ଜୟପୁର,୧୩ ।୩: ରାଜସ୍ଥାନରେ ଚଳିତ ବର୍ଷ ଶେଷ ବେଳକୁ ହେବାକୁ ଯାଉଛି ବିଧାନସଭା ନିର୍ବାଚନ । ଏଥର ଭାଜପା ଓ କଂଗ୍ରେସକୁ ଟକ୍କର ଦେବାକୁ ମଇଦାନକୁ ଓହ୍ଲାଇଛି ଆମ ଆଦମୀ ପାର୍ଟି(ଏଏପି) । ଏଏପିର ରାଷ୍ଟ୍ରୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ସୋମବାର ଜୟପୁର ପହଞ୍ଚିଛନ୍ତି । ଅରବିନ୍ଦ କେଜରିୱାଲ ପଞ୍ଜାବ ମୁଖ୍ୟମନ୍ତ୍ରୀ ଭାଗବତ ମାନଙ୍କ ସହ ରାଜସ୍ଥାନର ରାଜଧାନୀରେ ନିର୍ବାଚନର ଶଙ୍ଖ ଫୁଙ୍କିଛନ୍ତି । ଏହାସହ ସୋମବାର ଏଏପିର ତ୍ରିରଙ୍ଗା ଯାତ୍ରା ବି ଆରମ୍ଭ ହୋଇଛି ।
ଏହି ସମୟରେ କେଜରିୱାଲ ଶାସକ କଂଗ୍ରେସ ଓ ଭାଜପାକୁ ଟାର୍ଗେଟ କରିଛନ୍ତି । ସେ କହିଛନ୍ତି ରାଜସ୍ଥାନରେ ଡିସେମ୍ବରରେ ବିଧାନସଭା ନିର୍ବାଚନ ହେବାକୁ ଯାଉଛି । କେଜରିୱାଲ କହିଛନ୍ତି, କଂଗ୍ରେସ ଓ ଭାଜପା ମିଶି ରାଜସ୍ଥାନକୁ କବାଡି କରିଦେଇଛନ୍ତି । ସେମାନେ ଏହା କହିପାରିବେ ନାହିଁ କି ସେମାନଙ୍କୁ ସୁଯୋଗ ଦିଆଯାଇ ନାହିଁ । ସେଥିପାଇଁ ଏବେ ଆମ ଆଦମୀ ପାର୍ଟି ନିର୍ବାଚନ ମଇଦାନକୁ ଓହ୍ଲାଇଛି ।
କେଜରିୱାଲ ରାଜସ୍ଥାନବାସୀଙ୍କୁ କହିଛନ୍ତି, କିଛି ସମୟ ଅପେକ୍ଷା କରନ୍ତୁ ସମସ୍ତ ଚେହେରା ସାମ୍ନାକୁ ଆସିଯିବ । ଆମ ଆଦମୀ ପାର୍ଟି ସହ ସବୁ ଭଲ ଲୋକ ଯୋଡି ହେଉଛନ୍ତି । ଏଏପି ସବୁ ଆସନରେ ନିର୍ବାଚନ ଲଢିବ ।
