ପାରାଦୀପ,୨୧ା୧୦(ଶରତ ରାଉତ): ମୁମ୍ବାଇରେ ଗତ ୧୭ରୁ ଚାଲିଥିବା ୩ ଦିନିଆ ମାରିଟାଇମ୍ ଅମୃତକାଳ ମହୋତ୍ସବ ଗୁରୁବାର ସାରେ ଶେଷ ହୋଇଛି। ଏହି ଅବସରରେ କୁହାଯାଇଥିଲା, ୨୦୪୭ ସୁଦ୍ଧା ମାରିଟାଇମ୍ର କଳେବର ବୃଦ୍ଧି ପାଇଁ ଲକ୍ଷ୍ୟ ରଖାଯାଇଛି। ଅମୃତକାଳ ମଧ୍ୟରେ ପ୍ରାୟ ୧୦ ଲକ୍ଷ କୋଟି ଟଙ୍କା ପୁଞ୍ଜି ନିବେଶ ହେବ ବୋଲି ଖସଡ଼ା ପ୍ରସ୍ତୁତ କରାଯାଇଛି। ଏଥିରେ ପିପିଏ (ପାରାଦୀପ ପୋର୍ଟ ଅଥରିଟି)ର ନୂତନ ପ୍ରକଳ୍ପ ନିମନ୍ତେ ୯ ହଜାର କୋଟି ଟଙ୍କାର ପୁଞ୍ଜି ନିବେଶ କରାଯିବ। ଏ ସବୁ ପ୍ରକଳ୍ପ ମଧ୍ୟରେ ୧୦ ନିୟୁତ କ୍ଷମତାବିଶିଷ୍ଟ ଲୁହାପଥର ବୋଝେଇ ଖଲାସ ବର୍ଥ ରହିଛି। ଏହା ବିଓଟି (ବିଲ୍ଡ ଅପରେଟ୍ ଟ୍ରାନ୍ସଫର) ବେସିସ୍ରେ ହେବ। ଏଥିପାଇଁ ୬୫୫.୫୬ କୋଟି ଟଙ୍କା ପୁଞ୍ଜି ନିବେଶ ହେବ। ସେହିପରି ୧୪୩୭.୭୬ କୋଟି ଟଙ୍କା ବ୍ୟୟରେ ଇକ୍ୟୁ ୧,୨,୩ ନମ୍ବର ବର୍ଥକୁ ଯାନ୍ତ୍ରିକୀକରଣ କରାଯିବ। ଏହାଦ୍ୱାରା ବାର୍ଷିକ ୩୦ ନିୟୁତ ଟନ୍ ପଣ୍ୟ କାରବାର ହେବ। କୋଇଲା ବର୍ଥ ପାଇଁ ୬୫୫.୫୬ କୋଟି ଟଙ୍କା, ୮୨ କିମି ପାରାଦୀପ ହରିଦାସପୁର ରେଳଲାଇନ ବିକାଶ ପାଇଁ ୩୨୦୦ କୋଟି ଟଙ୍କା ଏବଂ ୱେଷ୍ଟର୍ନ ଡକ୍ ପାଇଁ ୩୦୦୪ କୋଟି ଟଙ୍କା ବ୍ୟୟ ହେବ। ଏହି ମାରିଟାଇମ୍ ସମ୍ମିଳନୀକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓ କନ୍ଫରେନ୍ସି ଜରିଆରେ ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ଅର୍ଥମନ୍ତ୍ରୀ ନିର୍ମଳା ସୀଥାରମଣ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ପୀୟୂଷ ଗୋୟେଲ, ସର୍ବାନନ୍ଦ ସୋନୱାଲ, ଗୁଜରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ରଭାଇ ପଟେଲ, ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସ, କେନ୍ଦ୍ର ରାଜ୍ୟମନ୍ତ୍ରୀ ଶ୍ରୀପଦ ନାୟକ, ଶାନ୍ତନୁ ଠାକୁର ପ୍ରମୁଖ ଉପସ୍ଥିତ ଥିଲେ। ଏହି ଅବସରରେ ପାରାଦୀପ ବନ୍ଦର କେତେକ କ୍ଷେତ୍ରରେ ଉଲ୍ଲେଖନୀୟ ସଫଳତା ପାଇଁ ପୁରସ୍କୃତ ହୋଇଥିଲା। ବନ୍ଦର ଅଧ୍ୟକ୍ଷ ପି.ଏଲ. ହାରାନ୍ଧ, ଉପାଧ୍ୟକ୍ଷ ନୀଳାଭ୍ର ଦାସଗୁପ୍ତା କେନ୍ଦ୍ରମନ୍ତ୍ରୀ ଗୋୟେଲଙ୍କଠାରୁ ପୁରସ୍କାର ଗ୍ରହଣ କରିଥିଲେ।
