ଵ୍ରହ୍ମପୁର, ୨୫।୧୧(ସୁବାସ ଚନ୍ଦ୍ର ପାଢ଼ୀ): ବହୁଚର୍ଚ୍ଚିତ କନ୍ଧମାଳ ଜିଲା ବାଲିଗୁଡା ଥାନା ଅନ୍ତର୍ଗତ ଅଭିମନ୍ୟୁ ପଣ୍ଡା ହତ୍ୟା ମାମଲାର ଚୂଡାନ୍ତ ରାୟ ସୋମବାର ପ୍ରକାଶ ପାଇଛି। ଜିଲା ଓ ଦୌରା ଜଜ ୬ଜଣ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଅଭିଯୁକ୍ତମାନେ ହେଲେ ଅଭିମନ୍ୟୁଙ୍କୁ ଗୁଳି ମାଡ଼ କରିଥିବା ସାରଫ ସୁଟର ଆସିକା ହରିଡାପଦର ଗ୍ରାମର ଗୋଲକ ଓରଫ ରାମ ନାରାୟଣ ନାହାକ, ଉକ୍ତ ଥାନା ହୁମୁକି ଗ୍ରାମର କାଁହୁ ଚରଣ ସାହୁ, ଆସିକା ବଡ଼ ମୁନୀ ସାହିର ବବୁଲୁ ମୁନୀ ଓ ଜାମିନରେ ଥିବା କନ୍ଧମାଳ ଜିଲା ସୁନାପଙ୍କା ଗ୍ରାମର କେ. ବିଶ୍ୱଜିତ ପାତ୍ର, ଧରାକୋଟ ଥାନା ଅନ୍ତର୍ଗତ ମୁଣ୍ଡମରେଇ ଗ୍ରାମର ଏସ. ବାଲାଜି ପାତ୍ର ଓ ବଡଗଡ ଥାନା ଅନ୍ତର୍ଗତ ବନ୍ଧାଗୁଡା ଗ୍ରାମର ରାସ ବିହାରୀ ଦାସ।
ଆଜୀବନ ଦଣ୍ଡ ସହିତ ପ୍ରତ୍ୟେକ ଅଭିଯୁକ୍ତଙ୍କୁ ୧୦ ହଜାର ଟଙ୍କା ଲେଖାଏଁ ଜରିମାନା ଦେବାକୁ ନିର୍ଦେଶ ରହିଛି। ମାମଲାର ବିବରଣୀ ରୁ ପ୍ରକାଶ ଯେ, ଅଭିମନ୍ୟୁଙ୍କୁ ଜଗନ୍ନାଥ ମନ୍ଦିର ଜମି ବିବାଦକୁ ନେଇ ହତ୍ୟା ହୋଇଥିଲା। ପୋଲିସ ମାମଲା ନମ୍ବର ୧୮୮/୧୯ରେ ଏକ ମାମଲା ରୁଜୁ କରିଥିଲା। ତତ୍କାଳୀନ ଥାନାଧିକାରୀ ତଥା ତଦନ୍ତକାରୀ ଅଧିକାରୀ ବାବା ଶଙ୍କର ସରାଫ ସାରଫ ସୁଟର ଗୋଲକ ଓରଫ ରାମ ନାରାୟଣ ନାହାକ ସମେତ ଅନ୍ୟ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ। ଉକ୍ତ ୬ ଅଭିଯୁକ୍ତଙ୍କୁ ସେ ଅଭିଯୁକ୍ତ ଦର୍ଶାଇ କୋର୍ଟରେ ଚାର୍ଜସିଟ ଦାଖଲ କରିଥିଲେ। ମାମଲାର ବିଚାରଣା ବେଳେ ସାକ୍ଷୀ ମାନଙ୍କ ବୟାନ କୁ ଆଧାର କରି ସୋମବାର ଜଜ ଉପରୋକ୍ତ ରାୟ ପ୍ରକାଶ କରିଛନ୍ତି। ଏନେଇ ସରକାରଙ୍କ ପକ୍ଷରୁ ମାମଲା ପରିଚାଳନା କରୁଥିବା ପିପି ତ୍ରିଲୋଚନ ପରିଡା ସୂଚନା ଦେଇଛନ୍ତି।
