‘ଗୁରୁଙ୍କୁ ନ ମଣିବ ନର, ଗୁରୁ ଯେ ସାକ୍ଷାତ୍ ଈଶ୍ୱର’। ଶିକ୍ଷକ ସମାଜ ଉଦ୍ଦେଶ୍ୟରେ ଉଲ୍ଲେଖଥିବା ଏହି ଆପ୍ତବାକ୍ୟ ହିଁ ସେମାନଙ୍କ ଦାୟିତ୍ୱ, କର୍ତ୍ତବ୍ୟ ଏବଂ ସ୍ଥାନକୁ ସମାଜରେ ପ୍ରତିପାଦିତ କରେ। ଅଜ୍ଞାନରୂପକ ଅନ୍ଧାରରୁ ଜ୍ଞାନର ଆଲୋକ ମାର୍ଗ ଦେଖାଇଥିବା ଗୁରୁଙ୍କ ପାଇଁ ଭାରତୀୟ ସଂସ୍କୃତି, ପରମ୍ପରା, ଶାସ୍ତ୍ରରେ ରହିଛି ସ୍ବତନ୍ତ୍ର ସ୍ଥାନ। ତାଙ୍କୁ ଈଶ୍ୱରଙ୍କ ସହ କରାଯାଇଛି ତୁଳନା। ହେଲେ ପରିବର୍ତ୍ତିତ ସମୟରେ ପୂଜ୍ୟପୂଜାର ଏହି ପରମ୍ପରା ଦୋହଲିବା ଆରମ୍ଭ କଲାଣି। ଏଭଳି ମହନୀୟ ସମ୍ପର୍କରେ ଲାଗୁଛି କଳାଦାଗ, ଯାହା ପାଲଟୁଛି ଖବରର ଶିରୋନାମା। ପୂର୍ବତନ ରାଷ୍ଟ୍ରପତି ଡ. ସର୍ବପଲ୍ଲୀ ରାଧାକ୍ରିଷ୍ଣନ୍ଙ୍କ ଜୟନ୍ତୀ ଉପଲକ୍ଷେ ସାରା ଦେଶରେ ସେପ୍ଟେମ୍ବର ୫କୁ ଗୁରୁଦିବସ ଭାବେ ପାଳନ କରାଯାଉଥିବାବେଳେ ଗୁରୁ-ଶିଷ୍ୟର ମହନୀୟ ପରମ୍ପରାକୁ ଉଜ୍ଜୀବିତ କରିବା ପାଇଁ ଆସିଛି ଅବସର। ଏହି ଉପଲକ୍ଷେ ବିଭିନ୍ନ କ୍ଷେତ୍ରରେ ପ୍ରତିଷ୍ଠିତ ଗୁରୁଙ୍କ ମତକୁ ନେଇ ଏହି ଉପସ୍ଥାପନା….
ଛାତ୍ରୀଛାତ୍ରଙ୍କୁ ବାଦ୍ଦେଲେ ଗୁରୁ ମୂଲ୍ୟହୀନ
ଛାତ୍ରୀଛାତ୍ର ଶିକ୍ଷା ଗ୍ରହଣ କରି ଯେତେ ଉପରକୁ ଯିବେ, ସେହି ଅନୁଷ୍ଠାନ ଓ ସେହି ଗୁରୁଙ୍କ ମର୍ଯ୍ୟାଦା ସେତିକି ବୃଦ୍ଧି ପାଇବ। ଯେମିତି ପାଣି ବିନା ମାଛର ଜୀବନ ମୂଲ୍ୟହୀନ ଠିକ୍ ସେହିପରି ଶିଷ୍ୟ ବିନା ଗୁରୁ। ଗୁରୁ-ଶିଷ୍ୟ ଯେତେ ନିକଟତର ସେଠାରେ ଛାତ୍ର ସେତେ ସଫଳ। ଏହି ସମ୍ପର୍କ ଅତୁଟ ରହିଲେ ସମାଜର ମଙ୍ଗଳ ସାଧିତ ହେବ।
-ଡ. ସୁରେଶ ମିଶ୍ର, ଅଧ୍ୟକ୍ଷ, ଇ-ଟେକ୍ ଆବାସିକ ଉଚ୍ଚ ମାଧ୍ୟମିକ ବିଦ୍ୟାଳୟ
ସମ୍ପର୍କ ପାଠପଢ଼ାରେ ସୀମିତ ନ ରହୁ
ମା’ବାପା ସନ୍ତାନଙ୍କୁ ଜନ୍ମ ଦିଅନ୍ତି ସତ, ହେଲେ କିଭଳି ସମାଜରେ ଆଦର୍ଶ ହୋଇପାରିବ ସେ କଥା ଶିଖାଇଥାନ୍ତି ଗୁରୁ। କହିବାକୁ ଗଲେ ଶିକ୍ଷକ ହେଉଛନ୍ତି ମଣିଷ ଗଢ଼ା କାରଖାନା। ତେଣୁ ଏହି ମହନୀୟ ସମ୍ପର୍କ କେବଳ ପାଠପଢ଼ା ମଧ୍ୟରେ ସୀମିତ ରହିବା ଅନୁଚିତ। ଏହା ବ୍ୟାପକ ହେବା ମଧ୍ୟ ସେତିକି ଜରୁରୀ।
-ପ୍ରଫେସର ଡ.ଶ୍ରୀନିବାସ ସେଠୀ, କମ୍ପ୍ୟୁଟର ବିଭାଗ ମୁଖ୍ୟ, ଆଇଜିଆଇଟି
ଗୁରୁ ବି ଏକଦା ଶିଷ୍ୟ ଥିଲେ
ଶିଷ୍ୟ ହିଁ ଗୁରୁଙ୍କ ମର୍ଯ୍ୟାଦା ବୃଦ୍ଧି କରିଥାଆନ୍ତି। ଜଣେ ବ୍ୟକ୍ତି ଯେଉଁ ବିଭାଗରେ ଦକ୍ଷ ହୁଅନ୍ତୁ ନା କାହିଁକି, ସେ ଗୁରୁଙ୍କୁ ଭୁଲିଯିବା ଅନୁଚିତ। ଏକଥା ବି ଶିକ୍ଷକ ମନେ ରଖିବା ଉଚିତ ଯେ, ସେ ବି ଏକଦା ଶିଷ୍ୟ ଥିଲେ। ଏବର ଶିଷ୍ୟ ଭବିଷ୍ୟତରେ ଗୁରୁ ହେବାର ସମ୍ଭାବନାକୁ ଏଡ଼ାଇ ଦିଆଯାଇ ନ ପାରେ।
-ଶ୍ରୀରାମ କୁମାର ରାଉତ, ପ୍ରଧାନ ଶିକ୍ଷକ, କାନପୁରା ପଞ୍ଚାୟତିରାଜ ହାଇସ୍କୁଲ
ମାର୍ଗଦର୍ଶନରେ ଆନନ୍ଦ ମିଳେ
ଭାରତୀୟ ସାମାଜିକ ବ୍ୟବସ୍ଥାରେ ଗୁରୁଙ୍କ ସ୍ଥାନ ସର୍ବଦା ଉଚ୍ଚରେ। ଶିଷ୍ୟଙ୍କୁ ଭଲ ଦିଗ ଦେଖାଇବା, ଚରିତ୍ର ଗଠନ କରିବା ଗୁରୁଙ୍କ ପାଇଁ ବଡ ଆହ୍ବାନ। ଗୁରୁଦିବସରେ କେବଳ ଗୁରୁ ପୂଜା ପାଇ ନ ଥାନ୍ତି, ଶିଷ୍ୟଙ୍କ ମାର୍ଗଦର୍ଶନ ମଧ୍ୟ କରିଥାଆନ୍ତି। ଏଥିରେ ଯେଉଁ ଆନନ୍ଦ ମିଳେ, ତାହାକୁ ଭାଷାରେ ବର୍ଣ୍ଣନା କରିହେବନାହିଁ।
-ଚିତ୍ତରଞ୍ଜନ ଦାଶ, ଅଧ୍ୟକ୍ଷ, ମଠକରଗୋଳା କଲେଜ
ରିପୋର୍ଟ: ସୁଧୀର ପରିଡ଼ା, କାମାକ୍ଷାନଗର
