ନୂଆଦିଲ୍ଲୀ: କରୋନାର ପ୍ରଭାବ ସାରା ଦେଶରେ ରହିଥିବା ବେଳେ ଚଳିତ ଏହି ପର୍ବକୁ ଏକ ଭିନ୍ନ ଭାବେ ପାଳନ କରାଯାଇଛି। ଭାରତୀୟ ସାମଗ୍ରୀକୁ ବୃହତ୍ତ ମାତ୍ରାରେ ବ୍ୟବହାର ଏବଂ ଚାଇନା ସାମଗ୍ରୀର ବ୍ୟବହାର କମ୍ କରିବା ଉପରେ ସାରା ଦେଶରେ ଏକ ଟ୍ରେଣ୍ଡ ଦେଖିବାକୁ ମିଳିଛି। ଚାଇନା ସାମଗ୍ରୀ ବର୍ଜନ କରିବା ଲାଗି ଦେଶ ମଧ୍ୟରେ ଏକ କ୍ୟାମ୍ପେନ ଗତ ୮ ମାସ ହେବ ଜାରି ରହିଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭୋକାଲ ଫର ଲୋକାଲ ଉପରେ ଧ୍ୟାନ ଦେବାକୁ ଦେଶବାସୀଙ୍କୁ କହିଥିଲେ। କନଫେଡେରେଶନ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (ସିଏଆଇଟି) ନେତୃତ୍ୱରେ ସାରା ଦେଶର ବ୍ୟବସାୟୀମାନେ ଆତ୍ମ ନିର୍ଭର ଭାରତକୁ ମଜବୁତ କରିବା ଦିଗରେ ଯୋଗଦାନ ଦେଇଥିବା ଜଣାପଡିଛି। ଚଳିତ ବର୍ଷ ଦୀପାବଳିରେ ସାରା ଦେଶରେ କାରବାର ଉନ୍ନତ ରହିଛି।
ସିଏଆଇଟି ରାଷ୍ଟ୍ରୀୟ ଅଧ୍ୟକ୍ଷ ବି.ସି. ଭାରତୀୟା କହିଛନ୍ତି ଯେ, ସାରା ଦେଶରେ ଦିଓ୍ବାଲିରେ ପ୍ରାୟ ୭୨ ହଜାର କୋଟି ଟଙ୍କାର କାରବାର ହୋଇଛି। ଚାଇନାକୁ ପ୍ରାୟ ୪୦ ହଜାର କୋଟି ଟଙ୍କାର ବ୍ୟବସାୟ ଘାଟା ସହିବାକୁ ପଡିଛି। ସରକାରୀ ନୀତି ଠିକ୍ ନ ହେବା ଯୋଗୁ ବାଣ ପ୍ରସ୍ତୁତକାରୀ ଏବଂ କ୍ଷୁଦ୍ର ବ୍ୟବସାୟୀଙ୍କୁ ପ୍ରାୟ ୧୦ ହଜାର କୋଟି ଟଙ୍କାରୁ ଉର୍ଦ୍ଧ୍ୱ କ୍ଷତି ସହିବାକୁ ପଡିଛି। ସେନ୍ସେକ୍ସ ମୁହୂର୍ତ୍ତ ଟ୍ରେଡିଂରେ ମଧ୍ୟ ଭଲ କାରବାର ହୋଇଛି। କରୋନା ଲକଡାଉନ ହେବା ସତ୍ତ୍ୱେ ମଧ୍ୟ କାରବାର ୧୦% ଉଚ୍ଚରେ ରହିଛି। ଚାଇନା ସାମଗ୍ରୀ ବର୍ଜନ ଅନ୍ତର୍ଗତ ଚଳିତ ବର୍ଷ ଦେଶବାସୀ ସେହି ଦେଶକୁ ୪୦ ହଜାର କୋଟି ଟଙ୍କାର ଝଟକା ଦେଇଛନ୍ତି।
ସୂଚନା ଯୋଗ୍ୟ, ଆଗାମୀ ୨୦୨୧ ଯାଏ ପ୍ରାୟ ଲକ୍ଷେ କୋଟି ଟଙ୍କାର ଚାଇନା ସାମଗ୍ରୀ ଆମଦାନୀକୁ କମ କରିବା ସହ ବିକ୍ରି ନ କରିବା ଲାଗି ସାରା ଦେଶର ବ୍ୟବସାୟୀ ଅଡି ବସିଛନ୍ତି। ଚାଇନା ସାମଗ୍ରୀ ବିକ୍ରିକୁ କମ୍ କରିବା ଲାଗି ଚଳିତ ବର୍ଷ ବ୍ୟବସାୟୀ ବେଶ ଯତ୍ନବାନ ହୋଇଛନ୍ତି। ଘରୋଇ ବଜାରରେ ପ୍ରସ୍ତୁତ ସାମଗ୍ରୀ ବିକ୍ରିକୁ ଉତ୍ସାହିତ କରିବା ଲାଗି ଏହା ସହାୟ ହେଉଥିବା ଭାରତୀୟା କହିଛନ୍ତି।
