ରାୟପୁର/ମାଲକାନଗିର,୬।୧(ଦୁର୍ଯ୍ୟୋଧନ ପାତ୍ର): କିଛି ଦିନର ନୀରବତା ପରେ ପୁଣି ମାଓବାଦୀମାନେ ସକ୍ରିୟ ହୋଇ ଉଠିଛନ୍ତି। ଛତିଶଗଡ଼ ବସ୍ତର ଡିଭିଜନ ବିଜାପୁର କୁଟ୍ରୁ-ବେଡ୍ରେ ରାସ୍ତାରେ ମାଓବାଦୀମାନେ ସୋମବାର ଏକ ଆଇଇଡି ବିସ୍ଫୋରଣ ଖଞ୍ଜି ଯବାନଙ୍କ ଏକ ଗାଡ଼ିକୁ ଉଡ଼ାଇ ଦେଇଛନ୍ତି। ବିସ୍ଫୋରଣରେ ୯ଜଣ ଶହୀଦ ହୋଇଥିବା ଜଣାପଡିଛି। ୮ ଦାନ୍ତେୱାଡା ଡିଆର୍ଡି ଯବାନଙ୍କ ସହିତ ଜଣେ ଗାଡ଼ି ଡ୍ରାଇଭରଙ୍କ ମୃତ୍ୟୁ ଘଟିଛି। ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ, ୫୦ ଫୁଟ ଉପରକୁ ଯବାନଙ୍କ ଗାଡ଼ି ଉଡି ଯାଇଥିଲା।
ମିଳିଥିବା ସୂଚନା ମୁତାବକ, ଛତିଶଗଡ଼ ବସ୍ତର ଡିଭିଜନ ଅଧୀନ ବିଜାପୁର ଜିଲାରେ ସ୍ବତନ୍ତ୍ର ମାଓବାଦୀ ଅପରେଶନ ପାଇଁ ଏକ ଭ୍ୟାନ୍ରେ ଡିଆର୍ଜି ଯବାନମାନେ ଯାଉଥିଲେ। ମାଓବାଦୀମାନେ ସଦର ମୁଖ୍ୟାଳୟରୁ ୮୦ କି.ମି ଦୂର କୁଟ୍ରୁ-ବେଡ୍ରେ ରାସ୍ତା ମଧ୍ୟରେ ଥିବା ଏକ କଲଭର୍ଟ ନିକଟରେ ଆଇଇଡି ବିସ୍ଫୋରଣ ଖଞ୍ଜି ଯବାନଙ୍କ ଗାଡ଼ିକୁ ଉଡ଼ା ଦେଇଥିଲେ। ଫଳରେ ଘଟଣାସ୍ଥଳରେ ୫ଜଣ ଶବାନ ଶହୀଦ ହୋଇଥିବା ବେଳେ ଚିକିତ୍ସିତ ଅବସ୍ଥାରେ ଆଉ ୪ଜଣଙ୍କ ମୃତ୍ୟୁ ଘଟିଛି। ବସ୍ତର ଆଇଜି ସୁନ୍ଦରରାଜ ପି. ସୂଜନା ଦେଇ କହିଛି ଯେ, କୁଟ୍ରୁ ଜଙ୍ଗଲରେ ମାଓବାଦୀଙ୍କ ଗତିବିଧି ରହିଥିବା ସୂଚନା ମିଳିଥିଲା। ଏନେଇ ଡିଆର୍ଜି ଯବାନର ଏକ ଟିମ୍ କୋମ୍ବିଂ ଅପରେଶନରେ ଯାଉଥିଲେ। ସେତିକିବେଳେ ଏହି ବିସ୍ପୋରଣ ଘଟିଥିବା ସେ ପ୍ରକାଶ କରିଛନ୍ତି।
ପ୍ରକାଶ ଥାଉ କି, ଗତ କିଛିଦିନ ଧରି ଛତିଶଗଡ଼ରେ ମାଓବାଦୀ-ପୋଲିସ ମଧ୍ୟରେ ଛକାପଞ୍ଝା ଚାଲିଥିବା ବେଳେ ରବିବାର ପୋଲିସ ଗୁଳିରେ ୪ଜଣ ମାଓବାଦୀଙ୍କ ମୃତ୍ୟୁ ଘଟିଥିଲା। ଗତ ୧ ମାସ ମଧ୍ୟରେ ପ୍ରାୟ ୨୦ଜଣ ମାଓବାଦୀ ପୋଲିସ ଗୁଳିରେ ମୃତ୍ୟୁବରଣ କରିଥିବା ବେଳେ କେନ୍ଦ୍ର ସରକାରଙ୍କ ପକ୍ଷରୁ ଅପରେଶନ କାଗାରକୁ ବିରୋଧ କରି ମାଓବାଦୀମାନେ ଏହି କାଣ୍ଡ ଭିଆଇଥିବା ଜଣାପଡିଛି।
ଅନ୍ୟପକ୍ଷେ ଘଟଣାସ୍ଥଳରୁ ମାଓବାଦୀମାନେ ଅସ୍ତ୍ରଶସ୍ତ୍ର ଲୁଟି ନେଇଥିବା ବେଳେ ସିଆର୍ପିଏଫ୍, କୋବ୍ରା ଓ ଡିଆର୍ଜିର ଏକ ସ୍ବତନ୍ତ୍ର ଟିମ୍ ଅଞ୍ଚଳରେ କୋମ୍ବିଂ ଅପରେଶନକୁ ଜୋରଦାର କରିଛନ୍ତି। ତେବେ ଆଣ୍ଟି ଲାଣ୍ଡମାଇନ ଗାଡି ନ ଥିବାରୁ ଏହି ବିସ୍ପୋରଣରେ ଗାଡିଟି ସମ୍ପୂର୍ଣ ନଷ୍ଟ ହୋଇଯାଇଛି। ଅନ୍ୟପକ୍ଷେ ଯବାନଙ୍କ ଖଣ୍ଡ ବିଖଣ୍ଡିତ ଶରୀର ଘଟଣା ସ୍ଥଳରେ ପଡି ରହିଥିବା ସୂଚନା ମିଳିଛି।
