ଗଞ୍ଜାମ,୨।୩(ଡି.ଏନ.ଏ.): ଗଞ୍ଜାମ ଜିଲାର ଋଷିକୁଲ୍ୟା ମୁହାଣ ସମୁଦ୍ର ବେଳାଭୂମିରେ ବିରଳ ପ୍ରଜାତିର ଅଲିଭ ରିଡ୍ଲେ ସାମୁଦ୍ରିକ କଇଁଛମାନଙ୍କ ସାମୂହିକ ଅଣ୍ଡାଦାନ ଜାରି ରହିଛି। ସାତ ଦିନ ମଧ୍ୟରେ ସର୍ବକାଳୀନ ରେକର୍ଡ ସୃଷ୍ଟି ହୋଇଛି। ଗତ ଗୁରୁବାରଠାରୁ ବେଳାଭୂମିରେ ଆରମ୍ଭ ହୋଇଥିବା ଗଣ ଅଣ୍ଡାଦାନ ବୁଧବାର ସକାଳ ସୁଦ୍ଧା ୬ ଲକ୍ଷ ୨୩ହଜାର ୬୩୨ଟି ସାମୁଦ୍ରିକ କଇଁଛ ସାମୂହିକ ଅଣ୍ଡାଦାନ କରିଥିବା ଡିଏଫଓ ଅମ୍ଳାନ ନାୟକ ସୂଚନା ଦେଇଛନ୍ତି, ଯାହାକି ଗତ ବର୍ଷ ରେକର୍ଡ ସଂଖ୍ୟକ ଅଲିଭ ରିଡଲେଙ୍କ ସାମୂହିକ ଗଣ ଅଣ୍ଡାଦାନ ୫ଲକ୍ଷ ୫୦ ହଜାର ହୋଇଥିବା ବେଳେ ଚଳିତ ବର୍ଷ ତା’ଠାରୁ ଢେର ବୃଦ୍ଧି ହୋଇଛି।
ମଙ୍ଗଳବାର ରାତ୍ରଠାରୁ ବୁଧବାର ସକାଳ ମଧ୍ୟରେ ୨୩ହଜାର ୨୨୩ ଗୋଟି କଇଁଛଙ୍କ ଗଣ ଅଣ୍ଡାଦାନ ହୋଇଛି। ସେହିପରି ଗତ ଗୁରୁବାର ସକାଳଠାରୁ ସନ୍ଧ୍ୟା ୬ଟାରେ ୫୧ ହଜାର ୩୨୩, ସନ୍ଧ୍ୟା ୬ଟାଠାରୁ ଶୁକ୍ରବାର ସକାଳ ମଧ୍ୟରେ ୧ ଲକ୍ଷ ୩୪ହଜାର ୨୩୬, ଶୁକ୍ରବାର ରାତ୍ରରୁ ଶନିବାର ସକାଳ ମଧ୍ୟରେ ୧ଲକ୍ଷ ୩୮ହଜାର ୮୨୯, ଶନିବାର ରାତ୍ରରୁ ରବିବାର ସକାଳ ମଧ୍ୟରେ ୧ଲକ୍ଷ ୪୦ ହଜାର ୯୨୯, ରବିବାର ରାତ୍ରରୁ ସୋମବାର ସକାଳ ମଧ୍ୟରେ ୯୨ ହଜାର ୫୨୩, ସୋମବାରଠାରୁ ମଙ୍ଗଳବାର ସକାଳ ମଧ୍ୟରେ ୪୨ ହଜାର ୫୨୯ଅଲିଭ ରିଡଲେ ଗଣ ଅଣ୍ଡାଦାନ କରିଥିବା ଜଣାପଡିଛି। ବନ ବିଭଗୀୟ ଅଧିକାରୀ, କର୍ମଚାରୀ ଅଲିଭ ରିଡଲେ ଓ ଗଣ ଅଣ୍ଡାଦାନ ସ୍ଥଳ ସୁରକ୍ଷା ବ୍ୟବସ୍ଥାକୁ କଡାକଡ଼ି କରିଥିବା ପରିଲକ୍ଷିତ ହୋଇଛି। ତହସିଲଦାର ଅରୁଣ କୁମାର ନାୟକ ଘନ ଘନ ସମୁଦ୍ର ବେଳାଭୂମି ମୁହାଣ ଯାଇ କଇଁଛ ଓ ଅଣ୍ଡା ସୁରକ୍ଷିତ ଅଛି ନାଁ ନାହିଁ ପଚାରି ବୁଝୁଛନ୍ତି। ଆସନ୍ତା ଦିନେ ଦୁଇ ଦିନ ମଧ୍ୟରେ କଇଁଛଙ୍କ ଅଣ୍ଡା ଦାନ ହ୍ରାସ ହେବ ବୋଲି ପରିବେଶବିତ ମାନେ ଅନୁମାନ କରିଛନ୍ତି।
