ଅହମ୍ମଦାବାଦ,୨୬।୨: ସୁରଟରୁ ଦିଲ୍ଲୀ ଯାଉଥିବା ଏକ ଇଣ୍ଡିଗୋ ବିମାନ ପକ୍ଷୀ ସହ ମାଡ଼ ହେବା କାରଣରୁ ଅହମ୍ମଦାବାଦ ବିମାନବନ୍ଦରରେ ଜରୁରୀକାଳୀନ ଅବତରଣ କରିଛି। ରବିବାର ସକାଳ ୮ଟାରେ ସୁରଟ ବିମାନବନ୍ଦରରୁ ବିମାନ ୬ଇ୬୪୬ ବାହାରିଥିଲା। ହେଲେ ସ୍ଥିତିକୁ ଦେଖି ଏହାକୁ ଅହମ୍ମଦାବାଦ ପଠାଯାଇଥିବା ନେଇ ଡିଜିସିଏ ପକ୍ଷରୁ ଏକ ଆଧିକାରୀକ ବିବୃତ୍ତି ଜାରି କରାଯାଇଛି।
ବିମାନ ଦିଗ ବଦଳାଇବା ପରେ ଯାତ୍ରୀମାନେ ଚିନ୍ତିତ ହୋଇପଡ଼ିଥିଲେ। ଏନେଇ ବିମାନବନ୍ଦର ନିର୍ଦ୍ଦେଶକ କହିଛନ୍ତି, ଦିଲ୍ଲୀ ଇଣ୍ଡିଗୋର ଏକ ବିମାନ ସୁରଟରୁ ବାହାରିଥିଲା। ହେଲେ ସକାଳେ ପକ୍ଷୀ ସହ ଧକ୍କା ଲାଗିଥିଲା। ଘଟଣା ନେଇ ପାଇଲଟ୍ଙ୍କ ସହ କଥାବାର୍ତ୍ତା କରିବା ବେଳେ ପ୍ରଥମେ ସବୁକିଛି ଠିକ୍ ଥିବା ସେ କହିଥିଲେ। ହେଲେ ପରେ ଇଞ୍ଜିନରେ ତ୍ରୁଟି ଥିବା ଜଣାପଡ଼ିଥିଲା। ଏହି ପରିସ୍ଥିତିକୁ ଦେଖି ବିମାନର ଦିଗ ବଦଳାଇବାକୁ ନିଷ୍ପତ୍ତି ନିଆଯାଇଥିଲା। ଅହମ୍ମଦାବାଦ ବିମାନବନ୍ଦରରେ ଏହା ନିରାପଦରେ ଅବତରଣ କରିବା ପରେ ଯାତ୍ରୀମାନଙ୍କୁ ଦିଲ୍ଲୀ ପଠାଯାଇଥିଲା।
