ଦେବଗଡ,୧୭।୨(ଶଶାଙ୍କ ଶେଖର ଝାଙ୍କର): ତିଲେଇବଣି ବ୍ଲକ ତଥା ଦେବଗଡ ଥାନା ଅନ୍ତର୍ଗତ ଟାଇଁସର ସ୍ଥିତ ଏକ ବଗିଚା ଭିତରୁ ମୁର୍ମୁଷୁ ଅବସ୍ଥାରେ ଜଣେ ଯୁବକଙ୍କୁ ଉଦ୍ଧାର କରାଯାଇଛି । ତାଙ୍କୁ ସଙ୍ଘବଦ୍ଧ ହତ୍ୟା ଉଦ୍ୟମ ହୋଇଥିବା ଅଭିଯୋଗ ହୋଇଛି । ଗୁରୁତର ଅବସ୍ଥାରେ ଦେବଗଡ ଜିଲା ମୁଖ୍ୟ ଚିକିତ୍ସାଳୟରେ ସେ ଭର୍ତ୍ତି ହୋଇଥିବା ବେଳେ ଦେବଗଡ ଥାନା ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ ତାରଙ୍ଗ ଗ୍ରାମ ପଞ୍ଚାୟତ ପୁରୁମୁଣ୍ଡା ଗ୍ରାମର ଭରତ ସାହୁ ଟାଇଁସର ଠାରେ ଏକ ବଗିଚାରେ କାମ କରନ୍ତି । ଭରତ ସେଠାରେ ରହୁଥିବା ବେଳେ ସୋମବାର ୧ ଟା ସମୟରେ ୫/୬ ଜଣ ଅଚିହ୍ନା ବ୍ୟକ୍ତି ତାଙ୍କୁ ସଙ୍ଘବଦ୍ଧ ଭାବେ ଆକ୍ରମଣ କରିଥିଲେ । ଭରତଙ୍କୁ ନିସ୍ତୁକ ମାଡ ମାରିବା ସହିତ ଦୀର୍ଘ ସମୟ ଧରି ତଂଟି ଚିପି ଧରିବାରୁ ସେ ଗୁରୁତର ଆହତ ହେବାସହ ଚେତାଶୂନ୍ୟ ହୋଇ ପଡିଥିଲେ । ପରେ ଆକ୍ରମଣକାରୀମାନେ ବାହାରୁ ପଟୁ କବାଟ ଦେଇ ସେଠାରୁ ଫେରାର ହୋଇ ଯାଇଥିଲେ । କିଛି ସମୟ ପରେ ଉକ୍ତ ବଗିଚାରେ ଜଗୁଆଳୀ ଓ ଅନ୍ୟଜଣେ ଯୁବକ ସେଠାରେ ପହଂଚି ଭରତ ଗୁରୁତର ଆହତ ଓ ସଜ୍ଞାହୀନ ଅବସ୍ଥାରେ ସେଠାରେ ପଡିରହିଥିବା ଦେଖିବାକୁ ପାଇଥିଲେ ।
ତାଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରି ଦେବଗଡ ଜିଲା ମୂଖ୍ୟ ଚିକିତ୍ସାଳୟରେ ଭର୍ତୀ କରିଥିବାବେଳେ ସେ ଏବେ ମଧ୍ୟ ସେଠାରେ ଚିକିତ୍ସାଧିନ ଥିବା ଜଣାପଡିଛି । ଜଣେ ସମ୍ପର୍କୀୟ ଏବଂ କେତେକ ନିର୍ଦ୍ଦିଷ୍ଟ ବ୍ୟକ୍ତି ତାଙ୍କୁ ହତ୍ୟା ଉଦ୍ୟମ ଷଡଯନ୍ତ୍ର କରିଥିବା ଭରତ ଦେବଗଡ ଥାନା ପୋଲିସ ନିକଟରେ ଅଭିଯୋଗ କରିଥିବା ବେଳେ ପୋଲିସ ବିଭିନ୍ନ ଦିଗକୁ ତଦନ୍ତ ଆରମ୍ଭ କରିଛି । ଏ ଘଟଣା ଆଜି ସମଗ୍ର ଦେବଗଡ ଜିଲାରେ ଚର୍ଚ୍ଚାର ବିଷୟ ସାଜିଛି ।
