ଦୋହା,୩।୫ : ୨୦୨୨ ମସିହାରେ ଗୁପ୍ତଚରୀ ଅଭିଯୋଗରେ କତାରରେ ୮ ଜଣ ଭାରତୀୟ ପୂର୍ବତନ ନୌସେନା ଅଧିକାରୀଙ୍କୁ ଗିରଫ କରାଯାଇଥିଲା। ସମସ୍ତେ ଏକ ଘରୋଇ ସଂସ୍ଥାରେ କାମ କରୁଥିଲେ। ଦୋହାରେ ଅବସ୍ଥିତ କତାରର ଇଣ୍ଟେଲିଜେନ୍ସ ସର୍ଭିସ ଦ୍ୱାରା ସମସ୍ତଙ୍କୁ ଗିରଫ କରାଯାଇଥିଲା। ଭାରତୀୟ ନୌସେନାର ପୂର୍ବତନ ଅଧିକାରୀଙ୍କୁ ଗିରଫ ହେବାର ଆଠ ମାସ ବିତିଗଲାଣି। ସ୍ଥାନୀୟ କୋର୍ଟରେ ସମସ୍ତଙ୍କ ବିରୋଧରେ ଏକ ମାମଲା ଚାଲିଛି ଏବଂ ଶୁଣାଣି ହୋଇସାରିଛି।
ଏଥି ସହିତ, ମେ ୩ ବୁଧବାର ସେମାନଙ୍କ ବିରୋଧରେ ଆସିଥିବା ଅଭିଯୋଗର ଶୁଣାଣି ହେବ। ଯଦି ରିପୋର୍ଟଗୁଡିକ ଅଧାରରେଏହି ସମସ୍ତ ଭାରତୀୟଙ୍କ ଉପରେ ଗୁପ୍ତଚରୀ ଅଭିଯୋଗ ପ୍ରମାଣିତ ହୁଏ, ତେବେ ସେମାନଙ୍କୁ ମୃତ୍ୟୁଦଣ୍ଡ ମଧ୍ୟ ଦିଆଯାଇପାରେ। ତେବେ କତାର ସେମାନଙ୍କ ବିରୋଧରେ ଆସିଥିବା ଅଭିଯୋଗକୁ ଭାରତ ସହ ଶେୟାର କରି ନାହିଁ। ଗିରଫ ହୋଇଥିବା ଭାରତୀୟମାନେ ହେଉଛନ୍ତି କ୍ୟାପଟେନ ନବତେଜ ସିଂ ଗିଲ, କ୍ୟାପଟେନ ବିରେନ୍ଦ୍ର କୁମାର ବର୍ମା, କ୍ୟାପଟେନ ସୌରଭ ବୈଷ୍ଣବ, କମାଣ୍ଡର ଅମିତ ନାଗପାଲ, କମାଣ୍ଡର ପୂର୍ଣ୍ଣେନ୍ଦୁ ତିୱାରୀ, କମାଣ୍ଡର ସୁଗୁନାକର ପାକାଲା, କମାଣ୍ଡର ସଞ୍ଜୀବ ଗୁପ୍ତା ଏବଂ ନାବିକ ରାଗେଶ।
ରିପୋର୍ଟ ଅନୁଯାୟୀ, ମାର୍ଚ୍ଚ ୨୯ ରେ କତାର କୋର୍ଟରେ ଭାରତୀୟଙ୍କ ଉପରେ ଶୁଣାଣି ହୋଇସାରିଛି। ଏହା ପରେ ବୁଧବାର ଶୁଣାଣି ହେବ। ଏଥି ସହିତ ଭାରତ ସରକାରଙ୍କ ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି, ଏହି ଭାରତୀୟମାନଙ୍କୁ ସମସ୍ତ ସମ୍ଭାବ୍ୟ ସହାୟତା ଯୋଗାଇବାକୁ ଚେଷ୍ଟା କରୁଛି। ଏହା ସହିତ ସେମାନଙ୍କ ପରିବାରକୁ ମଧ୍ୟ ସାହାଯ୍ୟ ଯୋଗାଇବା ପାଇଁ ଉଦ୍ୟମ ଚାଲିଛି। ବର୍ତ୍ତମାନ କତାରରେ ଭାରତୀୟ ନୌସେନାର ପୂର୍ବତନ ଅଧିକାରୀଙ୍କ ଉପରେ ଆଇନଗତ ବିଚାର ଚାଲିଛି। ଇସ୍ରାଏଲ ପାଇଁ କତାରର ଉଚ୍ଚ-ବୈଷୟିକ ବୁଡ଼ାଜାହାଜ ଉପରେ ଗୁପ୍ତଚରୀ କରିଥିବା ଅଭିଯୋଗ ହୋଇଛି। ରିପୋର୍ଟ ଅନୁଯାୟୀ, ଏହି ବୁଡ଼ାଜାହାଜଗୁଡିକ ମେଟାମେଟେରିଆଲ ସହିତ ଆଚ୍ଛାଦିତ ହୋଇଛି, ଯେଉଁଥିପାଇଁ ସେମାନଙ୍କର ସାମର୍ଥ୍ୟ ଆହୁରି ବଢ଼ିଥାଏ ଏବଂ ଅନ୍ୟ ବୁଡ଼ାଜାହାଜଗୁଡିକ ଚିହ୍ନଟ କରିବା ଅତ୍ୟନ୍ତ କଷ୍ଟକର ହୋଇପଡେ।
