ଲଣ୍ଡନ୍,୧୬ା୧୧: ବ୍ରିଟେନ୍ର କିଙ୍ଗ୍ ଚାଲର୍ସ ୩ୟ ମଙ୍ଗଳବାର ରାତିରେ ଲଣ୍ଡନର ବକିଂହାମ୍ ପ୍ୟାଲେସ୍ରେ ଭାରତୀୟ ନର୍ସ, ଧାଈ ଓ ଅନ୍ତର୍ଜାତୀୟ ସେବିକାମାନଙ୍କ ଗହଣରେ ନିଜ ୭୫ତମ ଜନ୍ମଦିନ ପାଳନ କରିଛନ୍ତି। ବ୍ରିଟେନ୍ ସରକାରଙ୍କ ଅଧୀନ ଜାତୀୟ ସ୍ବାସ୍ଥ୍ୟ ସେବା (ଏନ୍ଏଚ୍ଏସ୍)ରେ ନିୟୋଜିତ ପ୍ରାୟ ୧,୫୦,୦୦୦ ନର୍ସଙ୍କ ମଧ୍ୟରୁ ସର୍ବାଧିକ ହେଉଛନ୍ତି ଭାରତୀୟ। ଏନ୍ଏଚ୍ଏସ୍ ମଧ୍ୟ ଏହାର ୭୫ତମ ପ୍ରତିଷ୍ଠା ଦିବସ ପାଳନ କରିଛି। ଏହି ଅବସରରେ ଭାରତ, ଫିଲିପାଇନ୍ସ, ଶ୍ରୀଲଙ୍କା, ନେପାଳ ଓ କେନିଆର ପ୍ରାୟ ୪୦୦ ନର୍ସ ବ୍ରିଟେନ୍ର ସ୍ବାସ୍ଥ୍ୟ ତଥା ସାମାଜିକ ସେବା କ୍ଷେତ୍ର ପ୍ରତି ସେମାନଙ୍କ ଅବଦାନ ଉପଲକ୍ଷେ ଆୟୋଜିତ ସ୍ବତନ୍ତ୍ର ଅଭ୍ୟର୍ଥନା କାର୍ଯ୍ୟକ୍ରମରେ ଯୋଗଦେଇଥିଲେ। ସ୍କଟଲାଣ୍ଡରେ କାର୍ଯ୍ୟରତ ଭାରତୀୟ ଷ୍ଟାଫ୍ ନର୍ସ ଶ୍ରୀଜିଥ୍ ମୁରଲୀଧରନ୍ କହିଛନ୍ତି, ରାଜାଙ୍କୁ ଜୀବନକାଳ ମଧ୍ୟରେ ଥରୁଟିଏ ଭେଟିବାର ସୁଯୋଗ ମିଳିବା ବି ଅତ୍ୟନ୍ତ ଖୁସିର କଥା।
ସେ ଜଣେ ହୃଦୟବାନ୍ ବ୍ୟକ୍ତି। ଏହି ଅବସରରେ ପ୍ରଧାନମନ୍ତ୍ରୀ ଋଷି ସୁନକ୍ଙ୍କ କ୍ୟାବିନେଟ୍ରେ ନୂଆକରି ଦାୟିତ୍ୱ ନେଇଥିବ ସ୍ବାସ୍ଥ୍ୟ ସଚିବ ଭିକ୍ଟୋରିଆ ଅଟ୍କିନ୍ସ ଏନ୍ଏଚ୍ଏସ୍ର ଅବଦାନକୁ ପ୍ରଶଂସା କରିଛନ୍ତି। ଭାରତ-ବ୍ରିଟେନ୍ ସମ୍ପର୍କ ଆଗକୁ ଆହୁରି ନିବିଡ଼ ହେବ। ପ୍ରଧାନମନ୍ତ୍ରୀଙ୍କ ଅନୁମତି ମିଳିଲେ ସେ ଭାରତ ଗସ୍ତ କରିବେ ବୋଲି ଭିକ୍ଟୋରିଆ ପ୍ରକାଶ କରିଛନ୍ତି।
