ପୁରୀ,୨ ।୮(ଅଜିତ ମହାନ୍ତି): ମହାପ୍ରଭୁଙ୍କ ବନକଲାଗି ନୀତିକୁ ନେଇ ଦୀର୍ଘ ୧ ମାସ ଧରି ଲାଗିରହିଥିବା ବିବାଦ ଅନିଶ୍ଚିତତା ମଧ୍ୟରେ ରହିଛି। ନୀଳାଦ୍ରି ବିଜେ ପରଠାରୁ ହୋଇ ନ ଥିବା ବନକଲାଗି ନୀତି ଆସନ୍ତା ୯ତାରିଖ(ବୁଧବାର)ରେ ହୋଇପାରେ ବୋଲି ବିଶେଷ ସୂତ୍ରରୁ ସୂଚନା ମିଳିଛି। ଏ ନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ବିଧିବଦ୍ଧ ଭାବେ କୁହାଯାଇ ନାହିଁ। ଏପରି କି ପ୍ରଶାସନ ତାଙ୍କୁ ଯେଉଁଦିନ ବନକଲାଗି କରିବା ପାଇଁ ନିର୍ଦ୍ଦେଶ ଦେବ, ସେମାନେ ମାନିବେ
ବୋଲି କହିଛନ୍ତି। ସୂଚନାଯୋଗ୍ୟ, ନୀଳାଦ୍ରି ବିଜେ ପରେ ମହାପ୍ରଭୁଙ୍କ ବନକଲାଗି ହେବା କଥା। ମାତ୍ର କେଉଁବାରରେ ମହାପ୍ରଭୁଙ୍କ ବନକଲାଗି ହେବ ତାକୁ ନେଇ ଦତ୍ତ ମହାପାତ୍ର ନିଯୋଗ ଏବଂ ଶ୍ରୀମନ୍ଦିର ପ୍ରଶାସନ ମଧ୍ୟରେ ବିବାଦ ଦେଖାଦେଇଥିଲା। ଦତ୍ତମହାପାତ୍ର ସେବକମାନେ ରେକର୍ଡ ଅଫ୍ ରାଇଟସ୍ ଅନୁଯାୟୀ ବନକଲାଗି ଗୁରୁବାର କରିବାକୁ କହୁଥିବା ବେଳେ ୨୦୧୮ ମସିହାରେ ଅନୁଷ୍ଠିତ ହୋଇଥିବା ପରିଚାଳନା କମିଟିର ନିଷ୍ପତ୍ତି ଅନୁଯାୟୀ ବୁଧବାର ବନକଲାଗି କରିବା ପାଇଁ ପ୍ରଶାସନ କହିଥିଲା। ଉଭୟ ନିଜ ଜିଦରେ ଅଟଳ ରହିଥିଲେ। ଫଳରେ ପ୍ରଶାସନ ପକ୍ଷରୁ ଦତ୍ତ ମହାପାତ୍ର ନିଯୋଗକୁ ନୋଟିସ କରାଯାଇଥିଲା। ଏପରିକି ବନକଲାଗି ପାଇଁ ଗୁରୁବାର ଯାଇଥିବା ଦତ୍ତମହାପାତ୍ର ସେବକମାନଙ୍କୁ ପ୍ରଶାସନ ପକ୍ଷରୁ କୌଣସି ନିର୍ଦ୍ଦେଶ ନ ଥିବାରୁ ଫେରିବାକୁ ପଡ଼ିଥିଲା। ବିବାଦ ଅଧିକ ବଢ଼ିବାରୁ ନୀତି ସବ୍କମିଟି ବୈଠକ କରାଯାଇ ଆଲୋଚନା ହୋଇଥିଲା। ମାତ୍ର ଉକ୍ତ ବୈଠକରେ ମଧ୍ୟ କୌଣସି ନିଷ୍କର୍ସ ବାହାରି ନ ଥିଲା। ତେଣୁ ମଙ୍ଗଳବାର ପରିଚାଳନା କମିଟି ବୈଠକରେ ସମସ୍ୟାର ସମାଧାନ ହେବ ବୋଲି ଆଶ କରାଯାଇଥିଲା। କିନ୍ତୁ କୌଣସି କାରଣରୁ ପରିଚାଳନା କମିଟି ବୈଠକ ମଙ୍ଗଳବାର ସ୍ଥଗିତ ରହିଥିଲା। ଅପରପକ୍ଷେ ନୀତି ସବ୍କମିଟ୍ି ବୈଠକ ପରେ ଦତ୍ତ ମହାପାତ୍ରମାନେ ନରମିଥିବା ପରିଲିଖିତ ହୋଇଥିଲା। ପରେ ପ୍ରଶାସନ ଯାହା ନିର୍ଦ୍ଦେଶ ଦେବ ସେହି ଦିନ ବନକଲାଗି କରିବେ ବୋଲି ସୂଚନା ଦେଇଥିଲେ। ଏ ନେଇ ସେମାନେ ପ୍ରଶାସନକୁ ଲିଖିତ ଭାବରେ ଜଣାଇଛନ୍ତି।
ବୁଧବାର ବନକଲାଗି ହେବା ସମ୍ପର୍କରେ ନୀତି ପ୍ରଶାସନ ଜିତେନ୍ଦ୍ର ସାହୁ କହିଛନ୍ତି, ୨ ତାରିଖ ବୁଧବାର ଶ୍ରୀମନ୍ଦିରରେ ନକ୍ଷତ୍ର ବନ୍ଦାପନା ଥିବାରୁ ମହାପ୍ରଭୁଙ୍କ ବନକଲାଗି ହୋଇପାରିବ ନାହିଁ। ସେହିପରି ୩ ତାରିଖ ଗୁରୁବାର ମାଜଣା ଏବଂ ଏକାନ୍ତ ନୀତି ରହୁଥିବାରୁ ବନକଲାଗି ନୀତିରେ ବିଳମ୍ବ ପରିଲିଖିତ ହେବାକୁ ଥିବାରୁ ସେଦିନ ବି ନୀତି ହେବା ସମ୍ଭବ ନୁହେଁ। ତେଣୁ ଆସନ୍ତା ୯ ତାରିଖ ବୁଧବାର ବନକଲାଗି କରାଯିବ। ହେଲେ ନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ କୌଣସି ଲିଖିତ ଭାବେ ନିର୍ଦ୍ଦେଶ ଦିଆଯାଇନାହିଁ। ଅନ୍ୟପଟେ ଦତ୍ତ ମହାପାତ୍ର ନିଯୋଗର ସମ୍ପାଦକ ମଦନମୋହନ ଦତ୍ତମହାପାତ୍ର କହିଛନ୍ତି, ପ୍ରଶାସନ ଯେବେ ତାଙ୍କୁ ମହାପ୍ରଭୁଙ୍କ ବନକଲାଗି ପାଇଁ ନିର୍ଦ୍ଦେଶ ଦେବ, ସେମାନେ ମହାପ୍ରଭୁଙ୍କ ବନକଲାଗି କରିବୁ। ୯ ତାରିଖରେ ବନକଲାଗି ପାଇଁ ପ୍ରସ୍ତୁତ ରହିଛୁ। ଏଠାରେ ପ୍ରଶ୍ନ ଉଠୁଛି ଶ୍ରୀମନ୍ଦିର ମୁଖ୍ୟ ପ୍ରଶାସକ ପୂର୍ବରୁ କହିଥିଲେ, ଯଦି ବୁଧବାର କୌଣସି ବିଶେଷ ନୀତି ରୁହେ, ତେବେ ଗୁରୁବାର ବନକଲାଗି କରାଯିବ। ତେବେ ଚଳିତ ବୁଧବାର ନକ୍ଷତ୍ର ବନ୍ଦାପନା ଥିବାରୁ ମହାପ୍ରଭୁଙ୍କ ବନକଲାଗି ହେବ ନାହିଁ। ମାତ୍ର ଗୁରୁବାର ବନକଲାଗି ନକରି ପୁଣି ଗୋଟିଏ ସପ୍ତାହ ଘୁଞ୍ଚାଇବାର କାରଣ କ’ଣ ବୋଲି ସାଧାରଣରେ ଚର୍ଚ୍ଚା ହେଉଛି। ପ୍ରଶାସନ ପକ୍ଷରୁ ଗୁରୁବାର ମାଜଣା ଏକାନ୍ତ ନୀତି ଥିବା ଦର୍ଶାଇ ବୁଧବାର ବନକଲାଗି କରିବା ପାଇଁ ସ୍ଥିର କରିଥିବା ନେଇ ଆଲୋଚନା ହେଉଛି।
