ପଟ୍ଟାମୁଣ୍ଡାଇ,୨୧ା୧(କଳ୍ପତରୁ ନାୟକ)କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ନିର୍ବାଚନମଣ୍ଡଳୀକୁ ସୀମା ପୁନଃ ନିର୍ଦ୍ଧାରଣ ବେଳେ ଭାଗ ଭାଗ କରି ରାଜନଗର, କେନ୍ଦ୍ରାପଡ଼ା ଓ ଆଳି ବିଧାନସଭା ଆସନରେ ମିଶାଇ ଦିଆଯାଇଛି। ଫଳରେ ପଟ୍ଟାମୁଣ୍ଡାଇ ତା’ର ସତ୍ତା ହରାଇ ସବୁକ୍ଷେତ୍ରରେ ଅବହେଳିତ ହୋଇପଡିଥିବା ବେଳେ ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡିଛି। ସାଧାରଣ ଭାବେ ରାଜ୍ୟ ସରକାରଙ୍କ ସାମଗ୍ରୀକ ଭାବେ କରାଯାଉଥିବା ଉନ୍ନତିମୂଳକ କାର୍ଯ୍ୟ ବ୍ୟତୀତ ପଟ୍ଟାମୁଣ୍ଡାଇ ପାଇଁ ନା ଶାସକ କିମ୍ବା ବିରୋଧୀଙ୍କ କୌଣସି ସ୍ବତନ୍ତ୍ର ଦୃଷ୍ଟି ଭଙ୍ଗି ନ ଥିବାରୁ ବୁଦ୍ଧିଜୀବି, ସାମଜିକକର୍ମୀ ଓ ଜନସାଧରଣଙ୍କ ମହଲରେ ମତ ପ୍ରକାଶ ପାଇଛି ା
ବୁଦ୍ଧିଜୀବି ପ୍ରବୀର ନାୟକ କୁହନ୍ତି, କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଉପଖଣ୍ଡ ହସ୍ପିଟାଲରରେ ଡାକ୍ତର ଅଭାବ ଯୋଗୁ ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡ଼ିଛି। ଏହି ହସ୍ପିଟାଲକୁ ଦୈନିକ ୫ ଶହରୁ ଊର୍ଦ୍ଧ୍ୱ ରୋଗୀ ଆସୁଥିବା ବେଳେ ଡାକ୍ତର ଅଭାବରୁ ଲୋକମାନେ ବାଧ୍ୟ ହୋଇ ଜିଲା ମୁଖ୍ୟ ଚିକିତ୍ସାଳୟ ଆଉ କଟକ ବଡ଼ ମେଡିକାଲ ଯାଉଛନ୍ତି ା ଉପଖଣ୍ଡ ଚିକିତ୍ସାଳୟରେ ୩୮ ଡାକ୍ତର ରହିବାର ବ୍ୟବସ୍ଥା ଥିବା ବେଳେ ଡାକ୍ତରଖାନା ଅଧୀକ୍ଷକଙ୍କ ସମେତ ୮ ଜଣ ଡାକ୍ତର କାର୍ଯ୍ୟରତ ଅଛନ୍ତି। ବର୍ତ୍ତମାନ ପ୍ରାୟ ୩୦ ଡାକ୍ତର ପଦବୀ ଖାଲି ଯୋଗୁ ରୋଗୀ ସେବା ବିପର୍ଯ୍ୟସ୍ତ ହୋଇପଡିଛି। ସର୍ଜରୀ, ଅସ୍ଥିଶଲ୍ୟ ଭଳି ଗୁରୁତ୍ୱପୂର୍ଣ୍ଣ ବିଶେଷଜ୍ଞ ପଦବୀ ବର୍ଷ ବର୍ଷ ଧରି ଖାଲି ପଡିଛି। ଭେଷଜ ବିଶେଷଜ୍ଞ, ସର୍ଜରୀ ବିଶେଷଜ୍ଞ, ସ୍ତ୍ରୀ ଓ ପ୍ରସୂତି ରୋଗ ବିଶେଷଜ୍ଞ, ଶିଶୁ ରୋଗ ବିଶେଷଜ୍ଞ, ଅସ୍ଥିଶଲ୍ୟ ବିଶେଷଜ୍ଞ, ନିସ୍ତେଜକ ବିଶେଷଜ୍ଞ ପଦବୀ ଖାଲି ପଡିଛି। ସେହିପରି ୬ ସହକାରୀ ସର୍ଜନ ପଦବୀ ଥିବା ବେଳେ ଏବେ ମାତ୍ର ୨ ଜଣ କାର୍ଯ୍ୟରତ ଅଛନ୍ତି ା ବିଶେଷଜ୍ଞ ଡାକ୍ତର ପଦବୀ ସହିତ ଆବଶ୍ୟକ ଷ୍ଟାଫ୍ ନର୍ସ ଓ କର୍ମଚାରୀ ପଦବୀ ପୂରଣ ଲାଗି ସାଧାରଣରେ ଦାବୀ ହୋଇଛି ା
ସାମାଜିକ କର୍ମୀ କ୍ଷୀରୋଦ ମଲିକ, ତ୍ରିଲୋଚନ ଦାସ, ନରେନ୍ଦ୍ର ଧଳ ପ୍ରମୁଖ କୁହନ୍ତି, ଜନସାଧାରଣଙ୍କୁ ଉତ୍ତମ ସ୍ବାସ୍ଥ୍ୟସେବା ଯୋଗାଇ ଦେବା ପାଇଁ ଅତ୍ୟାଧୁନିକ ଭିତ୍ତିଭୂମି ପ୍ରସ୍ତୁତ ସୁଦୃଢ ପାଇଁ ୫-ଟି ମାଧ୍ୟମରେ ଅନେକ କୋଟି ଟଙ୍କା ଅନୁଦାନ ଆସି ଉନ୍ନତିକରଣ କରାଯାଉଛି। ତାହାର କାମ ଦ୍ରୁତ ଗତିରେ ଚାଲିଛି। କିନ୍ତୁ ସ୍ବାସ୍ଥ୍ୟସେବାକୁ ସୁଧାରିବାକୁ ହେଲେ ଭିତ୍ତିଭୂମି ସୁଦୃଢ ସହ ଖାଲିଥିବା ଡାକ୍ତର ସମେତ ଅନ୍ୟାନ୍ୟ ପଦବୀଗୁଡିକୁ ପୂରଣ କରିବାକୁ ପଡିବ। ଅପରପକ୍ଷେ ଗତ ବର୍ଷ ଡିସେମ୍ବରରେ ରାଜ୍ୟ ସ୍ବାସ୍ଥ୍ୟ ବିଭାଗରେ ୨୪୭୩ ଜଣ ନୂତନ ଡାକ୍ତରଙ୍କୁ ନିଯୁକ୍ତି ଦେଇଛନ୍ତି ା ସେଥିମଧ୍ୟରୁ ପଟ୍ଟାମୁଣ୍ଡାଇ ମେଡିକାଲର ଆବଶ୍ୟକତାକୁ ଦେଖି ସରକାର ନୂତନ ବିଶେଷଜ୍ଞ ଡାକ୍ତର ଦେବାପାଇଁ ଶାସକ ଦଳ ନା ବିରୋଧୀ କେହି ସ୍ବାର୍ଥ ଭୟରେ ସ୍ବର ଉଠାଉ ନାହାନ୍ତି ା ଏ ଦିଗରେ ବିରୋଧୀ ପ୍ରତିବାଦର ସ୍ବର ଉଠାଉ ନ ଥିବାବେଳେ ଛୋଟ ମୋଟ କଥାକୁ ନେଇ ସୋସିଆଲ ମିଡ଼ିଆରେ ବାଦ ବିବାଦ ଛିଡ଼ା କରୁଛନ୍ତି ା ନିକଟରେ ହୋଇଥିବା ଗଣମାଧ୍ୟମର ଜନମଞ୍ଚ କାର୍ଯ୍ୟକ୍ରମରେ ଅବହେଳିତ ପଟ୍ଟାମୁଣ୍ଡାଇ ପ୍ରସଙ୍ଗରେ କେହି ସ୍ବର ନ ଉଠାଇବା ତାହା ବିରୋଧିଙ୍କ କାର୍ଯ୍ୟଦକ୍ଷତାକୁ ପଦାରେ ପକାଇଛି ା ସୋସିଆଲ ମିଡ଼ିଆରେ ଉନ୍ନତିର ସୁନେଲି ସ୍ବପ୍ନ କେତେଜଣ ଶାସକ ଦଳର ପୃଷ୍ଠ ପୋଷକତା ଲାଭ କରିଥିବା ରାଜନେତା ଦେଖାଇ ଚାଲିଥିବା ବେଳେ ଅନ୍ତଦ୍ୱନ୍ଦ୍ୱରେ ବୁଡ଼ି ରହିଥିବା ମୁଖ୍ୟ ବିରୋଧୀ ଦଳମାନେ ନୀରବ ଦର୍ଶକ ସାଜିବାରେ ଜନସାଧାରଣଙ୍କ ନିକଟରେ ପ୍ରଶ୍ନବାଚୀ ସୃଷ୍ଟି କରିଛି। ଗତ ଡିସେମ୍ବରରେ ନିଯୂକ୍ତି ପାଇଥିବା ଡାକ୍ତର ମଧ୍ୟରୁ ପଟ୍ଟାମୁଣ୍ଡାଇ ହସ୍ପିଟାଲରେ ଖାଲି ପଡିଥିବା ପଦବୀ ପୂରଣ ଓ ଅନ୍ୟ ପଦବୀଗୁଡିକୁ ପୂରଣ କରିବା ପାଇଁ ସାଧାରଣରେ ଦାବି ହୋଇଛି।
