ବୌଦ୍ଧ,୪ା୨(ସ୍ବ.ପ୍ର.): ବୌଦ୍ଧ ଜିଲା ବାଉଁଶୁଣୀ ଥାନାର ବହିରା ହାଇସ୍କୁଲ ଛକଠାରେ ସାଧାରଣତନ୍ତ୍ର ଦିବସ ଦିନ ଏକ ସ୍କର୍ପିଓ ଦୁର୍ଘଟଣା ଘଟିଥିଲା। ଦୁର୍ଘଟଣାରେ ଜଣେ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଓ ଆଉ ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା। ଦୁର୍ଘଟଣା ପରେ ସ୍ଥାନୀୟ ଲୋକମାନେ ଗାଡ଼ି ଚାଳକ ଓ ଗାଡ଼ିରେ ବସିଥିବା ଲୋକଙ୍କୁ ମାଡ଼ ମାରିଥିଲେ ଓ ଗାଡ଼ିରେ ଥିବା ୧୫ ଲକ୍ଷ ୨୦ ହଜାର ଟଙ୍କା କେହି ଲୁଟ୍ କରିନେଇଥିଲେ। ଏହି ଘଟଣାରେ ବାଉଁଶୁଣୀ ପୋଲିସ ୪ ଜଣକୁ ଗିରଫ କରି କୋର୍ଟ ଚାଲାଣ କରିଛି।
ପୋଲିସ ସୂତ୍ରରୁ ମିଳିଥିବା ସୂଚନାନୁଯାୟୀ, ଦୁର୍ଘଟଣା ଗାଡ଼ିରେ ଉକ୍ତ ଦିନ ବଲାଙ୍ଗୀର ଜିଲା ତୁରକେଲା ଥାନାର ତେନ୍ତୁଳିଖୁଣ୍ଟା ଗ୍ରାମର ଇମ୍ରାନ ଖାନ ଓ ତାଙ୍କ ଡ୍ରାଇଭର ସୋନପୁର ପଟୁ ବୌଦ୍ଧ ଆଡ଼କୁ ଆସୁଥିବା ବେଳେ ଦୁର୍ଘଟଣା ହୋଇଥିଲା। ଦୁର୍ଘଟଣା ପରେ ସ୍ଥାନୀୟ ଲୋକଙ୍କ ମାଡ଼ରେ ଇମ୍ରାନ ଓ ଗାଡ଼ିଚାଳକ ଗୁରୁତର ହେବା ସହ ଚେତାଶୁନ୍ୟ ହୋଇପଡ଼ିଥିଲେ। ପରେ ଗାଡ଼ିରେ ଥିବା ୧୫ ଲକ୍ଷ ୨୦ ହଜାର ଟଙ୍କା ଲୁଟ୍ ହୋଇଥିଲା। ଇମ୍ରାନ ଭଲ ହେବା ପରେ ଗତ ୨୮.୧.୨୩ରେ ଟଙ୍କା ଚୋରି ହୋଇଥିବା ନେଇ ଥାନାରେ ଅଭିଯୋଗ କରିଥିଲେ। ଅଭିଯୋଗ ପରେ ବାଉାଁଶୁଣୀ ପୋଲିସ ଏକ ମାମଲା ୩୪/୨୩ରେ ରୁଜ କରି ତଦନ୍ତ ଆରମ୍ଭ କରିଥିଲା । ପୋଲିସ ତଦନ୍ତକୁ ଗମ୍ଭୀର ସହ ନେବା ସହ ଗତ ୩.୨.୨୩ରେ ଚୋରମାନଙ୍କୁ ଧରିବାରେ ସଫଳ ହୋଇଥିଲା। ଏହି ଚୋରି ଘଟଣାରେ ପୋଲିସ ବାଉଁଶୁଣୀ ଥାନାର କୁଳମଣି ମେହେର (୨୭), ବହିରା ଗ୍ରାମର ସୁରେଶ ଚନ୍ଦ୍ର ରଣା (୩୧) , ହେମାନନ୍ଦ ନାଏକ (୨୫) କିସାନ ନାଏକ ( ୨୫), ଓ ନିଳାଦ୍ରୀ ନାଏକ। ପୋଲିସ ଅଭିଯୁକ୍ତମାନଙ୍କ ଠାରୁ ୧୫ ଲକ୍ଷ ୧୫ ହଜାର ଟଙ୍କା ଜବତ କରିବା ସହ ଶନିବାର କୋର୍ଟ ଚାଲାଣ କରିଛି।
