ରାୟଗଡ଼ା ଅଫିସ,୨୧।୩: ରାୟଗଡ଼ା ଜିଲା ଓ ଦୌରାଜଜ୍ଙ୍କ ଅଦାଲତ ପରିସରରେ ନୂତନ ଜିଲା ଅଦାଲତ କୋଠା ନିର୍ମାଣ ନିମନ୍ତେ ରବିବାର ଭିତ୍ତିପ୍ରସ୍ତର ସ୍ଥାପନ ହୋଇଛି। ହାଇକୋର୍ଟର ମୁଖ୍ୟ ବିଚାରପତି ଏସ୍.ମୁରଲିଧର ମୁଖ୍ୟ ଅତିଥି ଏବଂ ହାଇକୋର୍ଟ ବିଚାରପତି ବି. ଆର୍. ଷଡଙ୍ଗୀ ସମ୍ମାନୀତ ଅତିଥି ରୂପେ ଯୋଗଦେଇ ଭିତ୍ତିପ୍ରସ୍ତର ସ୍ଥାପନ କରିଥିଲେ।
ଦୀର୍ଘ ୮ବର୍ଷ ଧରି ନୂତନ ଜିଲା ଅଦାଲତ କୋଠା ପାଇଁ ଓକିଲ ସଂଘ ଏବଂ ଜନସାଧାରଣଙ୍କ ପକ୍ଷରୁ ଦାବି ହୋଇ ଆସୁଥିଲା। ଏହାକୁ ସମର୍ଥନ ଜଣାଇ ହାଇକୋର୍ଟ ରାୟଗଡ଼ାରେ ନୂତନ ଜିଲା ଅଦାଲତ କୋଠା ନିର୍ମାଣ ପାଇଁ ଅନୁମତି ପ୍ରଦାନ କରିଥିଲେ। ୪୭ କୋଟି ବ୍ୟୟରେ ୫ମହଲା ବିଶିଷ୍ଠ ଅତ୍ୟାଧୁନିକ ଡିଜିଟାଲ ତଥା ସମସ୍ତ ପ୍ରକାର ସୁବିଧା ରହିଥିବା କୋଠା କାର୍ଯ୍ୟ ୨ ବର୍ଷ ମଧ୍ୟରେ ଶେଷ ପାଇଁ ଲକ୍ଷ୍ୟ ରହିଛି। ଗୋଟିଏ କୋଠାରେ ରାୟଗଡ଼ାରେ ଥିବା ବିଭିନ୍ନ ଅଦାଲତ ରହିବାରୁ ଲୋକେ ମଧ୍ୟ ଉପକୃତ ହୋଇପାରିବେ। ଏଥିସହ ନୂତନଭାବେ ଆସୁଥିବା ଓକିଲମାନେ ମଧ୍ୟ ଅନେକ ଆଇନ ସମ୍ବନ୍ଧୀୟ ଶିକ୍ଷା ଗ୍ରହଣ କରିପାରିବେ। ସମସ୍ତେ ରାୟଗଡ଼ାରୁ ସିଧାସଳଖ ହାଇକୋର୍ଟ ପର୍ଯ୍ୟନ୍ତ ମାମଲା ଗୁଡ଼ିକ ଲଢ଼ିପାରିବେ ବୋଲି ରାୟଗଡ଼ା ଓକିଲ ସଂଘର ସଭାପତି ଭି.ଏସ୍. ରାଜୁ କହିଛନ୍ତି। ଏହି ଅବସରରେ ଅନୁଷ୍ଠିତ ସାଧାରଣ ସଭାରେ ମୁଖ୍ୟ ବିଚାରପତି ଲୋକଙ୍କୁ ନ୍ୟାୟପାଳିକା ଉପରେ ରହିଥିବା ବିଶ୍ୱାସକୁ ଆହୁରି ସୁଦୃୃଢ଼ କରିବା ପାଇଁ ଆଇନଜୀବୀମାନେ ମହକିଲଙ୍କ ସହ ସୁସମ୍ପର୍କ ରଖିବା ଆବଶ୍ୟକ ବୋଲି କହିଛନ୍ତି। ଏଥିସହ ନୂତନ ଜିଲା ଅଦାଲତ ନିର୍ମାଣ ହେବା ପରେ କୋର୍ଟକୁ ଆସୁଥିବା ଗରିବ ମହକିଲମାନେ ସିଧାସଳଖ ସୁବିଧା ପାଇପାରିବେ ଏବଂ ଆର୍ଥିକ ଦୃଷ୍ଟିରୁ ଖର୍ଚ୍ଚାନ୍ତ ହେବାକୁ ପଡ଼ିବ ନାହିଁ ବୋଲି ସେ କହିଛନ୍ତି। କାର୍ଯ୍ୟକ୍ରମରେ ଜିଲା ଓ ଦୌରାଜଜ୍ ବିକ୍ରମ କେଶରୀ ପଟ୍ଟନାୟକ, ଓକିଲ ସଂଘର ସଭାପତି ଭି.ଏସ୍. ରାଜୁ, ସମ୍ପାଦକ ଜଗନ୍ନାଥ ଦୋରା ମଞ୍ଚାସୀନ ଥିଲେ। କୋରାପୁଟ ଏମ୍ପି ସପ୍ତଗିରି ଉଲାକା, ରାଜ୍ୟ ସଭା ସଦସ୍ୟ ଏନ୍. ଭାସ୍କର ରାଓ, ବିଧାୟକ ମକରନ୍ଦ ମୁଦୁଲି, ଜିଲାପାଳ ସରୋଜ କୁମାର ମିଶ୍ର, ଏସ୍ପି ବିବେକାନନ୍ଦ ଶର୍ମାଙ୍କ ସମେତ ସମସ୍ତ ଆଇନଜୀବୀ ଉପସ୍ଥିତ ଥିଲେ।
