ଉମରକୋଟ,୧୬ା୪(ସ୍ବ.ପ୍ର.): ବନ ବିଭାଗ ଅଧିକାରୀ ଟଙ୍କା ନେଉଥିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହାକୁ ନେଇ ବିଭାଗୀୟ ଅଧିକାରୀଙ୍କ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ।
ଉମରକୋଟ ବନାଞ୍ଚଳ ସିଂସାରି ବିଟ୍ ଅଧିନରେ ଦନ୍ଦୀବେଡା ଗ୍ରାମର ଜଣେ ବ୍ୟକ୍ତିିଙ୍କ କୁଡ଼ିଆ ଘର କାନ୍ଥକୁ ଲାଗି ଏକ ଗଛ ରହିଥିଲା । ବର୍ଷା ପବନରେ ତାହା ଘର ଉପରେ ପଡିଯିବା ଭୟ ଥିବାରୁ ସେ ଉକ୍ତ ଗଛ କାଟି ଦେଇଥିଲେ। କାଠ ସବୁ ନିଜେ କରିଥିବା ଇଟା ଭାଟିରେ ବ୍ୟବହାର କରିଥିଲେ। ଏହି ଖବର କାର୍ଯ୍ୟରତ ବନପାଳ କାମାକ୍ଷା ପ୍ରସାଦ ସ୍ବାଇଁ ଜାଣିବା ପରେ ସମ୍ପୃକ୍ତ ବ୍ୟକ୍ତିଙ୍କୁ ସିଂସାରି କାର୍ଯ୍ୟାଳୟକୁ ଡକାଇ କେସ ବାବଦକୁ ୩୦୦୦ ଟଙ୍କା ପୈଠ କରିବାକୁ କହିଥିଲେ । ଉକ୍ତ ଭିଡିଓରେ ବ୍ୟକ୍ତି ଜଣକ ଅଧିକାରୀଙ୍କ ସମ୍ମୁଖରେ ଅନେକ ନେହୁରା ହେବା ପରେ ବନପାଳ ସ୍ବାଇଁ ୨୦୦୦ଟଙ୍କାରେ ରାଜି ହେବାରୁ ବ୍ୟକ୍ତି ଜଣକ ତାହା ଦେଇଥିଲେ। ଟଙ୍କା ନେବା ସମୟର ସମସ୍ତ ବର୍ତ୍ତାଳାପ ଓ ବାର୍ତ୍ତାର ଭିଡିଓ ସାମାଜିକ ଗଣ ମାଧ୍ୟମରେ ଘୁରି ବୁଲୁଛି। ଘଟଣାକୁ ନେଇ ଜିଲା ବନାଞ୍ଚଳ ଅଧିକାରୀଙ୍କୁ ପଚାରିବାରୁ ଏ ବିଷୟରେ ସେ ଜାଣିନାହାନ୍ତି, ଉମରକୋଟ ରେଞ୍ଜରଙ୍କ ସହ କଥା ହେବାକୁ କହିଥିଲେ। ରେଞ୍ଜର ଅସିତ କୁମାର ସାହୁଙ୍କୁ ପଚାରିବାରୁ ସେ କହିଥିଲେ ଜଣେ ଫରେଷ୍ଟର କୋଡ଼ିଏ ହଜାର ଯାଏ ଫାଇନ ଆଦାୟ କରିବା କ୍ଷମତା ରହିଛି ବୋଲି କହିଥିଲେ। ତେଣୁ ସେ ଟଙ୍କା ଆଦାୟ କରିଛନ୍ତି । ଏହି ଭିଡିଓଟି ଏକ ବର୍ଷ ତଳର। ବନପାଳ ସ୍ବାଇଁଙ୍କୁ ବଦନାମ କରିବାକୁ ଏହି ଭଳି ପ୍ରୟାସ କରାଯାଉଛି ବୋଲି ରେଞ୍ଜର ସୂଚନା ଦେଇଥିଲେ। ଅନ୍ୟପଟେ ଏକ ବର୍ଷ ପରେ ଭିଡିଓ ଭାଇରାଲ ହେବା ଦେଖି ବନପାଳ ସ୍ବାଇଁ ଓ କିଛି ଅନୁଗତ କର୍ମଚାରୀ ଗତ ୨ ତାରଖରେ ୨୦୦୦ ଟଙ୍କାର ଏକ ରସିଦ କାଟିଥିଲେ। କିଛିଦିନ ପରେ ରାତି ଅଧରେ ସମ୍ପୃକ୍ତ ବ୍ୟକ୍ତିଙ୍କୁ ରସିଦ ଦେଇ ଆସିଥିଲେ। ଘଟଣାଟି ପଦାକୁ ଆସିବାରୁ ଅଧିକାରୀମାନେ ଚଳିତ ମାସରେ ରସିଦ କାଟିଥିବା ଜଣାପଡିଛି। ଅନ୍ୟପଟେ ବନ ବିଭାଗର ନିୟମ ଅନୁଯାୟୀ ଯେ କୌଣସି ଅପରାଧିକ ମାମଲା ହେଲେ ପ୍ରଥମେ ଅଫେନ୍ସ ରେଜିଷ୍ଟରରେ ଲେଖା ଯାଇଥାଏ ଓ ପରେ ସେହି ମାମଲାରେ ରସିଦ କଟା ଯାଇଥାଏ। ଉକ୍ତ କେସରେ ନିୟମକୁ ପାଳନ କରାଯାଇ ନାହିଁ। ଯାହା ଫଳରେ ରସିଦ କଟାଯାଇଥିବା ବିଷୟ ରେଞ୍ଜର ମଧ୍ୟ ଜାଣି ନାହାନ୍ତି। ଅପରପକ୍ଷେ ଏ ନେଇ ବନପାଳ ସ୍ବାଇଁଙ୍କୁ ପଚାରିବାରୁ ଗାର୍ଡ ଜଣଙ୍କ ମୋତେ ଟଙ୍କା ଦେଇନଥିଲେ, କିଛିଦିନ ତଳେ ଦେଲେ। ତେଣୁ ଏବେ ରସିଦ କଟାଯାଇଛି ବୋଲି କହିଛନ୍ତି।
