ଆଳି,୧୬।୪(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ଆଳି ଥାନା ଅନ୍ତର୍ଗତ ସହିରା ଗ୍ରାମରେ ପୂର୍ବ ଶତ୍ରୁତାକୁ କେନ୍ଦ୍ର କରି ଶୁକ୍ରବାର ବିଳମ୍ବିତ ରାତିରେ ଏକ ହତ୍ୟାକାଣ୍ଡ ଘଟିଛି ା ମୃତକଙ୍କ ଶାଳକ ବି ଭୁଜାଲି ମାଡ଼ରେ ଗୁରୁତର ହୋଇଛନ୍ତି। ତାଙ୍କୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି ା ଏହି ଘଟଣାକୁ ନେଇ ସହିରା ଗ୍ରାମରେ ଚାପା ଉତ୍ତେଜନା ପ୍ରକାଶ ପାଇଛି। ମୃତକ ହେଲେ ଅମିତ ପାତ୍ର ା ଆହତ ଶାଳକ ହେଲେ ସଞ୍ଜୟ ଜେନା ା ପୋଲିସ ଉକ୍ତ ଘଟଣାର ତନାଘନା ଆରମ୍ଭ କରିଛି ା
ମୃତ ଅମିତଙ୍କ ଦାଦା ମନୋରଞ୍ଜନ ପାତ୍ର ଆଳି ଥାନାରେ କରିଥିବା ଅଭିଯୋଗ ଅନୁଯାୟୀ, ଶୁକ୍ରବାର ରାତିରେ ଦହିଅଣ୍ଟା ଗ୍ରାମରେ ଭାଗବତ ପାରାୟଣ ସପ୍ତାହ ଅନୁଷ୍ଠିତ ହେଉଥିଲା। ସେଠାକୁ ଭୋଜି ଖାଇବାକୁ ଅମିତ ଓ ତାଙ୍କ ଶାଳକ ସଞ୍ଜୟ ଯାଇଥିଲେ l ରାତି ପ୍ରାୟ ୧୧.୩୦ ସମୟରେ ସେମାନେ ଘରକୁ ଫେରୁଥିବା ବେଳେ ଦହିଅଣ୍ଟା ଛକରେ ଅମିତଙ୍କ ସହିତ ରଶ୍ମିରଞ୍ଜନ ରାଉଳଙ୍କ ବଚସା ହୋଇଥିଲା ା ଧୀରେ ଧୀରେ ତାହା ଉଗ୍ରରୂପ ଧାରଣ କରିଥିଲା ା ଏଥିରେ ଉତ୍ତେଜିତ ହୋଇ ରଶ୍ମିରଞ୍ଜନ ଅମିତଙ୍କୁ ଭୁଜାଲିରେ ଆକ୍ରମଣ କରିଥିଲେ। ଅମିତଙ୍କୁ ରକ୍ଷା କରିବାକୁ ଯାଇ ସଞ୍ଜୟ ବି ଭୁଜାଲି ମାଡ଼ରେ ଗୁରୁତର ହୋଇଛନ୍ତି। ଖବର ପାଇ ପରିବାର ଲୋକେ ଅମିତ ଓ ସଞ୍ଜୟଙ୍କୁ ପଟ୍ଟାମୁଣ୍ଡାଇ ମେଡିକାଲରେ ଭର୍ତ୍ତି କରିଥିଲେ ା ହେଲେ ଡାକ୍ତର ଅମିତଙ୍କୁ ମୃତ ଘୋଷଣା କରିଥିଲେ ା ସଞ୍ଜୟଙ୍କୁ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଛି l ମନୋରଞ୍ଜନ ତାଙ୍କ ପୁତୁରା ହତ୍ୟା ଘଟଣାରେ ରଶ୍ମିରଞ୍ଜନ ରାଉଳ, ମନୋରଞ୍ଜନ ରାଉଳ ଓ ଦେବାଶିଷ ଦାଶଙ୍କ ନାମରେ ଥାନାରେ ଏତଲା ଦେଇଛନ୍ତି l ଏଥିସହିତ ସେ ଏତଲାରେ ଦର୍ଶାଇଛନ୍ତି, ରଶ୍ମିରଞ୍ଜନ ବର୍ଷେ ହେବ ନିଜ ପାଖରେ ମାରଣସ୍ତ୍ର ରଖି ବିଭିନ୍ନ ଲୋକଙ୍କୁ ଧମକଚମକ ଦେଇ ଆସୁଥିଲେ ା ଏ ସଂକ୍ରାନ୍ତରେ ଏକ ମାମଲା(ନଂ.୩୬୮/୨୩) ରୁଜୁ ହୋଇଛି। ପୋଲିସ ତଦନ୍ତ ଜାରି ରଖିଛି। ପୋଲିସ ଜଣଙ୍କୁ ଅଟକ ରଖି ପଚରଉଚରା ଜାରି ରଖିଥିବା ପଟ୍ଟାମୁଣ୍ଡାଇ ଏସ୍ଡିପିଓ ସାରାଣୀ ବେହୁରା ସୂଚନା ଦେଇଛନ୍ତି। ଏହି ହତ୍ୟାକାଣ୍ଡ ପଛରେ ରାଜନୈତିକ ଶତ୍ରୁତା ଥିବା ଆଲୋଚନା ହେଉଛି ା
