ବୈଶିଙ୍ଗା,୨୧ା୨(ଡି.ଏନ.ଏ.): ମୟୂରଭଞ୍ଜ ଜିଲା ବେତନଟୀ ତହସିଲ ତଥା ବୈଶିଙ୍ଗା ଥାନା ଅନ୍ତର୍ଗତ ଆଗ୍ରିଆ ପଞ୍ଚାୟତର ଛୁରୁଣୀ ଗ୍ରାମରେ ଥିବା ପୁରାତନ ଅମରା ମଠ ଏବଂ ଶ୍ରୀନୃସିଂହନାଥ ଜୀଉଙ୍କ ମନ୍ଦିର ଜରାଜୀର୍ଣ୍ଣ ଅବସ୍ଥାରେ ରହିଛି। ଦେବୋତ୍ତର ବିଭାଗର ଅବହେଳାରୁ ଏହି ମଠ ଓ ମନ୍ଦିର ମାଟିରେ ମିଶିବାକୁ ବସିଛି।
ଗଡ଼ଜାତ ରାଜ୍ୟର ଭଞ୍ଜବଂଶୀୟ ରାଜାମାନଙ୍କ ଶାସନ କାଳରେ ପ୍ରାୟ ୩୦୦ ବର୍ଷ ତଳେ ସ୍ଥାପିତ ଏହି ମନ୍ଦିର ସହିତ ଅଞ୍ଚଳବାସୀଙ୍କ ପ୍ରଗାଢ଼ ଭକ୍ତି , ବିଶ୍ୱାସ ଓ ଆସ୍ଥା ଜଡ଼ିତ ଥିଲା। ୧୯୪୯ରେ ଗଡ଼ଜାତ ରାଜ୍ୟର ଓଡ଼ିଶା ସହିତ ମିଶ୍ରଣ ପରେ ମନ୍ଦିର ଓ ମଠର ପରିଚାଳନା ଦାୟିତ୍ୱ ଦେବୋତ୍ତର ବିଭାଗ ଅଧୀନକୁ ଆସିଲା। ୪୫ ଏକରରୁ ଊଦ୍ଧର୍ବ ଜମି ଚିହ୍ନଟ କରାଯାଇ ବିଭିନ୍ନ ଚାଷୀମାନଙ୍କୁ ଭାଗ ସୂତ୍ରରେ ଆବଣ୍ଟନ କରାଗଲା। ଚୁକ୍ତି ଅନୁସାରେ ଚାଷୀମାନେ ସେମାନଙ୍କ ଜମିର ରାଜସ୍ବ ବର୍ଷର ପ୍ରାରମ୍ଭରେ ନିଯୁକ୍ତ ଟ୍ରଷ୍ଟ ନିକଟରେ ପଇଠ କରୁଥିଲେ। ତେବେ ୧୯୯୯ରେ ଶେଷ ମୁଖ୍ୟ ଟ୍ରଷ୍ଟି ଶ୍ୟାମସୁନ୍ଦର ଖଟୁଆଙ୍କ ମୃତ୍ୟୁର କିଛି ବର୍ଷ ମଧ୍ୟରେ ଅନ୍ୟ ୪ଜଣ ଟ୍ରଷ୍ଟିଙ୍କର ମଧ୍ୟ ମୃତ୍ୟୁ ହୋଇଥିଲା। ଏହା ପରଠାରୁ ଦେବୋତ୍ତର ବିଭାଗର ଅବହେଳା ଯୋଗୁ ଅଦ୍ୟାବଧି ନୂତନ ଟ୍ରଷ୍ଟି ମୁତୟନ ହୋଇ ପାରିନାହାନ୍ତି। ତେବେ ଶେଷ ଟ୍ରଷ୍ଟିଙ୍କ ମୃତ୍ୟୁର କିଛି ବର୍ଷ ପୂର୍ବରୁ ସ୍ଥାନୀୟ ଅଞ୍ଚଳର ସାମାଜିକ କର୍ମୀ ରମାକାନ୍ତ ଗୋଚ୍ଛାୟତ ବେସରକାରୀ ଭାବେ ଅଞ୍ଚଳବାସୀଙ୍କ ଅନୁରୋଧ କ୍ରମେ ମଠ ଓ ମନ୍ଦିର ପରିଚାଳନା ଭାର ଗ୍ରହଣ କରିଥିଲେ। ଅନ୍ୟ ପକ୍ଷରେ ଟ୍ରଷ୍ଟ ବୋର୍ଡ ଗଠନ ହୋଇ ପାରି ନ ଥିବା ଦୁର୍ବଳତାର ସୁଯୋଗ ପାଇ ଭାଗଚାଷୀମାନେ ୧୯୯୯ ପରଠାରୁ ମନ୍ଦିର ଜମି ଜବରଦଖଲରେ ରଖିଥିଲେ ହେଁ ସେ ବାବଦରେ କୌଣସି ରାଜସ୍ବ ଅର୍ଥ ପଇଠ କରୁନାହାନ୍ତି। ଫଳରେ ନୃସିଂହନାଥ ଜୀଉଙ୍କ ଦୈନନ୍ଦିନ ନିତିକାନ୍ତି, ପୂଜା, ଅନ୍ନପ୍ରସାଦ ଲାଗି, ମନ୍ଦିରର ରକ୍ଷଣାବେକ୍ଷଣ ଆଦି କାର୍ଯ୍ୟ ଗୁରୁତର ଭାବେ ପ୍ରଭାବିତ ହେଉଛି। ମରାମତି ଅଭାବରୁ ନାଟମନ୍ଦିର ଉପରୁ ପାଣି ଗଳୁଛି। କାନ୍ଥ ଫାଟି ଅଁା କଲାଣି।
ଦେବୋତ୍ତର ବିଭାଗର ଦାୟିତ୍ୱହୀନତା ଓ ନିଷ୍କ୍ରିୟତା ଯୋଗୁ ଏଭଳି ଏକ ପୁରାତନ କୀର୍ତ୍ତିରାଜି ଧ୍ବଂସାଭିମୁଖୀ ଅବସ୍ଥାରେ ପହଞ୍ଚତ୍ ଯାଇଛି। ଗ୍ରାମବାସୀଙ୍କ ପକ୍ଷରୁ ସମସ୍ୟା ସମ୍ପର୍କରେ ଆର୍ଡିିସି କଟକ ଓ ଦେବୋତ୍ତର ବିଭାଗର ସହକାରୀ କମିଶନରଙ୍କ ନିକଟକୁ ବାରମ୍ବାର ରେଜିଷ୍ଟ୍ରି ଡାକ ଯୋଗେ ଦରଖାସ୍ତ ପଠା ଯାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଏଣୁ ଜିଲାପାଳ ତୁରନ୍ତ ପଦକ୍ଷେପ ନେବା ନିମନ୍ତେ ସ୍ଥାନୀୟ ବୁଦ୍ଧିଜୀବୀ ମହଲରେ ଦାବି ହେଉଛି।
