥ୍ୟା। ମୁଁ ଜାଣିଛି ଯେ ଆସନ୍ତା ବର୍ଷ ବିଧାନସଭା ନିର୍ବାଚନ ପୂର୍ବରୁ କିଛି ଲୋକ ନିଜର ସ୍ବାର୍ଥ ପାଇଁ ଏପରି ମିଥ୍ୟା ଖବର ପ୍ରସାର କରୁଛନ୍ତି।
ଅଭିଷେକ ଆହୁରି କହିଛନ୍ତି, ନିଜର ମତଭେଦକୁ ଭୁଲି ଲୋକଙ୍କ ପାଇଁ କାମ କରିବାରେ ଧ୍ୟାନ ଦିଅନ୍ତୁ। ଷଡ଼ଯନ୍ତ୍ରରେ ସାମିଲ ହେବାର କୌଣସି ଅର୍ଥ ନାହିଁ। ଯେଉଁମାନେ ହ୍ବାଟସଆପ ଗ୍ରୁପ ରାଜନୀତିରେ ଲିପ୍ତ ଅଛନ୍ତି, ସେମାନେ ଜାଣିବା ଉଚିତ ଯେ ଏପରି ପ୍ରୟାସ ନିରର୍ଥକ ହେବ।
