ଭୁବନେଶ୍ୱର, ୮।୭(ବ୍ୟୁରୋ): କଟକ ଏସ୍ସିବି ମେଡିକାଲ ଓ କଲେଜରେ ୯ଟି ଇକ୍ମୋ ମେଶିନ ଲାଗିବ। ଏନେଇ ବୁଧବାର ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ଆୟୋଜିତ ଖବରଦାତା ସମ୍ମିଳନୀରେ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ସୂଚନା ଦେଇଛନ୍ତି। ସେ କହିଛନ୍ତି, ଓଡ଼ିଶାକୁ ୯ଟି ଇକ୍ମୋ ମେଶିନ୍ ଆସିବ। ସବୁଗୁଡ଼ିକ ଏସ୍ସିବି ମେଡିକାଲରେ ଲାଗିବ। ଏହି ୯ଟି ଇକ୍ମୋ ମେଶିନ୍ ମଧ୍ୟରୁ ୬ଟି ରାଜ୍ୟ ସରକାରଙ୍କ ପାଣ୍ଠିରୁ ଆସିବ। ବାକି ୩ଟି ମେଶିନ ସିଏସ୍ଆର୍ ପାଣ୍ଠିରୁ କିଣାଯିବ। ଇକ୍ମୋ ପରିଚାଳନା ପାଇଁ ଆବଶ୍ୟକ ବିଶେଷଜ୍ଞ ଚୟନ ସରିଛି। ସେମାନଙ୍କୁ ପ୍ରଶିକ୍ଷଣ ନେବାକୁ କୋଲକାତା ପଠାଯିବ। ଜୁଲାଇ ୩୧ ସୁଦ୍ଧା ପ୍ରଶିକ୍ଷଣ ସରିବ। ଅଗଷ୍ଟ ୧୫ରୁ ଇକ୍ମୋ କାର୍ଯ୍ୟକ୍ଷମ ହେବ ବୋଲି ମହାପାତ୍ର କହିଛନ୍ତି।
ସୂଚନାଯୋଗ୍ୟ, ରାଜ୍ୟରେ ଇକ୍ମୋ ମେଶିନର ଅଭାବ ଯୋଗୁ ବହୁ କରୋନା ଆକ୍ରାନ୍ତ ଚିକିତ୍ସା ସେବାରୁ ବଞ୍ଚତ୍ତ ହୋଇ ବାହାର ରାଜ୍ୟ ଉପରେ ନିର୍ଭର କରୁଛନ୍ତି। ଏହି ଚିକିତ୍ସା ପାଇଁ ବହୁ ଟଙ୍କା ଆବଶ୍ୟକ ଥିବାବେଳେ ବାହାର ରାଜ୍ୟକୁ ଯାଇ ଚିକିତ୍ସା କରାଇବା ସମସ୍ତଙ୍କ ପକ୍ଷେ ସମ୍ଭବ ହୋଇପାରୁ ନାହିଁ। ତେଣୁ ଅନ୍ୟମାନଙ୍କ ସହାୟତା ନେଇ ବହୁ ରୋଗୀ ଏବେ ବି ଅନ୍ୟ ରାଜ୍ୟରେ ଚିକିତ୍ସିତ ହେଉଛନ୍ତି। ଏସ୍ସିବିରେ ଇକ୍ମୋ ମେଶିନ କାର୍ଯ୍ୟକ୍ଷମ ହେଲେ ବହୁ ରୋଗୀ ଉପକୃତ ହେବେ ବୋଲି ଆଶା କରାଯାଉଛି।
ଅନ୍ୟପକ୍ଷରେ ବିଭାଗୀୟ ଅତିରିକ୍ତ ମୁଖ୍ୟ ଶାସନ ସଚିବ ମହାପାତ୍ର କରୋନା ମୃତ୍ୟୁକୁ ନେଇ ଥିବା ଦ୍ୱନ୍ଦ୍ୱ ଦୂର କରିଛନ୍ତି। ସେ କହିଛନ୍ତି, ଏବେ ଯେଉଁ ମୃତ୍ୟୁ ସଂଖ୍ୟା ଆସୁଛି, ତାହା ବର୍ତ୍ତମାନର ନୁହେଁ। ଆଜି ଆସୁଥିବା ମୃତ୍ୟୁସଂଖ୍ୟା ଗତକାଲିର ଘଟଣା ନୁହେଁ। କୋଭିଡ୍ ମୃତ୍ୟୁ ୩ ଥାକିଆ ଅଡିଟ୍ କମିଟି ଦ୍ୱାରା ସ୍ଥିର ହୋଇଥାଏ। ସମ୍ପୃକ୍ତ ମେଡିକାଲ, ଜିଲା ଓ ରାଜ୍ୟ କମିଟି ଅଡିଟ୍ କରିଥାଏ। ମେ’ ଓ ଜୁନ୍ରେ ପ୍ରବଳ କେସ୍ ଥିବାରୁ ଡାକ୍ତର ସମୟ ପାଇ ନ ଥିଲେ। ମେ’ ଓ ଜୁନ୍ରେ ଘଟିଥିବା ମୃତ୍ୟୁକୁ ସମୀକ୍ଷା କରାଯାଇ ଏବେ ସଂଖ୍ୟା ଆସୁଛି। ଏହି ଅବସରରେ ସେ ରାଜ୍ୟରେ କୋଭିଡ୍ ସ୍ଥିତି, ପଜିଟିଭ୍ ହାର, ଶଯ୍ୟା କ୍ଷମତା, ଭେଣ୍ଟିଲେଟର, ଆଇସିୟୁର ଉପଲବ୍ଧତା, ସମ୍ଭାବ୍ୟ ତୃତୀୟ ଲହର ନିମନ୍ତେ ପ୍ରସ୍ତୁତି, ଘରକୁ ଘର ବୁଲି ସର୍ବେକ୍ଷଣ ଓ ଟିକାକରଣ ଅଭିଯାନ ଉପରେ ସୂଚନା ଦେଇଥିଲେ। ଜନସାଧାରଣଙ୍କୁ କୋଭିଡ୍ ନିୟମାବଳୀର କଠୋର ଅନୁପାଳନ ନିମନ୍ତେ ମହାପାତ୍ର ଅନୁରୋଧ କରିଛନ୍ତି।
