ଝରିଗାଁ, ୪ା୭(ସ୍ବ.ପ୍ର.): ଦୁର୍ଗମ ଅଞ୍ଚଳର ବିକାଶ ତଥା ପକ୍କାରାସ୍ତା ନିର୍ମାଣ ପାଇଁ ରାଜ୍ୟ ସରକାରଙ୍କ ଉପାନ୍ତ ଯୋଜନା ରହିଛି। ନବରଙ୍ଗପୁର ଜିଲା ଝରିଗାଁ ବ୍ଲକର ବହୁ ଦୁର୍ଗମ ଇଲାକାକୁ ଏମ୍ପି ରମେଶ ଚନ୍ଦ୍ର ମାଝିଙ୍କ ପ୍ରଚେଷ୍ଟାରେ ରାସ୍ତା ହୋଇଛି। କିନ୍ତୁ ଡିଆର୍ଡିଏ ବିଭାଗର ତଦାରଖ ଅଭାବ ଯୋଗୁ ଉଦ୍ଘାଟନର ୭ ମାସ ପରେ କଂକ୍ରିଟ୍ ରାସ୍ତା ଫାଟି ଆଁ ହୋଇଛି। ଏଥିସହ ଚଳିତ ବର୍ଷାରେ ବହୁ ସ୍ଥାନରେ କଂକ୍ରିଟ୍ ରାସ୍ତା ତଳୁ ମାଟି ଖସିଯାଇଛି। ଫଳରେ ସେହି ରାସ୍ତାରେ କୌଣସି ଭାରିଯାନ ଧରି ଯାତାୟାତ କରିବା ବିପଦସଙ୍କୁଳ ବୋଲି ଗ୍ରାମବାସୀ କହିଛନ୍ତି। ସେହିପରି ନବନିର୍ମିତ ସେତୁର ଚାରି ପାର୍ଶ୍ୱରେ ଖାଲ ରହିଛି। ଏହା କେବିଡିରୁ କରାଡଙ୍ଗରୀ ରାସ୍ତାର ଦୃଶ୍ୟ।
୨୦୧୯ରେ ରାଜ୍ୟ ସରକାରଙ୍କ ଉପାନ୍ତ ଯୋଜନାରେ କେବିଡି-କରାଡଙ୍ଗରୀ ରାସ୍ତା ନିର୍ମାଣ କରାଯିବା ସକାଶେ ୧କୋଟି ୫୫ ଲକ୍ଷ ୬୯ ହଜାର ୪୮୬ଟଙ୍କା ଚୁକ୍ତିନାମା ମୂଲ୍ୟ ରହିଛି। ଏହି ରାସ୍ତା ହେବା ଦ୍ୱାରା ଚିକିଲି, କର୍ଲାମାଲ, କରାଡଙ୍ଗରୀ, କେବିଡି, ଧୁମାମ୍, ଗୋଇଚଚରା ଆଦି ଗ୍ରାମର ଲୋକେ ଉପକୃତ ହୋଇପାରିଛନ୍ତି। ସେହି ରାସ୍ତାରେ ରହିଥିବା ବଞ୍ଜାରି ନଦୀରେ ଏକ ସେତୁ ନିର୍ମାଣ କରାଯାଇଛି। ସେତୁର ୪୩.୭୧ ମିଟର ଲମ୍ବ ଏବଂ ୭.୫୦ ମିଟର ପ୍ରସ୍ଥ ରହିଛି। ଏହାର ବ୍ୟୟ ଅଟକଳ ୧କୋଟି ୭୯ ଲକ୍ଷ ୫୯ହଜାର ୭୩୧ ଟଙ୍କା। ଉପାନ୍ତ ଯୋଜନାରେ ହୋଇଥିବା ଉକ୍ତ ସେତୁଟି ଏମ୍ପି ରମେଶ ଚନ୍ଦ୍ର ମାଝି ଏବଂ ଝରିଗାଁ ବିଧାୟକ ପ୍ରକାଶ ଚନ୍ଦ୍ର ମାଝିଙ୍କ ଦ୍ୱାରା ଚଳିତ ବର୍ଷ ଜାନୁୟାରୀ ୪ ତାରିଖରେ ଉଦ୍ଘାଟନ କରାଯାଇଥିଲା। ହେଲେ ଏହାର ୭ ମାସ ପରେ ସେତୁଟିର ଚତୁଃପାର୍ଶ୍ୱରେ ମାଟି ଖସି ଖାଲ ସୃଷ୍ଟି ହୋଇଛି। ଫଳରେ ସେହି ରାସ୍ତାରେ ଯାତାୟାତ କରୁଥିବା ଲୋକେ ଦୁର୍ଘଟଣାକୁ ଆପଣାଇବା ଛଡ଼ା ଆଉ କିଛି ଉପାୟ ନାହିଁ ବୋଲି ନିଜ ମତ ରଖିଛନ୍ତି। ଏ ନେଇ ବିଭାଗୀୟ ନିର୍ବାହୀ ଯନ୍ତ୍ରୀ ଅନ୍ତୁନି କିଷାନଙ୍କୁ ପଚାରିବାରୁ, ଘଟଣା ସମ୍ପର୍କରେ ଅବଗତ ହେଲି, ସମସ୍ୟାକୁ ନେଟ୍ କରୁଛି। ତୁରନ୍ତ କିପରି ଏହାର ସମାଧାନ ହୋଇପାରିବ ସେ ଦିଗରେ ଦୃଷ୍ଟି ଦେବୁ ବୋଲି ସେ କହିଛନ୍ତି।
