ଯାଜପୁର ଅଫିସ,୧୪ା୧୦: ଗରିବ ଲୋକଙ୍କୁ ଆବାସ ଘର ଠାରୁ ଆରମ୍ଭ କରି ଭତ୍ତା, ଟଙ୍କିକିଆ ଚାଉଳ ସରକାର ଯୋଗାଇ ଦେଉଛନ୍ତି। ହେଲେ ସରକାରଙ୍କ ଏହି ସୁବିଧା କାହାକୁ ମିଳୁଛି ତ ଆଉ କିଏ ପାଇବା ପାଇଁ ବର୍ଷ ବର୍ଷ ଧରି ଚାହିଁ ବସିଛନ୍ତି। ଏପରିକି ଜିଲା ପ୍ରଶାସନର ବରିଷ୍ଠ ଅଧିକାରୀଙ୍କ ନିକଟରେ ଗୁହାରୀ କଲେ ମଧ୍ୟ ଫଳ ମିଳୁନାହିଁ। ମୁଖ୍ୟତଃ ବିଞ୍ଝାରପୁର ବ୍ଲକରେ ବହୁ ଅସହାୟ ଗରିବ ଲୋକ ସରକାରଙ୍କ ବିଭିନ୍ନ ଯୋଜନାରୁ ବାଦ୍ ପଡିଛନ୍ତି। ଯାହାର ଜ୍ୱଳନ୍ତ ଉଦାହରଣ ଜରୀ ଗ୍ରାମର ଅସହାୟ ବୃଦ୍ଧା ଶାନ୍ତିଲତା ଦେଇଙ୍କ ଅବସ୍ଥାକୁ ଦେଖିଲେ ଜଳ ଜଳ ହୋଇ ଦିଶୁଛି। ଜରୀ ଗାଁର ୭୪ ବର୍ଷିୟା ବୃଦ୍ଧା ଶାନ୍ତିଲତାଙ୍କ ସ୍ବାମୀ ଗଗନ ମଳିକ ଆଜକୁ କିଛି ବର୍ଷ ହେବ ନିଖୋଜ ହୋଇଯାଇଛନ୍ତି। ପୁଅମାନେ ଶାନ୍ତିଲତାଙ୍କୁ ପଚାରୁ ନାହାନ୍ତି। ଏବେ ଶାନ୍ତିଲତା ଭୋକ ଉପାସରେ ରୋଗ ଶର୍ଯ୍ୟାରେ ପଡିଛନ୍ତି। ରାଜ୍ୟ ସରକାର ୬୦ ବର୍ଷର ବୃଦ୍ଧାବୃଦ୍ଧଙ୍କ ପାଇଁ ଭତ୍ତା ବ୍ୟବସ୍ଥା କରିଥିଲେ ମଧ୍ୟ ଶାନ୍ତିଲତା ଏଥିରୁ ବାଦ୍ ପଡିଛନ୍ତି। ୨୦୧୬ରୁ ଶାନ୍ତିଲତା ଭତ୍ତା ଅର୍ଥ ପାଇବା ପାଇଁ ବିଡ଼ିଓଙ୍କ ଠାରୁ ଆରମ୍ଭ କରି ଉପଜିଲାପାଳ ପର୍ଯ୍ୟନ୍ତ ସମସ୍ତଙ୍କୁ ନେହୁରା ହୋଇଛନ୍ତି। ଶାନ୍ତିଲତାଙ୍କ ଅବସ୍ଥା ଦେଖି ତତ୍କାଳୀନ ଉପଜିଲାପାଳ ଏ ଦିଗରେ ତୁରନ୍ତ ପଦକ୍ଷେପ ନେବାକୁ ବିଞ୍ଝାରପୁର ବିଡ଼ିଓଙ୍କୁ ନିର୍ଦ୍ଦେଶ ଦେଇଥିଲେ ମଧ୍ୟ ୬ ବର୍ଷ ଧରି ଏହି ନିର୍ଦ୍ଦେଶ ସରକାରୀ ନାଲିଫିତା ତଳେ ହଜିଯାଇଛି। ଏପରି କି ଭତ୍ତା ଅର୍ଥ ପାଇବା ପାଇଁ ଶାନ୍ତିଲତା ବାରମ୍ବାର ଆବେଦନ କରୁଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ହେଲେ ଏହି ବ୍ଲକରେ ବହୁ ଥିଲାବାଲା ଲୋକ ସରକାରଙ୍କ ବିଭିନ୍ନ ଯୋଜନାର ଫାଇଦା ଉଠାଉଛନ୍ତି। ଯାଜପୁର ଜିଲାପାଳ ଏ ଦିଗରେ ତୁରନ୍ତ ଦୃଷ୍ଟି ଦେବା ସହ ଶାନ୍ତିଲତାଙ୍କୁ ବାର୍ଦ୍ଧକ୍ୟ ଭତ୍ତା ଯୋଗାଇ ଦେବାକୁ ପୂର୍ବତନ ସରପଞ୍ଚ ଭୁବନାନନ୍ଦ ସାମଲ ଦାବି କରିଛନ୍ତି।
