ଭୁବନେଶ୍ୱର,୩ା୮(ବ୍ୟୁରୋ): ରାଜଧାନୀରେ ଖୋଲିଲା ଶପିଂ ମଲ୍। ରବିବାର ଲକ୍ଡାଉନ୍ ସତ୍ତ୍ୱେ ପୂର୍ବାହ୍ନରୁ ଅପରାହ୍ନ ୧ଟା ଯାଏ ମଲ୍ ଖୋଲିଛି। ପ୍ରଥମ ଦିନରେ ମଲ୍ରେ ପୂର୍ବପେକ୍ଷା ଭିଡ଼ କମ୍ ରହିଥିଲା। ପ୍ରାୟ ୫ ମାସ ପରେ ମଲ୍ଟି ବ୍ରାଣ୍ଡ ମଲ୍ ଖୋଲିବା ପରେ ଗ୍ରାହକମାନେ ମଲ୍ଗୁଡ଼ିକୁ ଯାଇ ବିଭିନ୍ନ ସାମଗ୍ରୀ କିଣା କିଣି କରିଥିବା ଦେଖିବାକୁ ମିଳିଥିଲା। ମଲ୍କୁ ପ୍ରବେଶ ପୂର୍ବରୁ ଗ୍ରାହକମାନେ ସାମାଜିକ ଦୂରତ୍ୱ ରକ୍ଷା କରି ମଲ୍ ସମ୍ମୁଖରେ ବୃତ୍ତ ଚିହ୍ନିତ ସ୍ଥାନରେ ଛିଡ଼ା ହେବା ସହ ହାତକୁ ସାନିଟାଇଜ କରୁଥିଲେ। ମଲ୍ ଫାଟକ ନିକଟରେ ସେମାନଙ୍କ ଥର୍ମାଲ ସ୍କ୍ରିନିିଂ କରାଯାଇଥିଲା। ଯେଉଁ ଗ୍ରାହକଙ୍କର ଫ୍ଲୁ ପରି କୌଣସି ପ୍ରକାର ଲକ୍ଷଣ ଦେଖାଦେଇଥିଲା କିମ୍ବା ତାପମାତ୍ରା ଅଧିକ ଥିଲା ସେମାନଙ୍କୁ ମଲ୍ ଭିତରକୁ ପ୍ରବେଶ କରିବାକୁ ଅନୁମତି ମିଳି ନ ଥିଲା।
ଦୋକାନ ବଜାର ଏବଂ ଗୋଟିକିଆ ମଲ୍ ଖୋଲିବା ପାଇଁ ପୂର୍ବରୁ ବିଏମ୍ସି ଅନୁମତି ଦେଇଥିଲା। କିନ୍ତୁ ମଲ୍ଟିବ୍ରାଣ୍ଡ ଶପିଂ ମଲ ଖୋଲିବାକୁ ଅନୁମତି ନ ଥିଲା। ତେବେ ଅନୁମତି ପରେ ରବିବାର ୟୁନିଟ୍-୨ ମାର୍କେଟ ବିଲ୍ଡିଂସ୍ଥିତ ବିଗ୍ ବଜାର, ବିଶାଳ ମେଗା ମାର୍ଟ, ଫ୍ୟାଶନ ସିଟି ଆଦି ଅନେକ ମଲ୍ କୋଭିଡ୍-୧୯ ନିୟମାବଳୀ ଅନୁପାଳନ କରି ଖୋଲିଥିଲା। ତେବେ ରସୁଲଗଡର ଏସ୍ପ୍ଲାନେଡ୍, ସତ୍ୟନଗରର ଫୋରମ୍ ମାର୍ଟ, ଶହୀଦନଗରର ବିଏମ୍ସି ଭବାନୀ ମଲ୍, ପାଣ୍ଟାଲୁନସ୍, ସେଣ୍ଟ୍ରାଲ୍, ରେଳ ଷ୍ଟେଶନ ନିକଟ ରିଲାଏନ୍ସ ସୁପର, କଳ୍ପନାଛକର ଉକତ୍ଳ ଗାଲେରିୟା, ୟୁନିଟ୍-୨ ମାର୍କେଟ ବିଲ୍ଡିଂସ୍ଥିତ ବିଏମ୍ସି କେଶରୀ ମଲ, ରୁଦ୍ରପୁରସ୍ଥିତ ସିଫୋନି ମଲ୍, ନୟାପଲ୍ଲୀର କ୍ରିଷ୍ଣା ପ୍ଲାଜା ଏବଂ ପାତ୍ରପଡ଼ାର ଡିଏନ୍ ରେଗାଲିୟା ଆଦି ମଲ୍ ଅନୁମତି ପାଇ ନ ଥିବାରୁ ବନ୍ଦ ରହିଥିଲା। କେତେକ ମଲ୍ରେ ରାଶନକୁ ଛାଡ଼ି ଅନ୍ୟ ସମସ୍ତ ଷ୍ଟୋର ବନ୍ଦ ରହିଥିଲା। ଯେଉଁମାନଙ୍କର ଅନ୍ଲାଇନ୍ ବ୍ୟବସ୍ଥା ଥିଲା, ସେମାନେ କେବଳ ଅନ୍ଲାଇନ୍ ଡେଲିଭରି ପାଇଁ ମଲ୍ ଖୋଲିଥିଲେ ମଧ୍ୟ ଗ୍ରାହକଙ୍କୁ ପ୍ରବେଶ ଅନୁମତି ନ ଥିଲା। ଶନିବାର ଶପିଂ ମଲ୍ଗୁଡ଼ିକ ପାଇଁ ବିଏମ୍ସି ନୂତନ ଏସ୍ଓପି ଜାରି କରିବାରୁ ମଲ୍ଟି ବ୍ରାଣ୍ଡ ମଲ୍ ଖୋଲିବା ପାଇଁ ବାଟ ଫିଟିଥିଲା। ଏ ନେଇ ବିଏମ୍ସି କମିଶନର ପ୍ରେମ୍ଚନ୍ଦ୍ର ଚୌଧାରୀ କହିଛନ୍ତି, ରାଜ୍ୟ ସରକାରଙ୍କ ନୂତନ କଟକଣାରେ ଶପିଂ ମଲ୍ ବନ୍ଦ ହେବାର ବ୍ୟବସ୍ଥା ନାହିଁ। ଏଥିପାଇଁ ବିଏମ୍ସି ଶପିଂ ମଲଗୁଡ଼ିକ ନିମନ୍ତେ ନୂତନ ଏସ୍ଓପି ଜାରି କରିଛି। ଯେଉଁ ମଲ୍ ଚାହିଁବ ଏସ୍ଓପି ଅନୁପାଳନ କରି ଖୋଲିପାରିବ। ଏସ୍ଓପି ସର୍ତ୍ତାବଳୀ ଉଲ୍ଲଘଂନ କଲେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ।
