ବରଗଡ଼,୨୭।୭(ପ୍ରେମାନନ୍ଦ ଖମାରୀ): ଦେଶ ମାତୃକାର ସ୍ବାଧୀନତା ପାଇଁ ଅନେକ ସଂଗ୍ରାମୀଙ୍କ ଅବଦାନ ଅତୁଳନୀୟ ଓ ଅବର୍ଣ୍ଣନୀୟ । ବ୍ରିଟିଶ କବଳରୁ ଦେଶକୁ ମୁକ୍ତ କରିବା ପାଇଁ ଅନେକ ସଂଗ୍ରାମୀ ଶହୀଦ ହୋଇଛନ୍ତି । ସ୍ବାଧୀନତା ସଂଗ୍ରାମ ଇତିହାସ ପୃଷ୍ଠାରେ ଲିପିବଦ୍ଧ ହୋଇ ରହିଛି। ଏଭଳିସ୍ଥଳେ ସ୍ବାଧୀନତା ସଂଗ୍ରାମୀଙ୍କ ସ୍ମୃତିକୁ ସାଉଁଟିବା ପାଇଁ ବରଗଡ଼ ସାମ୍ବଦିକ ସଂଘ ସଂଗ୍ରାମୀ ସ୍ମୃତିବନ ସ୍ଥାପନା କରି ଅନ୍ୟମାନଙ୍କ ପାଇଁ ଉଦାହରଣ ସାଜିଛି। କେବଳ ସେତିକି ନୁହେଁ, ସଂଗ୍ରାମୀ ସ୍ମୃତିବନ ସ୍ଥାପନା ଭଳି ବରଗଡ଼ ସାମ୍ବାଦିକ ସଂଘର ନିଆରା ପ୍ରୟାସକୁ ପାଥେୟ କରି ଆଜି ରାଜ୍ୟ ଏବଂ ଦେଶରେ ଅନୁରୂପ ପ୍ରସ୍ତାବ ନିଆଯାଉଛି ବୋଲି ବୁଧବାର କାର୍ଗିଲ୍ ବିଜୟ ଦିବସରେ ବରଗଡ଼ ବ୍ଲକ ବଗେଇବିରା ନିକଟ କଜିଲିବିଜିଲି ପାହାଡ଼ ପାଦଦେଶ ତଥା ବୈଷ୍ଣୋଦେବୀ ମନ୍ଦିରର ଅନତିଦୂରରେ ରହିଥିବା ସଂଗ୍ରାମୀ ସ୍ମୃତିବନର ପ୍ରଥମ ଜନ୍ମ ବାର୍ଷିକୀ ପାଳନ ସମାରୋହରେ ମତପ୍ରକାଶ ପାଇଛି ।
ସମାରୋହରେ ଅଧ୍ୟକ୍ଷତା କରି ବରଗଡ଼ ସାମ୍ବାଦିକ ସଂଘର ସଭାପତି ଶଙ୍କର ବଲ୍ଲଭ ମିଶ୍ର ସଂଗ୍ରାମୀ ସ୍ମୃତିବନର ଜନ୍ମ ବାର୍ଷିକୀ ପାଳନର ଆଭିମୁଖ୍ୟ ଉପରେ ସୂଚନା ଦେଇଥିଲେ । ସେ କହିଥିଲେ, ଗତବର୍ଷ ଠିକ୍ ଆଜିକାର ଦିନରେ କାରଗିଲ ବିଜୟ ଦିବସରେ ବରଗଡ଼ ସାମ୍ବାଦିକ ସଂଘର ଉଦ୍ୟମ ଏବଂ ସ୍ଥାନୀୟ ବନ ବିଭାଗର ସହଯୋଗରେ ସଂଗ୍ରାମୀ ସ୍ମୃତିବନ ସ୍ଥାପନା କରାଯାଇଥିଲା । ଏହି ପରିପ୍ରେକ୍ଷୀରେ ବରଗଡ଼ ଜିଲାର ୧୫୩ ଜଣ ସ୍ବାଧୀନତା ସଂଗ୍ରାମୀଙ୍କ ଗ୍ରାମରୁ ମାଟି ଅଣାଯାଇଥିଲା ଏବଂ ପ୍ରତ୍ୟେକ ସଂଗ୍ରାମୀଙ୍କ ନାମରେ ଗୋଟିଏ ଲେଖାଏଁ ଚାରାରୋପଣ କରାଯାଇଥିଲା । ତେବେ ସେହି ଚାରାଗୁଡ଼ିକୁ ତଥା ସଂଗ୍ରାମୀ ସ୍ମୃତିବନକୁ ଏକବର୍ଷ ହୋଇଯାଇ ଥିବାବେଳେ ପ୍ରଥମ ଜନ୍ମବାର୍ଷିକୀ ପାଳନ କରୁଛି ବୋଲି ମିଶ୍ର କହିଥିଲେ। ଏହି କ୍ରମରେ କେକ୍ କଟାଯାଇ ଥିବାବେଳେ ସ୍ମୃତିବନରେ ରହିଥିବା ବୃକ୍ଷଚାରାକୁ ପୂଜାର୍ଚ୍ଚନା ସହିତ ସଂଗ୍ରାମୀମାନଙ୍କୁ ଶ୍ରଦ୍ଧାସୁମନ ଅର୍ପଣ କରାଯାଇଥିଲା। ସେହି ସ୍ମୃତିବନର ଜନ୍ମବାର୍ଷିକୀ ପାଳନ ଅବସରରେ ଚାରାରୋପଣ କରାଯାଇଥିଲା ।
ସେହିପରି କାର୍ଯ୍ୟକ୍ରମରେ ବରଗଡ଼ ବନଖଣ୍ଡର ସହକାରୀ ବନ ସଂରକ୍ଷକ(ଏସିଏଫ୍) ରାଜେନ୍ଦ୍ର କୁମାର ଗୋଚ୍ଛାୟତ ଯୋଗଦେଇ ବରଗଡ଼ ସାମ୍ବାଦିକ ସଂଘର ଏଭଳି ନିଆରା ପ୍ରୟାସକୁ ପ୍ରଶଂସା କରିଥିଲେ। ପ୍ରତ୍ୟେକ ସଂଗ୍ରାମୀ ପୀଠରେ ବୃକ୍ଷରୋପଣ କାର୍ଯ୍ୟକ୍ରମ ରହିଥିବାବେଳେ ଆଜାଦୀ କା ଅମୃତ ମହୋତ୍ସବରେ ୧କୋଟି ଚାରାରୋପଣ ପାଇଁ ସରକାର ନିଷ୍ପତ୍ତି ନେଇଥିବା ଗୋଚ୍ଛାୟତ କହିଥିଲେ। ଏହି ଅବସରରେ ସଂଗ୍ରାମୀ ସ୍ମୃତିବନରେ ଲଗାଯାଇଥିବା ଚାରାଗୁଡ଼ିକର ଯତ୍ନ ନେଉଥିବା ୪ବନ କର୍ମଚାରୀ ପଥର୍ଲାର କାର୍ତ୍ତିକ ସାହୁ, ଗୁଡ଼େଶିରାର ରୋହିତ ବାରିକ, ବାନ୍ଦୁଟିକ୍ରାର ଲଲିତ ପ୍ରଧାନ ଏବଂ ଅମ୍ବାପାଲିର ବିମଳ ମହାନନ୍ଦଙ୍କୁ ସଂଘ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା। ସଂଘର ଉପସଭାପତି ବୀରେନ୍ଦ୍ର ପ୍ରଧାନ, ସହସମ୍ପାଦକ ପ୍ରବୀଣ କୁମାର ସାହୁ, ବରିଷ୍ଠ ସଦସ୍ୟ ଉମେଶ ବିଶ୍ୱାଳ, ଦିପକ ଶର୍ମା, ରବି ପଣ୍ଡା, ଜି.ଭି ରାଓ, ଲଲାଟେନ୍ଦୁ ଦାଶ, ଧୃବ କର୍ମୀ, ସୁଦାମ ଭୋଇ, ପ୍ରଦୀପ ପାଢ଼ୀ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।
