ନୂଆଦିଲ୍ଲୀ,୧୩।୧୨ : କେନ୍ଦ୍ର ସରକାର ମଙ୍ଗଳବାର ସୁପ୍ରିମକୋର୍ଟଙ୍କୁ କହିଛନ୍ତି ଯେ ୨୪୬ ମହିଳା ସେନା ଅଧିକାରୀଙ୍କ ପଦୋନ୍ନତି ପାଇଁ ଏକ ସ୍ବତନ୍ତ୍ର ଚୟନ ବୋର୍ଡ ଗଠନ କରାଯାଇଛି। ବୋର୍ଡ ଜାନୁଆରୀ ୯ ରେ ଏହି ପ୍ରସଙ୍ଗ ଉପରେ ବିଚାର କରିବ। ବାବିତା ପୁଣିଆଙ୍କ ମାମଲାର ବିଚାରରେ କୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ ମହିଳା ଅଧିକାରୀଙ୍କ ପଦୋନ୍ନତି କାର୍ଯ୍ୟକାରୀ ହେଉନାହିଁ ବୋଲି ୩୪ ମହିଳା ସେନା ଅଧିକାରୀଙ୍କ ଏକ ଆବେଦନ ଉପରେ ସର୍ବୋଚ୍ଚ ନ୍ୟାୟାଳୟ ଶୁଣାଣି କରୁଛନ୍ତି।
ଭାରତୀୟ ସେନାର ପରାମର୍ଶଦାତା ଆର ବାଲାସୁବ୍ରମଣ୍ୟନ ପ୍ରଧାନ ବିଚାରପତି ଡ.ଓ୍ବାଇ. ଚନ୍ଦ୍ରଚୂଡ଼ ଏବଂ ଜଷ୍ଟିସ ପି.ଏସ. ନରସିଂହଙ୍କ ନେନୃତ୍ୱରେ ଗଠିତ ଏକ ବେଞ୍ଚକୁ କହିଛନ୍ତି ଯେ ୯ ଜାନୁୟାରୀ ୨୦୨୩ ରେ ଏହାର ବିଚାର କରାଯିବ। ବେଞ୍ଚ ବୋର୍ଡର ପରିଣାମକୁ ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ। ଜାନୁଆରୀ ୩୦ରେ ଏହାର ପରବର୍ତ୍ତୀ ଶୁଣାଣି ହେବ।
ଆଡଭୋକେଟ ରାକେଶ କୁମାରଙ୍କ ମାଧ୍ୟମରେ ଦାଖଲ ହୋଇଥିବା ଏହି ଆବେଦନରେ ଦର୍ଶାଯାଇଛି ଯେ ଏହା ସମ୍ପୂର୍ଣ୍ଣ ଅନୁଚିତ, ମନମୁଖୀ କାର୍ଯ୍ୟ ଏବଂ ବରିଷ୍ଠ ମହିଳା ଅଧିକାରୀଙ୍କ ପ୍ରତି ଅସମ୍ମାନ। ତାଙ୍କର ପଦୋନ୍ନତିକୁ ରୋକା ଗଲା ଏବଂ କେନ୍ଦ୍ର ସରକାର କନିଷ୍ଠ ପୁରୁଷ ଅଧିକାରୀଙ୍କୁ କଲୋନେଲ ପଦରେ ଉନ୍ନୀତ କଲେ।
ପୁରୁଷ ଅଧିକାରୀଙ୍କ ସହ ଯୋଗ୍ୟ ମହିଳା ଅଧିକାରୀଙ୍କ ପଦୋନ୍ନତି ପାଇଁ ଆବେଦନକାରୀମାନେ ତୁରନ୍ତ ଚୟନ ବୋର୍ଡ ଗଠନ ଲାଗି ଦାବି କରିଥିଲେ। ସେମାନେ କହିଥିଲେ ଯେ ତାଙ୍କର ଜୁନିୟର ଅଧିକାରୀଭାବେ ପଦୋନ୍ନତି ଉପରେ ବିଚାର କରାଯାଉ। ଆବେଦନକାରୀ ମହିଳା ଅଧିକାରୀ ମଧ୍ୟ କୋର୍ଟରୁ ପ୍ରକ୍ରିୟା ସ୍ଥଗିତ ରଖିବାକୁ ଦାବି କରିଥିଲେ।
