ଭୁବନେଶ୍ୱର, ୩।୭ (ବନ୍ଦନା ସେଠୀ): ଅସରାଏ ବର୍ଷାରେ ଭୁବନେଶ୍ୱରର ବିକାଶ ଉବୁଟୁବୁ ହେଉଛି। ପ୍ରତିବର୍ଷ ଏଭଳି ସମସ୍ୟା ଦେଖାଦେଉଥିଲେ ମଧ୍ୟ ଚେତୁନି ବିଏମ୍ସି। ସେଥିପାଇଁ ମୁକୁଳା ଡ୍ରେନ୍ରେ ପଡି ଗୋଟେ ପରେ ଗୋଟେ ଅମୂଲ୍ୟ ଜୀବନ ଚାଲିଯାଉଛି। ତେବେ ଗତ କିଛିଦିନ ତଳେ ୟୁନିଟ୍-୩ ମସ୍ଜିଦ କଲୋନୀ ନାଳରେ ଭାସି ଜଣେ ନାବାଳକର ମୃତ୍ୟୁ ହେବା ପରେ ବିଏମ୍ସି ଅଧିକାରୀଙ୍କ ଚେତାପଶିଛି। ବିଭାଗୀୟ ମନ୍ତ୍ରୀଙ୍କ ତନାଘନା ପରେ ବିଏମ୍ସି ପକ୍ଷରୁ ସହରର ୩୪ଟି ସମ୍ବେଦନଶୀଳ ସ୍ଥାନ ଓ ୧୨ଟି ବଡବଡ ଜଳବନ୍ଦୀ ସ୍ଥାନ ଚିହ୍ନଟ କରାଯାଇଛି। ଏହି ସମ୍ବେଦନଶୀଳ ସମସ୍ୟାର ସ୍ଥାୟୀ ସମାଧାନ ପାଇଁ ଯୋଜନା ହୋଇଥିବାବେଳେ ସେଥିରେ ମନ୍ତ୍ରୀଙ୍କ ମୋହର ବାଜିବାକୁ ବିଏମ୍ସି ଅପେକ୍ଷା କରିଛି। ତେବେ ସେ ପର୍ଯ୍ୟନ୍ତ ଜଳବନ୍ଦୀ ସମସ୍ୟାରୁ ମୁକ୍ତି ପାଇବା ପାଇଁ ବିଏମ୍ସି ପକ୍ଷରୁ ଏକ ରାପିଡ୍ ଆକ୍ସନ୍ ଟିମ୍ ଗଠନ କରାଯାଇଛି। ଏହି ଟିମ୍ ଜଳବନ୍ଦୀ ନେଇ ଖବର ପାଇବା ମାତ୍ରେ ତୁରନ୍ତ ଘଟଣାସ୍ଥଳକୁ ଯାଇ ସମସ୍ୟାର ସମାଧାନ କରୁଛିି। ତେବେ ବିଏମ୍ସି ପକ୍ଷରୁ ମାତ୍ର ୧୨ଟି ବଡ ସ୍ଥାନ ଚିହ୍ନଟ ହୋଇଥିବାବେଳେ ସହରରେ ଦୁର୍ଘଟଣା ଆଶଙ୍କା ସୃଷ୍ଟି କରୁଥିବା ଅନେକ ଛୋଟଛୋଟ ଜଳବନ୍ଦୀ ସ୍ଥାନ ରହିଛି। ମାତ୍ର ବିଏମ୍ସି ଅଧିକାରୀଙ୍କ ନଜର ସେଠାରେ ପଡିନାହିଁ କିମ୍ବା ମନ୍ତ୍ରୀଙ୍କ ନିର୍ଦ୍ଦେଶ ପରେ ତରବରିଆ ଭାବେ ଜଳବନ୍ଦୀ ସ୍ଥାନ ଚିହ୍ନଟ କରି ଏଗୁଡିକୁ ବାଦ୍ ଦିଆଯାଇଥିବା କୁହାଯାଉଛି। ବର୍ଷା ସମୟରେ ସହରସାରା ଜଳବନ୍ଦୀ ସ୍ଥିତି ଉପୁଜୁଥିବାବେଳେ ସ୍ବଳ୍ପ ମାନବ ସମ୍ବଳକୁ ନେଇ ଗଠିତ ଏହି ସ୍ବତନ୍ତ୍ର ଟିମ୍ ସମସ୍ୟାର ସମାଧାନ କିପରି କରିବ ସେ ନେଇ ଆଶଙ୍କା ପ୍ରକାଶ ପାଇଛି।
ଉତ୍ତର, ଦକ୍ଷିଣ-ପୂର୍ବ ଏବଂ ଦକ୍ଷିଣ-ପଶ୍ଚିମ ୩ଟି ଜୋନ୍ ପାଇଁ ଗୋଟିଏ ଲେଖାଏ ଅର୍ଥାତ୍ ମୋଟ୍ ୩ଟି ରାପିଡ୍ ଆକ୍ସନ ଟିମ୍ ଗଠନ କରାଯାଇଛି। ପ୍ରତ୍ୟେକ ଟିମ୍ରେ ଜଣେ ଲେଖାଏ ଆସିଷ୍ଟାଣ୍ଟ ଇଞ୍ଜିନିୟର, ଆସିଷ୍ଟାଣ୍ଟ ଏକ୍ଜିକ୍ୟୁଟିଭ୍ ଇଞ୍ଜିନିୟର ରହିଛନ୍ତି। ଏମାନେ ଡ୍ରେନେଜ୍ ବିଭାଗର ଏକ୍ଜିକ୍ୟୁଟିଭ୍ ଇଞ୍ଜିନିୟରଙ୍କ ନିର୍ଦ୍ଦେଶରେ ପରିଚାଳିତ ହେବେ। ସେହିପରି ପ୍ରତ୍ୟେକ ଟିମ୍ରେ ୫/୬ଜଣ କର୍ମଚାରୀ ନିୟୋଜିତ ହୋଇଛନ୍ତି। ଜଳବନ୍ଦୀ ସମସ୍ୟାର ମୁକାବିଲା ପାଇଁ ସେମାନଙ୍କୁ କୋଡ଼ି, କୋଦାଳ, ଆବର୍ଜନା ଛଣାଯନ୍ତ୍ରଠାରୁ ଆରମ୍ଭ କରି ଅନ୍ୟାନ୍ୟ ସରଞ୍ଜାମ ଦିଆଯାଇଛି। ଏଥିସହ ସେମାନଙ୍କ ସୁରକ୍ଷା ପାଇଁ ଗ୍ଲୋବ୍, ବୁଟ୍ ଏବଂ ହେଲ୍ମେଟ୍ ଆଦି ସାମଗ୍ରୀ ପ୍ରଦାନ କରାଯାଇଛି। ସେହିପରି ଟିମ୍କୁ ୨ଟି ଜେସିବି ପ୍ରଦାନ କରାଯାଇଛି ଏବଂ ଆବଶ୍ୟକ ସମୟରେ ଜେସିବି ସଂଖ୍ୟାକୁ ବଢାଯିବ ବୋଲି ସୂଚନା ଦିଆଯାଇଛି। କୌଣସି ସ୍ଥାନରେ ଜଳବନ୍ଦୀ ନେଇ ଟୋଲ୍ ଫ୍ରି ନଂ.୧୯୨୯ କିମ୍ବା ଜରୁରିକାଳୀନ ନମ୍ବରରେ କଲ୍ ଆସିଲେ ତାହାକୁ ସମ୍ପୃକ୍ତ ଜୋନ୍ର ଆସିଷ୍ଟାଣ୍ଟ ଇଞ୍ଜିନିୟରଙ୍କୁ ସୂଚିତ କରାଯିବା ସହ ତୁରନ୍ତ ସେବା ପାଇଁ ପଠାଯାଉଛି। ଏହାବାଦ୍ ମୋଟର ପମ୍ପ ବ୍ୟବହାର ସହ ଏଜେନ୍ସିର ଲୋକମାନେ ମଧ୍ୟ ନିୟୋଜିତ ହୋଇଛନ୍ତି। ବର୍ତ୍ତମାନ ଜରୁରିକାଳୀନଭିତ୍ତିରେ ଏସବୁ କାମ ହେଉଥିବାବେଳେ ବର୍ଷା ପରେ ଏନେଇ କେତେ ଖର୍ଚ୍ଚ ହେଲା ତାହାର ହିସାବ କରାଯିବ ବୋଲି ବିଏମ୍ସିର ଜଣେ ଅଧିକାରୀ କହିଛନ୍ତି। ତେବେ ନେଡିଗୁଡ କହୁଣିକୁ ବୋହିଯିବା ଭଳି ଜୀବନ ଯିବା ପରେ ଏଭଳି ଯୋଜନାକୁ ନେଇ ବିଏମ୍ସିକୁ ସହରବାସୀ ତୀବ୍ର ସମାଲୋଚନା କରୁଛନ୍ତି। ଆବଶ୍ୟକ ସମୟରେ ଏଭଳି ପଦକ୍ଷେପ ନେଇଥିଲେ ଅନେକ ଘଟଣା ଓ ଦୁର୍ଘଟଣାକୁ ଏଡାଇ ଦିଆଯିବା ସହ ବହୁ ଜୀବନ ରକ୍ଷା ପାଇଯାଇଥାନ୍ତା ବୋଲି ସାଧାରଣରେ ମତ ପ୍ରକାଶ ପାଇଛି।
