ଭୁବନେଶ୍ୱର,୨୨ା୮(ଅନିଲ ଦାସ):ରାଜ୍ୟରେ ଶିଳ୍ପକୁ ପ୍ରୋତ୍ସାହନ ଦେବା ସହ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବା ଲକ୍ଷ୍ୟରେ ରାଜ୍ୟ ସରକାର ସୋମବାର ୮୭୩.୫୭ କୋଟି ଟଙ୍କାର ୯ଟି ଶିଳ୍ପ ପ୍ରକଳ୍ପକୁ ମଞ୍ଜୁର କରିଛନ୍ତି। ଏହି ପ୍ରକଳ୍ପ କାର୍ଯ୍ୟକ୍ଷମ ହେଲେ ରାଜ୍ୟର ୨ ହଜାର ୫୧୬ ଜଣଙ୍କୁ ନିଯୁକ୍ତି ମିଳିପାରିବ। ସୋମବାର ସଚିବାଳୟଠାରେ ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଷ୍ଟେଟ୍ ଲେଭଲ୍ ସିଙ୍ଗଲ୍ ଓ୍ବିଣ୍ଡୋ କ୍ଲିୟରାନ୍ସ ଅଥରିଟି (ଏସ୍ଏଲ୍ଏସ୍ଡବ୍ଲ୍ୟୁସିଏ) ବୈଠକରେ ଇସ୍ପାତ, ପ୍ଲାଷ୍ଟିକ୍, ଅକ୍ଷୟ ଶକ୍ତି, ଖାଦ୍ୟ ପ୍ରକ୍ରିୟାକରଣ ଓ ପର୍ଯ୍ୟଟନ ଭଳି ଶିଳ୍ପ ପ୍ରକଳ୍ପକୁ ଅନୁମୋଦନ କରାଯାଇଛି।
ବୈଠକରୁ ମିଳିଥିବା ସୂଚନା ଅନୁଯାୟୀ, ବିକ୍ରମ ପ୍ରାଇଭେଟ ଲିମିଟେଡ୍ ସୁନ୍ଦରଗଡ଼ ଜିଲାର ଲହୁଣିପଡ଼ାଠାରେ ୧୦୦ କୋଟି ଟଙ୍କା ବ୍ୟୟରେ ଏକ ଇସ୍ପାତ ଶିଳ୍ପ ସ୍ଥାପନ କରିବ। ଏଥିରେ ୮୧୯ ଜଣଙ୍କୁ ନିଯୁକ୍ତି ମିଳିବ। ଏଥିସହିତ ଟିଆରଏଲ କ୍ରୋସାକି ରିଫ୍ରାକ୍ଟୋରିଜ ପ୍ରାଇଭେଟ୍ ଲିମିଟେଡ୍ ଝାରସୁଗୁଡାରେ ୧୦୦ କୋଟି ପୁଞ୍ଜି ବିନିଯୋଗରେ ଏକ ଇସ୍ପାତ(ଆନ୍ସିଲାରି) ଶିଳ୍ପ ସ୍ଥାପନ କରିବ। ଏଥିରେ ୧୫୦ ଜଣଙ୍କୁ ନିଯୁକ୍ତି ମିଳିବ। ଏହାର ବାର୍ଷିକ ଉତ୍ପାଦନ କ୍ଷମତା ୫୭ ହଜାର ନିୟୁତ ଟନ୍ ହେବ। ସେହିପରି ସୁନ୍ଦରଗଡ଼ ଜିଲାର କୁଅଁାରମୁଣ୍ଡାଠାରେ ଚଉସୁନ ସର୍ଭେଶ ରିଫ୍ରାକ୍ଟୋରିଜ୍ ୫୦.୩୫ କୋଟି ବିନିଯୋଗରେ ଏକ ଇସ୍ପାତ(ଆନ୍ସିଲାରି) ଶିଳ୍ପ ସ୍ଥାପନ କରିବ। ଏହି ଶିଳ୍ପ କାର୍ଯ୍ୟକ୍ଷମ ହେଲେ ୮୫ ଜଣଙ୍କୁ ନିଯୁକ୍ତି ମିଳିବ। ଚଉସୁନ ହେଉଛି ଏକ ଦକ୍ଷିଣ କୋରିଆ କମ୍ପାନୀ। କମ୍ପାନୀ ପକ୍ଷରୁ ସେଠାରେ ୧୪ ହଜାର ୪୦୦ ନିୟୁତ ଟନ୍ ଟାପ ହୋଲ କ୍ଲେ ୟୁନିଟ୍ ସ୍ଥାପନ କରାଯିବ।
ସାଇଜାର ଏଣ୍ଟରପ୍ରାଇଜ୍ ପ୍ରାଇଭେଟ୍ ଲିମିଟେଡ୍ ଯାଜପୁର ଜିଲାର କଳିଙ୍ଗନଗରଠାରେ ୮୯ କୋଟି ଟଙ୍କା ବିନିଯୋଗରେ ଇସ୍ପାତ(ଡାଉନ୍ଷ୍ଟ୍ରିମ) ଶିଳ୍ପ ସ୍ଥାପନ କରିବ। ଏଥିରେ ୨୫୦ ଜଣଙ୍କୁ ନିଯୁକ୍ତି ମିଳିବ। କମ୍ପାନୀ ପକ୍ଷରୁ ଉକ୍ତ ପ୍ରକଳ୍ପରେ ଏଚ୍ଆର ଓ ସିଆର କଏଲ ପାଇଁ ଷ୍ଟିଲ ପ୍ରୋସେସିଂ ୟୁନିଟ୍ ସ୍ଥାପନ କରାଯିବ। ଏହିସବୁ ଇସ୍ପାତ ପ୍ରକଳ୍ପଗୁଡ଼ିକୁ ଏସ୍ଏଲ୍ଏସ୍ଡବ୍ଲ୍ୟୁସିଏ ଅନୁମୋଦନ କରିଛି।
ସେହିପରି ପେଟ୍ରୋନେଟ ଏଲ୍ଏନ୍ଜି ଲିମିଟେଡ୍ ଦେବଗଡ଼ ଜିଲାରେ ଏକ ଅଣପାରମ୍ପରିକ ଶକ୍ତି ତଥା ରୟାସନ ଶିଳ୍ପ ସ୍ଥାପନ କରିବ। ଏହି ପ୍ରକଳ୍ପରେ କମ୍ପାନୀ ୮୫ କୋଟି ପୁଞ୍ଜି ବିନିଯୋଗ କରିବା ପ୍ରସ୍ତାବ ଦେଇଛି। ଏହି ପ୍ରକଳ୍ପ କାର୍ଯ୍ୟକ୍ଷମ ହେଲେ ୫୩ ଜଣଙ୍କୁ ନିଯୁକ୍ତି ସୁଯୋଗ ମିଳିପାରିବ। ଏହାର ବାର୍ଷିକ ଉତ୍ପାଦନ କ୍ଷମତା ୩୩,୦୬୫ ମେଟ୍ରିକ୍ ଟନ୍ ହେବ। ଏହି ଶିଳ୍ପ ଉଭୟ ଅଣପାରମ୍ପରିକ ଶକ୍ତି ଉତ୍ପାଦନ ସହ କମ୍ପ୍ରେସିଭ୍ ବାୟୋଗ୍ୟାସ୍ ଏବଂ ଅର୍ଗାନିକ୍ ଖତ ପ୍ରସ୍ତୁତ କରିବ।
ଜଗତ୍ସିଂହପୁର ଜିଲା ପାରାଦୀପ ପ୍ଲାଷ୍ଟିକ୍ ପାର୍କରେ ପିୟର୍ଲ ପ୍ରେସିୟନ ପ୍ରଡକ୍ଟସ୍ ପ୍ରା. ଲି. ପକ୍ଷରୁ ୧୦୦.୭୪ କୋଟି ଟଙ୍କାର ପ୍ଲାଷ୍ଟିକ୍ ପ୍ରକଳ୍ପ ସ୍ଥାପନ କରାଯିବ। ଏଥିରେ ୭୦୦ ଜଣଙ୍କୁ ନିଯୁକ୍ତି ମିଳିବ। ଏହି ଶିଳ୍ପରେ ପ୍ଲାଷ୍ଟିକ୍ ଓ୍ବାଟର ଟ୍ୟାଙ୍କ, ପାଇପ୍, ଫିଟିଂସ୍ ଇତ୍ୟାଦି ନିର୍ମାଣ ହେବ। ଏହାର ବାର୍ଷିକ ଉତ୍ପାଦନ କ୍ଷମତା ୩୦ ନିୟୁତ ଟନ୍ ରହିବ। ସେହିପରି ଖୋର୍ଦ୍ଧାଠାରେ ଇଣ୍ଡୋପେଟ୍ ପଲିପ୍ଲାଷ୍ଟ ପ୍ରା. ଲି. ପକ୍ଷରୁ ୮୦ କୋଟି ଟଙ୍କା ବ୍ୟୟରେ ଏକ ପ୍ଲାଷ୍ଟିକ୍ ଫ୍ୟାକ୍ଟ୍ରି ସ୍ଥାପନ କରାଯିବ। ଏଥିରେ ୧୫୦ ଜଣଙ୍କୁ ନିଯୁକ୍ତି ସୁଯୋଗ ମିଳିବ। ଏହି ପ୍ରକଳ୍ପରେ ବଟଲ, ଜାର୍ ଇତ୍ୟାଦି ଉତ୍ପାଦନ ହେବ। ଏହାର ବାର୍ଷିକ ଉତ୍ପାଦନ କ୍ଷମତା ୮ ହଜାର ମେଟ୍ରିକ୍ ଟନ୍ ହେବ।
ନବରଙ୍ଗପୁର ଜିଲାରେ ସ୍ଥାପନ ହେବାକୁ ଥିବା କୃଷି ଓ ଖାଦ୍ୟ ପ୍ରକ୍ରିୟାକରଣ ଶିଳ୍ପକୁ ଏସ୍ଏଲ୍ଏସ୍ଡବ୍ଲ୍ୟୁସିଏ ଅନୁମୋଦନ କରିଛି। କୋଷ୍ଟାଲ ବାୟୋଟେକ୍ ପ୍ରାଇଭେଟ ଲିମିଟେଡ୍ ୫୩.୮ କୋଟି ଟଙ୍କା ବିନିଯୋଗରେ କୃଷି ଓ ଖାଦ୍ୟ ପ୍ରକ୍ରିୟାକରଣ ଶିଳ୍ପ ସ୍ଥାପନ କରିବ। ଏଥିରେ ୮୨ ଜଣଙ୍କୁ ନିଯୁକ୍ତି ମିଳିପାରିବ। ନବରଙ୍ଗପୁର ଜିଲାରେ ମକା ଉତ୍ପାଦନ ଅଧିକ ହୋଇଥାଏ। ଏହି ଶିଳ୍ପ ସ୍ଥାପନ ଦ୍ୱାରା ସେହି ଜିଲାର କୃଷକମାନଙ୍କୁ ଫାଇଦା ମିଳିବ ବୋଲି ସରକାର ଆଶା ରଖିଛନ୍ତି। ସେହିପରି ପର୍ଯ୍ୟଟନ କ୍ଷେତ୍ରକୁ ବ୍ୟାପକ କରିବାକୁ ରାଜ୍ୟ ସରକାର ହୋଟେଲ ଶିଳ୍ପ ଉପରେ ଗୁରୁତ୍ୱ ଦେଉଛନ୍ତି। ଗଞ୍ଜାମ ଜିଲାର ଚିକିଟିଠାରେ ଏସ୍ଏନ୍ଏମ୍ ହୋଟେଲ ଆଣ୍ଡ ରିସର୍ଟ ପକ୍ଷରୁ ୨୧୪ .୫୦ କୋଟି ଟଙ୍କା ବିନିଯୋଗରେ ଏକ ହୋଟେଲ ଓ ରିସର୍ଟ ନିର୍ମାଣ କରାଯିବ। ଏଥିରେ ୨୨୭ ଜଣଙ୍କୁ ନିଯୁକ୍ତି ମିଳିପାରିବ। ଏସ୍ଏଲ୍ଏସ୍ଡବ୍ଲ୍ୟୁସିଏ ବୈଠକରେ ଉକ୍ତ ପ୍ରକଳ୍ପକୁ ମଧ୍ୟ ଅନୁମୋଦନ କରାଯାଇଛି।
