ଚଣ୍ଡିଖୋଲ,୨୯ା୮(ଡି.ଏନ.ଏ.): ଓଡ଼ିଶାର ପ୍ରଥମ ଏକ୍ସପ୍ରେସ୍ ହାଇୱେ ଚଣ୍ଡିଖୋଲ-ପାରାଦୀପ ଏବେ ୮ଲେନ୍ ବିଶିଷ୍ଟ ହେବାକୁ ଯାଉଛି। ଏଥିପାଇଁ ଟେଣ୍ଡର ପ୍ରକ୍ରିୟା ଆରମ୍ଭ ହୋଇଛି। ୭୭ କି.ମି. ଲମ୍ବ ଏହି ଜାତୀୟ ରାଜପଥ(ଏନ୍ଏଚ୍) ପ୍ରଶସ୍ତୀକରଣ କାର୍ଯ୍ୟରେ ୨ ହଜାର କୋଟିରୁ ଊଦ୍ଧର୍ବ ଟଙ୍କା ଖର୍ଚ୍ଚ ହେବ ବୋଲି ଭାରତୀୟ ଜାତୀୟ ରାଜପଥ ପ୍ରାଧିକରଣ (ଏନ୍ଏଚ୍ଏଆଇ)ପକ୍ଷରୁ ସୂଚନା ମିଳିଛି। ଏହିକ୍ରମରେ ଏନ୍ଏଚ୍ କଡ଼ ଅର୍ଥାତ୍ ୫୦ ମିଟର ଦୂରତା ଅଞ୍ଚଳକକୁ ଅବରୋଧ କରି ଦୋକାନ କରିଥିବା ବ୍ୟବସାୟୀଙ୍କୁ ୮ଦିନ ମଧ୍ୟରେ ହଟିଯିବାକୁ ଏନ୍ଏଚ୍ଏଆଇ ପକ୍ଷରୁ ଚେତାବନୀ ଦିଆଯାଇଛି। ଏଥିସହିତ ମାଇକ୍ ଯୋଗେ ପ୍ରଚାର କରି ଅବରୋଧକାରୀଙ୍କୁ ସୂଚିତ କରାଯାଇଛି। ଅନ୍ୟପକ୍ଷରେ ଏହି ରାଜପଥ ଓଡ଼ିଶାର ପ୍ରଥମ ୮ଲେନ୍ ରାସ୍ତା ହେବ ବୋଲି ଜଣାଯାଇଛି।
ପାରାଦୀପ ବନ୍ଦରକୁ ବିଶ୍ବସ୍ତରୀୟ କରିବା ପାଇଁ ତଥା ବିଦେଶକୁ ରପ୍ତାନି ବୃଦ୍ଧି ଲକ୍ଷ୍ୟରେ ଏହାକୁ ୮ଲେନ୍ରେ ପରିଣତ କରିବା ଲାଗି ଦୀର୍ଘଦିନ ହେବ ଯୋଜନା କରାଯାଇଛି। ଏହି ରାଜପଥ ୬ଲେନ୍ କରିବା ପାଇଁ ସର୍ଭେ ଆରମ୍ଭ ହୋଇଥିବାବେଳେ ପରେ କେନ୍ଦ୍ର ସରକାରଙ୍କ ପକ୍ଷରୁ ୮ଲେନ୍ କରାଯିବାକୁ ନିଷ୍ପତ୍ତି ହୋଇଥିଲା। ପ୍ରଥମେ ୧୨୦୦ କୋଟି ବ୍ୟୟ ବରାଦ କରାଯାଇଥିବାବେଳେ ପରେ ଏହାକୁ ୨ ହଜାର କୋଟି ଖର୍ଚ୍ଚ କରାଯିବ ବୋଲି ଆକଳନ କରାଯାଇଛି। ଏହି ଜାତୀୟ ରାଜପଥ ପ୍ରଥମେ ୧୯୬୨ରେ ନିର୍ମାଣ ହୋଇଥିଲା, ଯାହା ୧୯୬୮ରେ ଶେଷ ହୋଇଥିଲା। ସେତେବେଳେ ଏହାକୁ ଏକ୍ସପ୍ରେସ୍ ହାଇୱେ ମାନ୍ୟତା ଦିଆଯାଇଥିଲା। ପରବର୍ତ୍ତୀ ପର୍ଯ୍ୟାୟରେ ଚଣ୍ଡିଖୋଲ-ପାରାଦୀପ ଏନ୍ଏଚ୍କୁ ୫ନଂ.(କ)ରେ ନାମିତ କରାଗଲା। ପୁନର୍ବାର ଏହାକୁ ୫୩ନଂ. ଏନ୍ଏଚ୍ ଭାବେ ପରିବର୍ତ୍ତନ କରାଯାଇଥିଲା। ଏହି ରାସ୍ତାରେ ସାଧାରଣତଃ ଖଣି ଅଞ୍ଚଳରୁ ଲୁହାପଥର, ମାଙ୍ଗାନିଜ, କ୍ରୋମାଇଟ ଓ କୋଇଲା ପରିବହନ ହୋଇଥାଏ। କେନ୍ଦୁଝର, ସୁନ୍ଦରଗଡ଼ ଓ ଯାଜପୁର ଜିଲାରୁ ଖଣିଜ ପଦାର୍ଥ ନେଇ ଭାରିଯାନ ପାରାଦୀପ ବନ୍ଦରକୁ ଯାଇଥାଏ।
ଏନ୍ଏଚ୍ଏଆଇର ଆକଳନ ଅନୁସାରେ ଦୈନିକ ୧୦ ହଜାର ଟ୍ରକ୍ ଏହି ଏନ୍ଏଚ୍ରେ ଯାତାୟାତ କରୁଛି। ଏହାସହ ଛୋଟବଡ଼ ୨ ହଜାର ପାସେଞ୍ଜର ଗାଡ଼ି ଦୈନିକ ଚଳପ୍ରଚଳ କରୁଛି। ଏହି ରାସ୍ତା ୫ଟି ବଡ଼ ନଦୀ ତଥା ମହାନଦୀ, ଲୁଣା, ଗୋବରୀ, ବିରୂପା ଓ ଗେଙ୍ଗୁଟି ଉପରେ ଯାଇଛି। ଏହାକୁ ୮ ଲେନ୍ କରାଯିବାବେଳ ୬୦ରୁ ଊଦ୍ଧର୍ବ ଛୋଟ ପୋଲ ନିର୍ମାଣ କରାଯିବ। ସେହିପରି ଚଣ୍ଡିଖୋଲ ନିକଟସ୍ଥ ଶ୍ରୀରାମପୁରଠାରେ ଥିବା ଟୋଲ ଗେଟ୍ ମାର୍ଶାଘାଇର ମଶାଖଣି ନିକଟକୁ ଉଠିଯିବ ବୋଲି ଜଣାପଡ଼ିଛି। ଏ ସମ୍ପର୍କରେ ଏନ୍ଏଚ୍ଏଆଇ ଜେନେରାଲ୍ ମ୍ୟାନେଜର ରାମଚନ୍ଦ୍ର ପଣ୍ଡା କହିଛନ୍ତି, ରାସ୍ତା ୮ଲେନ୍ ହେବା ପାଇଁ ସର୍ଭେ କାର୍ଯ୍ୟ ଶେଷ ହୋଇ ଟେଣ୍ଡରକୁ ଯାଇଛି। ଖୁବ୍ଶୀଘ୍ର ଟେଣ୍ଡର ହୋଇ କାର୍ଯ୍ୟ ଆରମ୍ଭ ହେବ। ସେଥିପାଇଁ ଏନ୍ଏଚ୍ଏଆଇ ପକ୍ଷରୁ ପ୍ରଥମେ ଅବରୋଧ ହଟାଇବା ପ୍ରକ୍ରିୟା ଆରମ୍ଭ ହୋଇଛି।
