ଯାଜପୁର ଅଫିସ/ଦଶରଥପୁର/ଝୁମ୍ପୁରୀ,୧୭ା୮(ଡି.ଏନ.ଏ.): ବୈତରଣୀ ନଦୀର ଉପର ମୁଣ୍ଡରେ ଲଗାଣ ବର୍ଷା ଯୋଗୁ ଏହାର ଶାଖା ନଦୀ କାଣୀରେ ୧ଶହ ଫୁଟ ଲମ୍ବର ଏକ ଘାଇ ସୃଷ୍ଟି ହୋଇଛି। ଏଥିରେ ଯାଜପୁର ଜିଲା ଦଶରଥପୁର ବ୍ଲକର ୧୦ ପଞ୍ଚାୟତର ୨୪ ଗ୍ରାମର ପ୍ରାୟ ୧୨ ହଜାର ଲୋକ ଜଳବନ୍ଦୀ ଅବସ୍ଥାରେ ଅଛନ୍ତି। ବର୍ଷେ ନ ପୂରୁଣୁ ବୈତରଣୀ ନଦୀବନ୍ଧରେ ପୁଣି ଘାଇ ସୃଷ୍ଟି ହେବା ସମ୍ପୃକ୍ତ ଅଞ୍ଚଳବାସୀଙ୍କ ଜୀବନଜୀବିକାକୁ ପ୍ରଭାବିତ କରିଛି। ପ୍ରଭାବିତ ଅଞ୍ଚଳକୁ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ପ୍ରମିଳା ମଲ୍ଲିକ ଓ ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ପରିଦର୍ଶନ କରି ପରିସ୍ଥିତି ଅନୁଧ୍ୟାନ କରିଛନ୍ତି ା ବନ୍ୟା ପ୍ରଭାବିତ ଅଞ୍ଚଳର ସ୍କୁଲଗୁଡ଼ିକୁ ମଙ୍ଗଳବାର ଓ ବୁଧବାର ଛୁଟି ଘୋଷଣା କରାଯାଇଛି। ଗୁରୁବାର ଜନ୍ମାଷ୍ଟମୀ ପାଇଁ ସ୍କୁଲ ବନ୍ଦ ରହିବ ା
ଜିଲାର ଦଶରଥପୁର ବ୍ଲକ କସପା, ମଲ୍ଲିକାପୁର, ଦୁଦୁରାଅଣ୍ଟା, ଦତ୍ତପୁର, ନିଜାମପୁର, କୟାଁ, କମାରଡିହ, ଖାନନଗର, ଥାଲକୁଡ଼ି, ସୁସୁଆ, ମଙ୍ଗଳପୁର ଆଦି ପଞ୍ଚାୟତର ବହୁ ଗ୍ରାମରେ ବନ୍ୟା ପାଣି ପଶିଛି। ବିଶେଷ ଭାବେ ଘାଇ ମୁହଁରେ ଥିବା କସପା ପଞ୍ଚାୟତର ପଞ୍ଚୁପଡ଼ା, ନୂଆଶାସନ, ବ୍ରହ୍ମଚାରୀପାଟଣା, କମାଳପୁର, ପଲ୍ଲାସାହି, ଦୁଦୁରାଅଣ୍ଟା ପଞ୍ଚାୟତର କୁଅଁରସାହି, ଆଖୁଆସାହି, ଅର୍ଦ୍ଦାଳୁଆ, ମଲ୍ଲିକାପୁର ପଞ୍ଚାୟତର ମଲ୍ଲିକାପୁର, ମହାନ୍ତିପାଟଣା, କୟଁା ପଞ୍ଚାୟତର ବଳରାମପୁର, ଇଚ୍ଛାପୁର, ଗୁଣ୍ଠୁଣିପଡ଼ା, ଧରମପୁର, ଗହୀରାପାଳ, ଦୁବକଣ, ଦରବା, କମାରଡିହ ପଞ୍ଚାୟତର ଶହେମାଡ଼, ଲକ୍ଷ୍ମୀପୁର, ଇଟାପଡ଼ା, କେଳାଙ୍ଗ ପ୍ରଭୃତି ଗ୍ରାମ ସମ୍ପୂର୍ଣ୍ଣରୂପେ ବନ୍ୟା ଘେରରେ ରହିଛି ା ସେହିପରି ଜୟନ୍ତରା ପଞ୍ଚାୟତର ମହାପାତ୍ର ସାହି ଓ କଟିକଟା ପଞ୍ଚାୟତର କାପୁଡ଼ିଆ ସାହି, ମାଝି ସାହି ସମ୍ପୂର୍ଣ୍ଣରୂପେ ବନ୍ୟାପାଣିରେ ବୁଡ଼ି ରହିଛି। ଏହି ଘାଇ ଫଳରେ ମଲ୍ଲିକାପୁର-ପଲ୍ଲାସାହି, ବୈଷପାନ-ଦତ୍ତପୁର, ଦତ୍ତପୁର-ମଙ୍ଗଳପୁର, କୟାଁ-ବଳରାମପୁର, କମାରଡିହ-ଇଟାପଡ଼ା, କମାରଡିହ-ଦରବା, ଦୁବକଣ-ଗରବନ୍ଧ ପ୍ରଭୃତି ମୁଖ୍ୟ ରାସ୍ତାରେ ବନ୍ୟା ଜଳ ଚାଲିଛି। ଏଥିସହ ୯୩୦.୭୫ ହେକ୍ଟର ଚାଷ ଜମିରେ ବନ୍ୟାଜଳ ମାଡ଼ିଯାଇଥିବାବେଳେ ବ୍ୟାପକ ପନିପରିବା ଫସଲ ନଷ୍ଟ ହୋଇଛି। କେବଳ କସପା ପଞ୍ଚାୟତର ବନ୍ୟା ବିପନ୍ନଙ୍କ ପାଇଁ ଚୁଡ଼ା,ଗୁଡ଼ ଓ ପାଣି ପାଉଚ ଯୋଗାଇ ଦିଆଯାଇଛି ବୋଲି ଦଶରଥପୁର ତହସିଲ ପକ୍ଷରୁ ସୂଚନା ଦିଆଯାଇଛି।
ସୋମବାର ଓ ମଙ୍ଗଳବାର ବନ୍ୟା ପ୍ରଭାବିତ ଅଞ୍ଚଳକୁ ରାଜସ୍ବ ମନ୍ତ୍ରୀ ପ୍ରମିଳା ମଲ୍ଲିକ ପରିଦର୍ଶନ କରିଛନ୍ତି। ପରେ କସପା ପଞ୍ଚାୟତ ଅଫିସ୍ଠାରେ ଉଚ୍ଚପଦସ୍ଥ ଅଫିସରମାନଙ୍କ ସହିତ ଏକ ସମୀକ୍ଷା ବୈଠକ କରି ବନ୍ୟା ବିପନ୍ନମାନଙ୍କୁ ତୁରନ୍ତ ସରକାରୀ ସହାୟତା ଦେବାକୁ ନିର୍ଦ୍ଦେଶ ଦେଇଛନ୍ତି। ମଙ୍ଗଳବାର ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ବନ୍ୟା ପ୍ରଭାବିତ କସପା ଓ ମଲ୍ଲିକାପୁର ପଞ୍ଚାୟତ ବୁଲିବା ସହ ଘାଇ ମୁହଁକୁ ଯାଇ ସ୍ଥିତିକୁ ଅନୁଧ୍ୟାନ କରିଛନ୍ତି ା ୨୪ ଘଣ୍ଟା ମଧ୍ୟରେ ଉକ୍ତ ଘାଇକୁ ବନ୍ଦ କରିବା ନିମନ୍ତେ ପ୍ରୟାସ କରିବାକୁ ଜଳସମ୍ପଦ ବିଭାଗ ଉଚ୍ଚ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି ା ମନ୍ତ୍ରୀ ଓ ବିଧାୟକଙ୍କ ଏହି ଗସ୍ତ ସମୟରେ ଜିଲାପାଳ ଚକ୍ରବର୍ତ୍ତୀ ସିଂ ରାଠୋର, ଜଳସମ୍ପଦ ବିଭାଗ ଅତିରିକ୍ତ ମୁଖ୍ୟ ଯନ୍ତ୍ରୀ ଧନେଶ୍ୱର ସାମଲ, ଜଳସମ୍ପଦ ବିଭାଗ ନିର୍ବାହୀ ଯନ୍ତ୍ରୀ ଶରତ ଚନ୍ଦ୍ର ଘଡ଼ାଇ, ଜିଲା ବିଜେଡି ସଭାପତି ସରୋଜ କୁମାର ମହାପାତ୍ର, ଯାଜପୁର ବିଧାୟକଙ୍କ ପ୍ରତିନିଧି କର୍ଣ୍ଣାଟ କେଶରୀ ଦାସ, ବିଧାୟିକାଙ୍କ ପ୍ରତିନିଧି ପ୍ରଦୀପ କୁମାର ମହାନ୍ତି, ତହସିଲଦାର ଅବିନାଶ ବିଶ୍ୱଜିତ ସେଠୀ, ଜିଲା ପରିଷଦ ସଭ୍ୟା ମାମିନା ମଲ୍ଲିକ ପ୍ରମୁଖ ସାମିଲ ଥିଲୋ ତେବେ ଏହି ଘାଇ ସୃଷ୍ଟି ହେବାର ୪୮ ଘଣ୍ଟାରୁ ଊର୍ଦ୍ଧ୍ୱ ସମୟ ଅତିକ୍ରାନ୍ତ ହୋଇଥିଲେ ହେଁ ପ୍ରଭାବିତ ଲୋକଙ୍କ ପାଖରେ ରିଲିଫ୍ ପହଞ୍ଚି ପାରିନାହିଁ ବୋଲି ଅଭିଯୋଗ ହୋଇଛି ା
ବୈତରଣୀ ନଦୀର ଉପରମୁଣ୍ଡ କେନ୍ଦୁଝର ଜିଲାରେ ପ୍ରବଳ ବର୍ଷା ହୋଇଥିଲା। ଏଥିଯୋଗୁ ଶନିବାର ୮ଟା ସମୟରେ ବୈତରଣୀ ନଦୀର ଆନନ୍ଦପୁରଠାରେ ଜଳପତ୍ତନ ବିପଦସଙ୍କେତ ୩୮.୩୬ ମିଟରକୁ ୩୬.୪୨ ମିଟର ଉଚ୍ଚରେ ରହିଥିଲା। ଆଖୁଆପଦାଠାରେ ଜଳପତ୍ତନ ବିପଦସଙ୍କେତ ୧୭.୮୩ ମିଟର ସ୍ଥଳେ ୧୮.୦୪ ମିଟରରେ ବନ୍ୟାଜଳ ପ୍ରଭାବିତ ହୋଇଥିଲା। ଏହାବାଦ୍ ଦଶରଥପୁରଠାରେ ଜଳପତ୍ତନ ବିପଦସଙ୍କେତ ୯.୫୨ ମିଟର ସ୍ଥଳେ ସେଠାରେ ଜଳପତ୍ତନ ୯.୪୦ ମିଟର ରହିଥିଲା। ଦୁର୍ବଳ ନଦୀବନ୍ଧ ଏବଂ ତାହାର ମରାମତି, ପୁନରୁଦ୍ଧାର ସହ ସୁଦୃଢୀକରଣ ଉପରେ ରାଜ୍ୟ ଜଳ ସମ୍ପଦ ବିଭାଗ ଗୁରୁତ୍ୱ ଦେଇ ଆସୁଛି। ବିଭାଗୀୟ ଅଧିକାରୀ ଓ କର୍ମଚାରୀମାନେ ନଦୀବନ୍ଧର ସ୍ଥିତି ଅନୁଧ୍ୟାନ କରି ଆବଶ୍ୟକ ପଦକ୍ଷେପ ନେବାକୁ ପରାମର୍ଶ ଦିଆଯାଇଥିଲା ା ଜିଲାପାଳମାନେ ବ୍ୟକ୍ତିଗତ ଭାବେ ଏହାର ପରିଚାଳନା କରିବାକୁ ପୂର୍ବରୁ କୁହାଯାଇଥିଲା। ଏହାପରେ ବି ସୋମବାରର ବନ୍ୟାଜଳ ସବୁ ବ୍ୟବସ୍ଥାକୁ ଭାଙ୍ଗି ଦେଇଥିଲା ା
