ନୂଆଦିଲ୍ଲୀ,୬।୧: ଦେଶରେ କରୋନା ଟିକା ସାର୍ବଜନୀକ ଭାବେ ଦିଆଯିବା ନେଇ ସରକାରଙ୍କ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। ଦେଶରେ କୋଭିଶିଲ୍ଡ ଏବଂ କୋଭାକ୍ସିନ୍ ଟିକାଦାନ ପାଇଁ ମଞ୍ଜୁରୀ ମିଳିଥିବାବେଳେ ଜାନୁୟାରୀ ୧୩ରୁ ଟିକାକରଣ ଲାଗି ଯୋଜନା ପ୍ରସ୍ତୁତ କରାଯାଇଛି। ତେବେ ୬୯ ପ୍ରତିଶତ ଭାରତୀୟଙ୍କ ମନରେ କରୋନା ଟିକା ପ୍ରତି ସନ୍ଦେହ ରହିଛି। ଲୋକାଲ ସର୍କଲ ସର୍ଭେ ପକ୍ଷରୁ ହୋଇଥିବା ଏକ ଅଧ୍ୟୟନରେ ଏସମ୍ପର୍କରେ ଉଲ୍ଲେଖ କରାଯାଇଛି। ଡିସେମ୍ବରରେ ହୋଇଥିବା ସର୍ଭେରୁ ଏହା ଜଣାପଡ଼ିଥିବା ସଂସ୍ଥା ପକ୍ଷରୁ ଡ. ଅବଦୁଲ୍ ଗଫୁର ସୂଚନା ଦେଇଛନ୍ତି। ୫୫ ପ୍ରତିଶତ ସ୍ବାସ୍ଥ୍ୟକର୍ମୀ ମଧ୍ୟ ଟିକା ନେବାକୁ ନେଇ ଆଶା ଆଶଙ୍କାରେ ରହିଛନ୍ତି। ମୁଖ୍ୟତଃ ଟିକାର ପାର୍ଶ୍ୱ ପ୍ରତିକ୍ରିୟା ନେଇ ଲୋକଙ୍କ ମଧ୍ୟରେ ଶଙ୍କା ରହିଥିବା ରିପୋର୍ଟରେ କୁହାଯାଇଛି। ୨୬ ପ୍ରତିଶତ ଲୋକ ଟିକା ବଜାରକୁ ଆସିଲେ ନେବାକୁ କହିଛନ୍ତି। ସେହିପରି ୨୬ ପ୍ରତିଶତ ଅଭିଭାବକ ସେମାନଙ୍କ ପିଲାଙ୍କୁ କରୋନା ଟିକା ଦେବାକୁ ଇଛା ପ୍ରକାଶ କରିଛନ୍ତି। ସର୍ଭେରେ ଦେଶର ୨୨୪ ଜିଲାର ୧୮ ହଜାରରୁ ଅଧିକ ଲୋକଙ୍କୁ ସାମିଲ୍ କରାଯାଇଥିଲା। ସେମାନଙ୍କ ମଧ୍ୟରେ ୬୯ ପ୍ରତିଶତ ପୁରୁଷ ଥିବାବେଳେ ୩୧ ପ୍ରତିଶତ ମହିଳା ରହିଥିଲେ। ୫୧ ପ୍ରତିଶତ ପ୍ରଥମ ଶ୍ରେଣୀ ସହର ବାସିନ୍ଦା ଏଥିରେ ସାମିଲ ହୋଇଥିବାବେଳେ ଦ୍ୱିତୀୟ ଶ୍ରେଣୀ ସହରର ୩୧ ପ୍ରତିଶତ ଲୋକଥିଲେ। ସର୍ଭେରେ ୧୮ ପ୍ରତିଶତ ତୃତୀୟ-ଚତୁର୍ଥ ଶ୍ରେଣୀ ସହର ଏବଂ ଗ୍ରାମାଞ୍ଚଳ ବାସିନ୍ଦା ଅଂଶଗ୍ରହଣ କରିଥିଲେ। ପିଲାଙ୍କୁ ଟିକା ଦିଆ ଯିବା ପାଇଁ ହୋଇଥିବା ସର୍ଭେରେ ୧୦ ହଜାରରୁ ଅଧିକ ଅଭିଭାବକଙ୍କ ମତାମତ ନିଆଯାଇଥିଲା।
