କେସିଙ୍ଗା,୧୩।୧୦(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ବାଲସି ଗ୍ରାମସ୍ଥିତ ନବନିର୍ମିତ ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ର ନିର୍ମାଣ ହୋଇ ଦେଢ଼ ବର୍ଷ ହେଲା ବିତିଗଲାଣି। ବର୍ତ୍ତମାନ ସୁଦ୍ଧା ଉଦଘାଟନ ହୋଇ ନ ଥିବାରୁ କାର୍ଯ୍ୟକ୍ଷମ ହେଉନି। ଫଳରେ ରୋଗୀ ସେବାରେ ଘୋର ସମସ୍ୟା ହେଉଛିି। ଦୀର୍ଘ ୧୫ବର୍ଷରୁ ଊର୍ଦ୍ଧ୍ୱ ହେଲା ଜଣେ ମହିଳା ସ୍ବାସ୍ଥ୍ୟ କର୍ମୀ ରହି ଆସୁଛନ୍ତି। ଯେଉଁ ବିଲ୍ଡିଂଗରେ ସ୍ବାସ୍ଥ୍ୟ ମହିଳା କର୍ମୀ ରହୁଥିଲେ, ଉକ୍ତ ବିଲ୍ଡିଂଗ ଭାଙ୍ଗି ଯାଇ ନଷ୍ଟ ହେବାରୁ ନୂତନ ଭାବେ ୨୮ ଲକ୍ଷ ବ୍ୟୟ ଅଟକଳରେ ଆରୋଗ୍ୟ ସ୍ବାସ୍ଥ୍ୟକେନ୍ଦ୍ର ନିର୍ମାଣ ହୋଇଛି। ବର୍ତ୍ତମାନ ଦେଢ଼ ବର୍ଷ ହେଲା ଉକ୍ତ ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ର ଉଦଘାଟନ ହୋଇନାହିଁ। କିନ୍ତୁ ମହିଳା ସ୍ବାସ୍ଥ୍ୟ କର୍ମୀଙ୍କ ଗୃହ ଭାଙ୍ଗିଯିବାରୁ ସେହି ଉପଲକ୍ଷେ ଏହି ବିଲ୍ଡିଂଗ ନିର୍ମାଣ କରାଯାଇଛି। ବାଲସିରେ ଗତବର୍ଷ ନୂତନ ଭାବେ ଜଣେ ଗୋଷ୍ଠୀ ସ୍ବାସ୍ଥ୍ୟ ଅଧିକାରିଣୀ ସୀମା ପୁଟେଲଙ୍କୁ ନିଯୁକ୍ତି ଦିଆଯାଇଛି। ଅସ୍ଥାୟୀ ଭାବେ ହୋମଓପ୍ୟାଥିକ ହସ୍ପିଟାଲରେ କାମ କରି ଆସୁଛନ୍ତି। କିନ୍ତୁ ଗୋଷ୍ଠୀ ସ୍ବାସ୍ଥ୍ୟ ଅଧିକାରିଣୀ କେସିଙ୍ଗାରୁ ବାଲସିକୁ ଯିବାଆସିବା କରନ୍ତି। ଯେଉଁ ଦିନ ଆସନ୍ତି ପୂର୍ବାହ୍ନ ୧୧ଟାରେ ଆସି ୧ଟା ଯାଏ ପୁଣି ଫେରି ଯାଆନ୍ତି। ଗତ ମାସରେ ନୂଆଁଖାଇ ଥିବାରୁ ୪ଦିନ ଆସିଥିଲେ। ପ୍ରତ୍ୟେକ ମାସରେ ୫ରୁ୧୦ ଦିନ ଆସିଥାନ୍ତି। ଗ୍ରାମାଞ୍ଚଳରେ ରୋଗୀମାନେ ଘୋର ଅସୁବିଧାର ସମ୍ମୁଖୀନ ଭୋଗୁଛନ୍ତି। ଏହି ନୂତନ ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ର ଏହି ଦୁଇ ଜଣ କର୍ମଚାରୀଙ୍କ ମଧ୍ୟରେ କାହା ପାଇଁ ଉଦ୍ଦିଷ୍ଟ ତାହା ପ୍ରଶ୍ନବାଚୀ ସୃଷ୍ଟି କରିଛି। ଗ୍ରାମବାସୀ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କୁ ଅଭିଯୋଗ କରିଛନ୍ତି। ଗୋଷ୍ଠୀ ସ୍ବାସ୍ଥ୍ୟ ଅଧିକାରିଣୀଙ୍କୁ ତୁରନ୍ତ ବଦଳି କରିବାକୁ ଦାବି ହେଉଛି। ଏ ନେଇ ଜିଲା ମୁଖ୍ୟ ଚିକିତ୍ସ ଅଧିକାରୀ ନିହାର ରଞ୍ଜନ ପଣ୍ଡାଙ୍କୁ ପଚାରିବାରୁ ତଦନ୍ତ କରିବି, ଅଳ୍ପ ଦିନରେ ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ର ଉଦ୍ଘାଟନ କରାଯିବ ବୋଲି ପ୍ରକାଶ କରିଥିଲେ।
