ଭୁବନେଶ୍ୱର, ୧୫।୭(ବ୍ୟୁରୋ): କରୋନାରେ ଆକ୍ରାନ୍ତ ସୁନ୍ଦରଗଡ଼ର ଜଣେ ଶିଶୁ ଆଖିବୁଜିଛନ୍ତି। ତାଙ୍କୁ ଏକବର୍ଷ ୩ ମାସ ହୋଇଥିଲା। ତେବେ ସେ କରୋନା ପଜିଟିଭ୍ ଚିହ୍ନଟ ହୋଇ ଚିକିତ୍ସିତ ହେଉଥିଲେ ମଧ୍ୟ ଜିଏମ୍୧ ଗାଙ୍ଗଲିଓସିଡୋସିସ୍ ରୋଗରେ ମୃତ୍ୟୁ ହୋଇଥିବା ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ମଙ୍ଗଳବାର ସୂଚନା ଦେଇଛି। ଏହି ରୋଗ ଯୋଗୁ ମସ୍ତିଷ୍କ ଓ ମେରୁଦଣ୍ଡ ମଧ୍ୟଦେଇ ଯାଇଥିବା ସ୍ନାୟୁକୋଷ ସବୁ ନଷ୍ଟ ହୋଇଯାଇଥାଏ। ତେବେ ଅନ୍ୟ ରୋଗରେ କରୋନା ଆକ୍ରାନ୍ତ ଶିଶୁଙ୍କ ମୃତ୍ୟୁ ଘଟିବା ହେଉଛି ରାଜ୍ୟର ପ୍ରଥମ ଘଟଣା। ଏହାକୁ ମିଶାଇ ଇତିମଧ୍ୟରେ ୨୧ଜଣ ଆକ୍ରାନ୍ତଙ୍କ ଅନ୍ୟ ରୋଗରେ ମୃତ୍ୟୁ ଘଟିଥିବା ବିଭାଗୀୟ ତଥ୍ୟରୁ ଜଣାପଡିଛି।
ସେପଟେ ମଙ୍ଗଳବାର ଆଉ ୪ଜଣଙ୍କ ଜୀବନ ନେଇଛି କରୋନା। ଏମାନଙ୍କ ମଧ୍ୟରୁ ଖୋର୍ଦ୍ଧା, ଭୁବନେଶ୍ୱର, କଟକ ଓ ଗଞ୍ଜାମରୁ ଜଣେ ଲେଖାଏ ରହିଛନ୍ତି। କଟକ ଓ ଭୁବନେଶ୍ୱରର ମୃତ ଦୁଇଜଣ ହେଲେ ୭୧ବର୍ଷୀୟ ପୁରୁଷ। ଉଭୟ ଭିନ୍ନ ଭିନ୍ନ କର୍କଟ ରୋଗରେ ମଧ୍ୟ ପୀଡ଼ିତ ଥିଲେ। ଗଞ୍ଜାମର ମୃତକ ହେଉଛନ୍ତି ଜଣେ ୮୦ବର୍ଷୀୟ ପୁରୁଷ। ସେ ମଧୁମେହ ଓ ହୃଦ୍ରୋଗରେ ପୀଡିତ ଥିଲେ। ସେହିଭଳି ଖୋର୍ଦ୍ଧାର ଜଣେ ୪୦ବର୍ଷୀୟ ମହିଳାଙ୍କ କରୋନାରେ ମୃତ୍ୟୁ ହୋଇଥିବା ଜଣାପଡ଼ିଛି। ଫଳରେ ରାଜ୍ୟରେ ଏବେ କରୋନାଜନିତ ମୃତ୍ୟୁସଂଖ୍ୟା ୭୪ରେ ପହଞ୍ଚତ୍ଛି।
ଅନ୍ୟପଟେ ରାଜ୍ୟରେ ଆଉ ୨୩ ଜିଲାରୁ ୫୪୩ ନୂଆ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ୩୫୪ଜଣ କ୍ୱାରାଣ୍ଟାଇନ୍ ସେଣ୍ଟରରୁ ଚିହ୍ନଟ ହୋଇଥିବାବେଳେ ୧୮୯ଜଣ ସ୍ଥାନୀୟ ଆକ୍ରାନ୍ତ ରହିଛନ୍ତି। ପ୍ରତିଦିନ ପରି ଏଥର ବି ଗଞ୍ଜାମ ଜିଲାରୁ ସର୍ବାଧିକ ୧୮୮ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ଫଳରେ ଏବେ ଏହି ଜିଲାରେ ମୋଟ ସଂକ୍ରମିତ ସଂଖ୍ୟା ୪,୩୩୫କୁ ବୃଦ୍ଧି ପାଇଛି। ସେହିପରି ଖୋର୍ଦ୍ଧା ଜିଲାରୁ ୮୭, ସୁନ୍ଦରଗଡ଼ ୫୨, କଟକ ୩୯, ଗଜପତି ୨୯, ରାୟଗଡ଼ା ୨୪, ମୟୂରଭଞ୍ଜ ଓ କେନ୍ଦୁଝରରୁ ୨୨ଜଣ ଲେଖାଏ, ଜଗତ୍ସିଂହପୁର ୧୫, ମାଲାକାନଗିରି ୧୧, କେନ୍ଦ୍ରାପଡ଼ା ୧୦, ବାଲେଶ୍ୱର ୮, ପୁରୀ ଓ ବୌଦ୍ଧରୁ ୭ଜଣ ଲେଖାଏ, ଝାରସୁଗୁଡ଼ା ୬, ବଲାଙ୍ଗୀର ୫, ବରଗଡ଼ ୩, ଢେଙ୍କାନାଳ ଓ ସମ୍ବଲପୁରରୁ ୨ଜଣ ଲେଖାଏ ଥିବାବେଳେ ଯାଜପୁର, ନୟାଗଡ଼, ଅନୁଗୋଳ ଓ ଭଦ୍ରକରୁ ଜଣେ ଲେଖାଏ ରହିଛନ୍ତି। ନୂଆ ଆକ୍ରାନ୍ତଙ୍କୁ ମିଶାଇ ରାଜ୍ୟରେ ମୋଟ ପଜିଟିଭ୍ ସଂଖ୍ୟା ୧୪,୨୮୦ ଛୁଇଁଛି।
