ଭୁବନେଶ୍ୱର,୩୦।୬(ବ୍ୟୁରୋ):କମିଶନରେଟ୍ ପୋଲିସ ଏକ ବଡ଼ ଆନ୍ତଃରାଜ୍ୟ ସାଇବର ଠକ ଗ୍ୟାଙ୍ଗର ରହସ୍ୟ ଉନ୍ମୋଚନ କରିଛି ା ସାଇବର ଠକେଇ ଲିଙ୍କ୍ ଖୋଜୁ ଖୋଜୁ ମିଳିଛି ବଡ଼ ଧରଣର ଟେଲିକମ୍ ସ୍କାମ୍। କେତେକ ସର୍ଭିସ ପ୍ରୋଭାଇଡର ବେଆଇନ ଭାବେ ସିମ୍ ଆକ୍ଟିଭେଟ କରି କିପରି ସାଇବର ଠକଙ୍କୁ ସିମ୍ ଯୋଗାଉଥିଲେ ତାହା ଧରାପଡ଼ିଛି। ସ୍ପେଶାଲ ସ୍କ୍ବାର୍ଡ ଓ ଶହୀଦନଗର ଥାନା ପୋଲିସ ମିଳିତ ଚଢ଼ାଉ କରି ୭ଜଣଙ୍କୁ ଗିରଫ କରିବା ସହ ସେମାନଙ୍କଠାରୁ ୧୬ ହଜାରରୁ ଅଧିକ ଡୁପ୍ଲିକେଟ୍ ସିମ୍କାର୍ଡ ଓ ୧୫୦ରୁ ଊର୍ଦ୍ଧ୍ୱ ଚୋରା ମୋବାଇଲ ଫୋନ୍ ଜବତ କରିଛି। ଗିରଫ ଅଭିଯୁକ୍ତ ହେଲେ ଭଦ୍ରକର ମହେଶ୍ବର ବାରିକ, ରଜନୀକାନ୍ତ ପାଣିଗ୍ରାହୀ, ଶ୍ରୀନିବାସ ଘଡ଼େଇ, ରାଜେଶ କୁମାର ସେଠୀ, କେନ୍ଦୁଝରରୁ ସୁବ୍ରତ କୁମାର ପାଣିଗ୍ରାହୀ ଓ ସୁକାନ୍ତ କୁମାର ଦାସ ଏବଂ ବାଲେଶ୍ବରରୁ ମଙ୍ଗଳମୟ ମିଶ୍ର। ଗିରଫ ଅଭିଯୁକ୍ତଙ୍କୁ ମଙ୍ଗଳବାର କୋର୍ଟ ଚାଲାଣ କରାଯାଇଛି।
ବାଙ୍କୁଆଳର ଜଣେ ମହିଳା ପ୍ରାୟ ୫ ଲକ୍ଷ ଟଙ୍କା ସାଇବର ଠକେଇର ଶିକାର ହୋଇଥିଲେ। ଉକ୍ତ ମହିଳାଙ୍କୁ ଅଭିଯୁକ୍ତମାନେ ସିମ୍ ଅଚଳ ହେବା ନେଇ ଫୋନ କରିଥିଲେ। ପରେ ସେମାନେ ପଠାଇଥିବା ଲିଙ୍କ୍ରେ କ୍ଲିକ୍ କଲେ ସିମ୍ ବନ୍ଦ ହେବ ନାହିଁ ବୋଲି କହିଥିଲେ। ମହିଳା ଜଣଙ୍କ ଉକ୍ତ ଲିଙ୍କ୍ରେ କ୍ଲିକ୍ କରିବା ପରେ ପ୍ରଥମେ ୨ଲକ୍ଷ ୭୮ହଜାର ଓ ପରେ ଆଉ ୨ ଲକ୍ଷ କଟିଯାଇଥିଲା। ମହିଳାଙ୍କ ଅଭିଯୋଗ କ୍ରମେ ଏନେଇ ଶହୀଦ ନଗର ଥାନାରେ ଏକ ମାମଲା(ନଂ. ୨୫୮/୨୧) ରୁଜୁ କରାଯାଇ ତଦନ୍ତ ଆରମ୍ଭ ହୋଇଥିଲା। ଡିସିପି ଉମାକାନ୍ତ ଦାଶଙ୍କ ନେତୃତ୍ୱରେ ସ୍ପେଶାଲ ସ୍କ୍ବାଡ୍ ଓ ଶହୀଦନଗର ଥାନା ପୋଲିସର ଏକ ଟିମ୍ ତଦନ୍ତ ଆରମ୍ଭ କରିଥିଲେ। କଲ୍ ଆସିଥିବା ନମ୍ବରର ମୋବାଇଲ ଇଏମ୍ଆଇ ନମ୍ବର ଟ୍ରାକ୍ କରିବାପରେ ୭୫ରୁ ଊଦ୍ଧର୍ବ ନମ୍ବର ବ୍ୟବହାର ହୋଇଥିବା ସାଇବର ହେଲ୍ପ ଡେସ୍କ ଜାଣିବାକୁ ପାଇଥିଲା। ତେବେ ଏଥିରେ ଏକାଧିକ ନମ୍ବର ଓଡ଼ିିଶାର ସିମ୍ ଥିବା ଜଣାପଡ଼ିଥିଲା। ଏହି ଓଡ଼ିଶା ନମ୍ବର କେଉଁଠୁ ଆକ୍ଟିଭେଶନ ହୋଇଛି ଓ କାହା ନାଁରେ ରହିଛି ଏସମ୍ପର୍କରେ ତଦନ୍ତ ସମୟରେ ଭଦ୍ରକ ଏକ ରିଟେଲର ପଏଣ୍ଟର ସୂଚନା ମିଳିଥିଲା। ପରେ ସେଠାରୁ ଏହି ରିଟେଲରର ଡିଷ୍ଟ୍ରିବ୍ୟୁଟରଙ୍କ ସମ୍ପର୍କରେ ଜଣାପଡ଼ିବା ସହ କିଛି ନିର୍ଦ୍ଦିଷ୍ଟ ଟେଲିକମ କମ୍ପାନୀର କର୍ମଚାରୀ ସମ୍ପୃକ୍ତ ରହି ସେମାନଙ୍କ ସେଲ୍ସ ଟାର୍ଗେଟକୁ ପୂରଣ କରିବା ପାଇଁ ଏପରି ସିମ୍ ଆକ୍ଟିଭେଶନ କରୁଥିବା ଜଣାପଡ଼ିଥିଲା। ଏପରିକି ସାଧାରଣ ଲୋକେ ଯେଉଁଠି ଡକ୍ୟୁମେଣ୍ଟ ଦେଉଥିଲେ ସେଠାରୁ ଡକ୍ୟୁମେଣ୍ଟ ଏହି ଗ୍ୟାଙ୍ଗ ସଂଗ୍ରହ କରୁଥିଲେ। ପରେ ଆଉ କାହାର ଫଟୋ ଲଗାଇ ଡକ୍ୟୁମେଣ୍ଟ ନକଲ କରି ବେନାମି ସିମ୍ ଆକ୍ଟିଭ୍ କରିବା ସହ ଟେଲିକମ୍ ସ୍କାମ୍ କରୁଥିବା ଜଣାପଡ଼ିଥିଲା। ଯାହାକି ଟେଲିକମ୍ ରେଗୁଲେଟୋରି ଅଥରିଟି ଅଫ ଇଣ୍ଡିଆର ନିୟମକୁ ଉଲ୍ଲଂଘନ କରି ସିମ୍ ଆକ୍ଟିଭେଟ କରାଯାଉଥିଲା। ସେହି ସିମ୍କାର୍ଡ଼କୁ ଅନେକ ସାଇବର ଠକଙ୍କୁ କୋରିଅର କରାଯାଉଥିବା ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ କହିଛନ୍ତି। ତେବେ ଏସବୁ ସିମ୍ ପଞ୍ଜାବ, ହରିୟାଣା, ୟୁପି, ଦିଲ୍ଲୀ, ପାକିସ୍ତାନ ଓ ଭାରତର ବର୍ଡ଼ରରେ ଥିବା ଜାଲିଆନାଓ୍ବାଲାବାଗ ଭଳି ଅଞ୍ଚଳକୁ ପଠାଯାଉଥିବା ଜଣାପଡ଼ିଛି। ସେଠାରୁ ସାଇବର ଠକ ଅନେକ ଉପାୟରେ ବିଭିନ୍ନ ରାଜ୍ୟ ତଥା ଓଡ଼ିଶାର ଲୋକଙ୍କୁ ଫୋନ କରି ଓଡ଼ିଶାର ନମ୍ବର କହି ବିଶ୍ବାସ ଜନ୍ମାଇ ଏପରି ଠକେଇର ଜାଲ ବିଛାଉଥିଲେ। ୭ ସାଇବର ଠକ ଗିରଫ ହେବା ପରେ ସେମାନଙ୍କ ନେଟଓ୍ବର୍କର ବଳ କମିବ ବୋଲି କହିଛନ୍ତି ପ୍ରିୟଦର୍ଶୀ। ଅପରପକ୍ଷରେ ଏହା ଜାତୀୟ ନିରାପତ୍ତା ପାଇଁ ବଡ଼ ବିପଦ ବୋଲି ଡିସିପି ଦାଶ କହିଛନ୍ତି। ଗିରଫ ଅଭିଯୁକ୍ତମାନେ ୨୦ରୁ ୫୦ ଟଙ୍କା ମୂଲ୍ୟରେ ଆକ୍ଟିଭେଟ ସିମ୍କୁ ରାଜ୍ୟ ବାହାରେ ଥିବା ସାଇବର ଅପରାଧୀଙ୍କୁ ବିକ୍ରି କରୁଥିଲେ। ପ୍ରାୟ ୨ ଲକ୍ଷରୁ ଊର୍ଦ୍ଧ୍ୱ ଆକ୍ଟିଭେଟ ସିମ୍ ଏମାନେ ଏପରି ରାଜ୍ୟ ବାହାରକୁ ବିକ୍ରି କରିଥିବା ତଦନ୍ତରୁ ଜଣାପଡ଼ିଛି ବୋଲି ଦାଶ କହିଛନ୍ତି।