ଜର୍ମାନୀର ୬୩ ବର୍ଷୀୟ ମାର୍କ ବ୍ରାୟନ୍। ପେସାରେ ଜଣେ ରୋବୋଟିକ୍ ଇଞ୍ଜିନିୟର। ବଳିଷ୍ଠ ଶରୀର। ଦେଖିବାକୁ ବେଶ୍ ହ୍ୟାଣ୍ଡସମ୍ ଓ ସ୍ମାର୍ଟ। ହେଲେ ଅଫିସ୍କୁ ଗଲାବେଳେ ତାଙ୍କ ବ୍ୟକ୍ତିତ୍ୱ ବଦଳିଯାଏ। କାରଣ ଅଫିସ୍ ଲାଗି ରେଡି ହେବାବେଳେ ସେ ଆଲମାରୀରୁ ବାହାର କରନ୍ତି ତାଙ୍କର ସାର୍ଟ, ବ୍ଲେଜର୍ ଓ ସୁନ୍ଦର ସୁନ୍ଦର ଷ୍ଟାଇଲିସ୍ ସ୍କର୍ଟ। କେବେ ସେ ସାର୍ଟ ଉପରେ ବ୍ଲେଜର୍ ପିନ୍ଧି ତା’ସହ ସ୍କର୍ଟକୁ ପେୟାର୍ କରନ୍ତି ତ କେବେ ସେ ସାର୍ଟ ସହ ସ୍କର୍ଟ ପିନ୍ଧନ୍ତି। ଆଉ ତା’ସହ ପିନ୍ଧନ୍ତି ହାଈ ହିଲ୍ସ। ବଳିଷ୍ଠ ଚେହେରା ସାଙ୍ଗକୁ ତାଙ୍କର ଏଭଳି ପୋଷାକ ପରିପାଟି ତାଙ୍କୁ ବେଶ୍ ଅଜବ ଲୁକ୍ ଦିଏ। ତାଙ୍କର ଏଭଳି ଲୁକ୍କୁ ଦେଖି କିଏ ତାଙ୍କୁ ସମଲୈଙ୍ଗିକ ଭାବନ୍ତି ତ କିଏ କିନ୍ନର। କିନ୍ତୁ ସେ ନା ସମଲୈଙ୍ଗିକ ନା କିନ୍ନର। ସେ ତ ସୁଖି ଦାମ୍ପତ୍ୟ ଜୀବନ ଅତିବାହିତ କରୁଛନ୍ତି ଓ ତିନି ସନ୍ତାନର ଜନକ ବି ଅଟନ୍ତି। ହେଲେ ଦୀର୍ଘ ୬ ବର୍ଷ ହେବ ସେ ସବୁଦିନ ଅଫିସ୍କୁ ଯିବାବେଳେ ସ୍କର୍ଟ ଓ ହାଇ ହିଲ୍ସ ପିନ୍ଧୁଛନ୍ତି। ଘରେ ଓ ଅନ୍ୟ ସ୍ଥାନରେ ସେ ପୁରୁଷଙ୍କ ପରି ସାମାନ୍ୟ କପଡା ପିନ୍ଧନ୍ତି। ହେଲେ କେବଳ ଅଫିସ୍କୁ ସେ ସ୍କର୍ଟ ଓ ହାଇ ହିଲ୍ସ ପିନ୍ଧନ୍ତି। ସେ କୁହନ୍ତି, ‘ମତେ ଏଭଳି ପୋଷାକ ପିନ୍ଧିବାକୁ ବହୁତ ଭଲ ଲାଗେ। ମୋ ମତରେ ତ ପୋଷାକର କିଛି ଲିଙ୍ଗ ନ ଥାଏ। ତେଣୁ କିଏ ବି କେଉଁ ପ୍ରକାରର ପୋଷାକ ପିନ୍ଧିପାରିବେ।’
