ମାଲକାନଗିର,୮ା୮ (ଡି.ଏନ୍.ଏ.):ଦଶ ବର୍ଷରୁ ଉର୍ଦ୍ଧ୍ୱ ହେବ ମାଓବାଦୀମାନେ ଜୁଲାଇ ୨୮ ତାରିଖରୁ ଅଗଷ୍ଟ ୩ ପର୍ଯ୍ୟନ୍ତ ସେମାନଙ୍କ ଶହୀଦ ସପ୍ତାହ ପାଳନ କରୁଥିଲେ। ଏହି ଅବସରରେ ସେମାନେ ବିଭିନ୍ନ ସ୍ଥାନରେ ସ୍ତୁପ ନିର୍ମାଣ କରି ଶହୀଦ ହୋଇଥିବା ମାଓବାଦୀମାନଙ୍କ ପ୍ରତି ଶ୍ରଦ୍ଧାଞ୍ଜଳି ଜଣାଇଥାନ୍ତି। ଏଥିସହ ନାଚଗୀତ କରି ଯୁବଗୋଷ୍ଠୀଙ୍କୁ ପ୍ରବତାଇ ମାଓବାଦୀ ସଙ୍ଗଠନରେ ସାମିଲ କରିବା, ବିଭିନ୍ନ ସ୍ଥାନରେ ଗଛ କାଟି ରାସ୍ତା ଅବରୋଧ କରିବା, ପୋଷ୍ଟର ବ୍ୟାନର ଲଗାଇବା, ଗାଡି ପୋଡିବା, ପୋଲିସ ଉପରେ ଆକ୍ରମଣ କରିବା, ଲ୍ୟାଣ୍ଡମାଇନ ବିସ୍ଫୋରଣ କରିବା ଭଳି ହିଂସା ଘଟାଇଥାନ୍ତି। ତେବେ ଗତ ତିନିବର୍ଷ ହେଲା କୋରାପୁଟ ଓ ମାଲକାନଗିରି ଜିଲାରେ ବିଏସ୍ଏଫ୍ ଯବାନଙ୍କ କ୍ୟାମ୍ପ ପ୍ରତିଷ୍ଠା ସେମାନଙ୍କ କାର୍ଯ୍ୟରେ ରୋକୋ ଲଗାଇଛି। ସେବେଠାରୁ ମାଓବାଦୀଙ୍କ ପ୍ରଭାବ କମିବାରେ ଲାଗିଛି। ଗତବର୍ଷ ସେମାନେ ଶହୀଦ ସପ୍ତାହରେ ସେପରି କୌଣସି ହିଂସାକାଣ୍ଡ ଘଟାଇ ନ ଥିଲେ ମଧ୍ୟ ବିଭିନ୍ନ ସ୍ଥାନରେ ପୋଷ୍ଟର ବ୍ୟାନର ଲଗାଇବା, ରାସ୍ତା ଅବରୋଧ କରିବା ଭଳି କାର୍ଯ୍ୟ କରିଥିଲେ। ତେବେ ଚଳିତବର୍ଷ କୋରାପୁଟ ଓ ମାଲକାନଗିରି ଜିଲାର କୌଣସି ସ୍ଥାନରେ ମାଓବାଦୀ ପୋଷ୍ଟର, ବ୍ୟାନର ଲଗାଯାଇନାହିଁ କି ଅସ୍ଥାୟୀ ସ୍ତୁପ ମଧ୍ୟ ନିର୍ମାଣ ହୋଇନାହିଁ। କୌଣସି ସ୍ଥାନରେ ଗଛ କାଟି ରାସ୍ତା ଅବରୋଧ ମଧ୍ୟ କରାଯାଇ ନ ଥିବା ଜଣାପଡିଛି। ଅନ୍ୟପକ୍ଷରେ ଗତବର୍ଷ ଶହୀଦ ସପ୍ତାହଠାରୁ ଚଳିତବର୍ଷ ଶହୀଦ ସପ୍ତାହ ମଧ୍ୟରେ ୩ଜଣ ମାଓବାଦୀଙ୍କ ମୃତ୍ୟୁ ହୋଇଛି। ସେମାନେ ହେଲେ ଆନ୍ଧ୍ର ଓଡ଼ିଶା-ବର୍ଡର ଜୋନାଲ କମିଟିର ଆକ୍କିରାଜୁ ହରଗୋପାଲ, ଦେବା ମାଢି ଓ ମୁକା ସୋଡି। ଗତ ୧୪ା୧୦ା୨୦୨୧ରେ ଦେବାଙ୍କ ପୋଲିସ ଗୁଳିରେ ମୃତ୍ୟୁ ଘଟିଥିବା ବେଳେ ବୈପାରିଗୁଡା ଓରିଆ କମିଟି ସମ୍ପାଦକ ଦେବାଙ୍କ ୧୬ା୬ା୨୦୨୧ରେ ଆନ୍ଧ୍ରପ୍ରଦେଶ ବିଶାଖାପାଟଣା ଜିଲାର ତେଗଲମେଟା ଗ୍ରାମରେ ଏନକାଣ୍ଟଟରରେ ମୃତ୍ୟୁ ଘଟିଥିଲା। ସେହିପରି ଗୁମ୍ମା ଏରିଆ କମିଟିର ଏନ୍ସିଏମ୍ ମୁକାଙ୍କ ୧୨ା୧୦ା୨୦୨୧ରେ ମାଲକାନଗିରି ଜିଲା ତୁଳସୀ ଜଙ୍ଗଲରେ ହୋଇଥିବା ଏନକାଣ୍ଟରରେ ମୃତ୍ୟୁ ହୋଇଥିଲା। ଏମାନଙ୍କ ପାଇଁ ମଧ୍ୟ ଶହୀଦ ସପ୍ତାହରେ କୌଣସି ସ୍ତୁପ ନିର୍ମାଣ ହୋଇନାହିଁ ବୋଲି ଓଡିଶା ପୋଲିସ ପ୍ରଶାସନ ପକ୍ଷରୁ କୁହାଯାଇଛି। ଏଥିରୁ ସଷ୍ଟ ଯେ, କୋରାପୁଟ ଓ ମାଲକାନଗିରି ଜିଲାରେ ମାଓବାଦୀଙ୍କ କାର୍ଯ୍ୟକଳାପ ୯୦ପ୍ରତିଶତ କମିଯାଇଛି ବୋଲି ମାଲକାନଗିରି ଏସ୍ପି ନିତେଶ ଓ୍ବାଧଓ୍ବାନୀ ପ୍ରେସ ବିଜ୍ଞପ୍ତି ମାଧ୍ୟମରେ ପ୍ରକାଶ କରିଛନ୍ତି ।
