ଭୁବନେଶ୍ୱର,୧୯।୮:ସାଧାରଣତଃ ମାତାପିତାଙ୍କଠାରୁ କିନ୍ନର ଶିଶୁଟିଏ ଜନ୍ମ ନେଲେ ତାକୁ ଅଲୋଡ଼ା ଭାବି ନବଜାତ ଶିଶୁଟିକୁ ଏଣେତେଣେ ଛାଡି ଦେଇଥାନ୍ତି। କିନ୍ତୁ କିଏ ଜାଣେ ଦୁର୍ଲଭ ମାନବ ଜନ୍ମ ପାଇଥିବା ସେହି ଶିଶୁଟି ପରବର୍ତ୍ତୀ ସମୟରେ କିନ୍ନର ହୋଇ ବି କେଉଁ ବିରଳ ପ୍ରତିଭାର ଅଧିକାରୀ ହୋଇଥାଏ। ଏଭଳି ଜଣେ ଅଲୋଡ଼ା ଶିଶୁ ‘ଜ୍ୟୋତି’ର ସଂଘର୍ଷ ଓ ସଫଳତାର ଜୀବନ କାହାଣୀକୁ ନାଟକ ମାଧ୍ୟମରେ ସାଇ ସବୁରୀ ନର୍ସିଂ ଆଣ୍ଡ୍ ହେଲ୍ଥ ସାଇନ୍ସ କଲେଜ ବାଳକାଟୀର ଛାତ୍ରୀଛାତ୍ରମାନେ ସମାଜକୁ ଏକ ସୁନ୍ଦର ବାର୍ତ୍ତା ଦେଇଥିଲେ। ଅଗଷ୍ଟ ୧୫ ଏବଂ ଆଜାଦୀ କା ଅମୃତ ମହୋତ୍ସବ ଅବସରରେ ସାଇ ସବୁରୀ ନର୍ସିଂ କଲେଜ ପରିସରରେ ଛାତ୍ରୀଛାତ୍ରମାନଙ୍କ ଦ୍ୱାରା ସନ୍ଧ୍ୟାରେ ଏକ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା। ସେଥିମଧ୍ୟରୁ ଉକ୍ତ କଲେଜର ପାରାମେଡିକାଲ ଛାତ୍ରୀଛାତ୍ରଙ୍କ କ୍ଷୁଦ୍ର ନାଟକ ‘ଜ୍ୟୋତି’ ଦର୍ଶକଙ୍କ ଦୃଷ୍ଟି ଆକର୍ଷଣ କରିଥିଲା।
ଡାକ୍ତରଖାନାରେ ଶିଶୁଟିଏ ଜନ୍ମ ହେବା ପରେ ତାକୁ କିନ୍ନର ବୋଲି ଡାକ୍ତରଙ୍କଠାରୁ ମାତାପିତା ଜାଣିବାକୁ ପାଇଥିଲେ। ଏପରିକି ଘୃଣା କରି ତତ୍କ୍ଷଣାତ ସେମାନେ ଉକ୍ତ ଶିଶୁଟିକୁ କିନ୍ନର ସମାଜରେ ଛାଡ଼ି ଦେଇଥିଲେ। ସେ ବଡ ହୋଇ ପଢ଼ିବା ଲାଗି ତା’ର ପାଳିତ ମାଆ ଯଶୋଦା ପାଖରେ ଜିଦ୍ କରିଥିଲା। ଯଶୋଦା ଉକ୍ତ କିନ୍ନର କୋଠିର ମୁଖ୍ୟ ବାଈ ଚୁମ୍କିର ଅନୁମତି ନିଅନ୍ତି, କିନ୍ତୁ କିନ୍ନର ହୋଇଥିବାରୁ ନାମଲେଖା ପାଇଁ କୌଣସି ଅନୁଷ୍ଠାନ ରାଜି ହୁଅନ୍ତି ନାହିଁ। ଜ୍ୟୋତି ଘରେ ରହି ପାଠ ପଢି ଶେଷରେ ରାଜ୍ୟ ସରକାରଙ୍କ ଅର୍ଥ ବିଭାଗ ଅଧୀନରେ ପ୍ରଥମ ଶ୍ରେଣୀ ଅଧିକାରୀ ଭାବେ କାର୍ଯ୍ୟ କରେ। ଗଁାଠୁ ଦୂରରେ ରହି ବି ସେ ନିଜ ଜନ୍ମମାଟି, ପାଳିତ ମାଆ ଯଶୋଦା ଓ ଜନ୍ମିତ ବାପାମାଆଙ୍କର ସମସ୍ତ ପ୍ରକାର ଯତ୍ନ ନିଏ ା ଶେଷରେ ଜ୍ୟୋତିର ଏଭଳି ମହାନ୍ କର୍ମ ପାଇଁ ତା’ ବାପା ମା’ ଅନୁତାପ କରିବା ସହ କିନ୍ନର ଭାବି ଶିଶୁମାନଙ୍କୁ ଘରୁ ବାହାର ନ କରି ସେମାନଙ୍କୁ ମୁଖ୍ୟ ସ୍ରୋତରେ ସାମିଲ କରାଇବା ପାଇଁ ସମସ୍ତଙ୍କୁ ନିବେଦନ କରିଥିଲେ। ସ୍ବାଧୀନତା ଦିବସ ଅବସରରେ ସକାଳେ କଲେଜ ପରିସରରେ ଟାଇମ୍ସ ସ୍କର୍ଲାସ ଗୁରୁକୁଳର ଛାତ୍ରୀଛାତ୍ରଙ୍କ ଗହଣରେ ଅନୁଷ୍ଠାନର ଅଧ୍ୟକ୍ଷ ଡ. ସାରଦା ମିଶ୍ର ଓ ଉପାଧ୍ୟକ୍ଷା ସ୍ମୃତି ସାରିକା ପ୍ରମୁଖ ଜାତୀୟ ପତାକା ଉତ୍ତୋଳନ କରିଥିଲେ। ସନ୍ଧ୍ୟାରେ କଲେଜର ବିପିଟି, ବି.ଏସ୍ସି. ନର୍ସିଂ, ଅପ୍ଟ୍ରୋମେଟ୍ରି,ଏମ୍ଏଲ୍ଟି,ଏମ୍ଆରଟି, ଇଏମଟି ଓ ଓଟିଟି ଆଦି ବିଭାଗର ଛାତ୍ରୀଛାତ୍ରମାନଙ୍କ ଦ୍ୱାରା ସଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା।
