ନୂଆଦିଲ୍ଲୀ, ୧୨ା୩: ଉଚ୍ଚଶିକ୍ଷାକୁ ନେଇ ବିଶ୍ଳେଷଣ କରୁଥିବା ସଙ୍ଗଠନ ‘କ୍ୟୁଏସ୍’ ପକ୍ଷରୁ ବୁଧବାର ‘କ୍ୟୁଏସ୍ ଓ୍ବାଲର୍ଡ ୟୁନିଭର୍ସିଟି ର଼୍ୟାଙ୍କିଙ୍ଗ୍ସ ୨୦୨୫’ର ତାଲିକା ଜାରି କରାଯାଇଛି। କ୍ୟୁଏସ୍ ପକ୍ଷରୁ ଜାରି ଏହି ବିଷୟଭିତ୍ତିିକ ବିଶ୍ୱର ଶ୍ରେଷ୍ଠ ୫୦ ବିଶ୍ୱବିଦ୍ୟାଳୟ ର଼୍ୟାଙ୍କିଙ୍ଗ୍ରେ ଭାରତର ୯ ବିଶ୍ୱବିଦ୍ୟାଳୟ ଏବଂ ଅନୁଷ୍ଠାନର ନାମକୁ ଅନ୍ତର୍ଭୁକ୍ତ କରାଯାଇଛି।
ତେବେ ଗତବର୍ଷ ତୁଳନାରେ ଏହି ତାଲିକାରେ ରହିଥିବା ଭାରତର ୩ଟି ଇଣ୍ଡିଆନ୍ ଇନ୍ଷ୍ଟିଟ୍ୟୁଟ୍ ଅଫ୍ ଟେକ୍ନୋଲୋଜି(ଆଇଆଇଟି), ୨ଟି ଇଣ୍ଡିଆନ୍ ଇନ୍ଷ୍ଟିଟ୍ୟୁଟ୍ ଅଫ୍ ମ୍ୟାନେଜ୍ମେଣ୍ଟ (ଆଇଆଇଏମ୍) ଏବଂ ଜବାହରଲାଲ ନେହେରୁ ୟୁନିଭର୍ସିଟି(ଜେଏନ୍ୟୁ)ର ର଼୍ୟାଙ୍କିଙ୍ଗ୍ରେ ହ୍ରାସ ଘଟିଛି। କ୍ୟୁଏସ୍ ଓ୍ବାଲର୍ଡ ୟୁନିଭର୍ସିଟି ର଼୍ୟାଙ୍କିଙ୍ଗ୍ସର ଏହି ୧୫ତମ ସଂସ୍କରଣରେ ବିଷୟଭିତ୍ତିକ ର଼୍ୟାଙ୍କିଙ୍ଗ୍ ଏବଂ ବ୍ୟାପକ ଅଧ୍ୟାପନା କ୍ଷେତ୍ରରେ ଭାରତ ୧୨ଶ ସ୍ଥାନ ଅଧିକାର କରିଛି।
ଇଞ୍ଜିନିୟରିଂ-ମିନେରାଲ୍ସ ଏବଂ ମାଇନିଂ ବିଷୟ ପାଇଁ ଧାନବାଦ୍ସ୍ଥିତ ଇଣ୍ଡିଆନ୍ ସ୍କୁଲ୍ ଅଫ୍ ମାଇନିଂ(ଆଇଏସ୍ଏମ୍) ବିଶ୍ୱସ୍ତରରେ ୨୦ତମ ସ୍ଥାନ ହାସଲ କରିଛି। ଇଞ୍ଜିନିୟରିଂ-ମିନେରାଲ୍ସ ଏବଂ ମାଇନିଂ ବିଷୟ ପାଇଁ ଆଇଆଇଟି ବମ୍ବେ ଏବଂ ଖଡ଼ଗପୁର ଯଥାକ୍ରମେ ୨୮ତମ ଏବଂ ୪୫ତମ ସ୍ଥାନରେ ରହିଛନ୍ତି।
ତେବେ ଗତବର୍ଷର ର଼୍ୟାଙ୍କିଙ୍ଗ୍ ଅନୁଯାୟୀ ଉଭୟ ଅନୁଷ୍ଠାନର ପ୍ରଦର୍ଶନରେ ସାମାନ୍ୟ ହ୍ରାସ ଘଟିଛି। ଇଞ୍ଜିନିୟରିଂ ଏବଂ ଟେକ୍ନୋଲୋଜି ବିଷୟ ପାଇଁ ଆଇଆଇଟି ଦିଲ୍ଲୀ ଏବଂ ବମ୍ବେ ଯଥାକ୍ରମେ ୨୬ତମ ଏବଂ ୨୮ତମ ସ୍ଥାନରେ ରହିଛନ୍ତି। ଗତବର୍ଷଠାରୁ ଉଭୟ ଅନୁଷ୍ଠାନର ପ୍ରଦର୍ଶନରେ ସୁଧାର ଆସିଛି।
ଗତବର୍ଷ ଏହି ୨ ଉଚ୍ଚ ଶିକ୍ଷାନୁଷ୍ଠାନ ଯୁଗ୍ମ ଭାବେ ୪୫ତମ ସ୍ଥାନରେ ରହିଥିଲେ। ଇଲେକ୍ଟ୍ରିକାଲ ଇଞ୍ଜିନିୟରିଂ ଏବଂ ଇଲେକ୍ଟ୍ରୋନିକ୍ସରେ ମଧ୍ୟ ଉଭୟ ଆଇଆଇଟି ଦିଲ୍ଲୀ ଏବଂ ବମ୍ବେ ନିଜ ପ୍ରଦର୍ଶନରେ ସୁଧାର ଆଣି ଶ୍ରେଷ୍ଠ ୫୦ ବିଶ୍ୱବିଦ୍ୟାଳୟ ମଧ୍ୟରେ ସ୍ଥାନ ପାଇପାରିଛନ୍ତି। ସେହିପରି ‘ବ୍ୟବସାୟ ଏବଂ ପରିଚାଳନା ଅଧ୍ୟୟନ’ ବିଷୟ ପାଇଁ ଆଇଆଇଏମ୍ ଅହମଦାବାଦ ଏବଂ ବେଙ୍ଗାଲୁରୁ ଶ୍ରେଷ୍ଠ ୫୦ ବିଶ୍ୱବିଦ୍ୟାଳୟ ମଧ୍ୟରେ ରହିଥିଲେ ମଧ୍ୟ ଗତବର୍ଷଠାରୁ ଉଭୟଙ୍କ ପ୍ରଦର୍ଶନରେ ହ୍ରାସ ଘଟିଛି।
ଆଇଆଇଏମ୍ ଅହମଦାବାଦ୍ର ର଼୍ୟାଙ୍କିଙ୍ଗ୍ ୨୨ରୁ ଖସି ୨୭ରେ ପହଞ୍ଚିଥିବାବେଳେ ଆଇଆଇଏମ୍ ବେଙ୍ଗାଲୁରୁର ର଼୍ୟାଙ୍କିଙ୍ଗ୍ ୩୨ରୁ ୪୦କୁ ଖସିଆସିଛି। ସେହିପରି ପେଟ୍ରୋଲିୟମ ଇଞ୍ଜିନିୟରିଂ ବିଷୟରେ ଆଇଆଇଟି ମାଡ୍ରାସ୍ ଏବଂ ବିକାଶ ଅଧ୍ୟୟନ ବିଷୟରେ ଜେଏନ୍ୟୁକୁ ଶ୍ରେଷ୍ଠ ୫୦ ୟୁନିଭର୍ସିଟି ମଧ୍ୟରେ ସ୍ଥାନ ମିଳିଛି। ତେବେ ଗତବର୍ଷଠାରୁ ଉଭୟ ଅନୁଷ୍ଠାନର ପ୍ରଦର୍ଶନରେ ହ୍ରାସ ଘଟିଛି। ପ୍ରାୟ ୫୫ଟି ବିଷୟକୁ ଭିତ୍ତିକରି କ୍ୟୁଏସ୍ ପକ୍ଷରୁ ଏହି ର଼୍ୟାଙ୍କିଙ୍ଗ ତାଲିକା ଜାରି କରାଯାଇଛି।
