ଭୁବନେଶ୍ୱର, ୧୮ା୬ (ବନ୍ଦନା ସେଠୀ) ଓଡ଼ିଶାରେ ପ୍ରତିବର୍ଷ ସାପ କାମୁଡାଜନିତ ମୃତ୍ୟୁ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଓସ୍ଡମା ପରିସଂଖ୍ୟାନ ଅନୁଯାୟୀ, ୨୦୧୫ରୁ ୨୦୨୧ ମଧ୍ୟରେ ସାପ କାମୁଡ଼ାରେ ୬୩୫୧ ବ୍ୟକ୍ତିଙ୍କ ଜୀବନ ଯାଇଛି। ଗଞ୍ଜାମ ଜିଲାରୁ ସର୍ବାଧିକ ୩୦୭ ଜଣଙ୍କ ମୃତ୍ୟୁ ଘଟିଛି।୨୦୧୫ରେ ରାଜ୍ୟରେ ମୋଟ ୫୨୨ ସର୍ପାଘାତ ମୃତ୍ୟୁ ହୋଇଥିବାବେଳେ ୨୦୨୧ରେ ଏହା ଦୁଇଗୁଣ ଅଧିକ ଥିଲା ଅର୍ଥାତ୍ ୧୧୫୯ଜଣଙ୍କ ମୃତ୍ୟୁ ଘଟିଥିଲା। ସର୍ପାଘାତଜନିତ ୪ଲକ୍ଷ ଟଙ୍କା କ୍ଷତିପୂରଣ ପାଇଥିବା ଲୋକଙ୍କ ତାଲିକା ଅନୁଯାୟୀ ଏହି ସଂଖ୍ୟା ପ୍ରଦାନ କରାଯାଇଛି। ମାତ୍ର ସ୍ନେକ ହେଲ୍ପ ଲାଇନର ଅନୁଶୀଳନ ଅନୁଯାୟୀ, ପ୍ରକୃତ ମୃତ୍ୟୁସଂଖ୍ୟା ଏହାଠାରୁ ଢେର୍ ଅଧିକ। କାରଣ ଅନେକ ସାପ କାମୁଡା ମୃତ୍ୟୁକୁ ନେଇ ଅଭିଯୋଗ କିମ୍ବା ବ୍ୟବଚ୍ଛେଦ ହୋଇ ନ ଥିବାରୁ ତାହା ଚପି ଯାଉଛି। ତେବେ ସର୍ପାଘାତ ମୃତ୍ୟୁକୁ ରୋକିବା ବଡ଼ ଚ୍ୟାଲେଞ୍ଜ ହୋଇଥିବାବେଳେ ଏ କ୍ଷେତ୍ରରେ ସାପ ଧରାଳିଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ସେମାନେ ଜନବସତି ମଧ୍ୟରୁ ବିଷଧର ସାପଙ୍କୁ ଉଦ୍ଧାର କରି ଅନ୍ୟତ୍ର ସୁରକ୍ଷିତ ଭାବରେ ସ୍ଥାନାନ୍ତର କରୁ ନ ଥିଲେ ରାଜ୍ୟରେ ବାର୍ଷିକ ସାପ କାମୁଡା ମୃତ୍ୟୁ ସଂଖ୍ୟା ଆହୁରି ବୃଦ୍ଧି ପାଉଥାନ୍ତା ବୋଲି ମତ ପ୍ରକାଶ ପାଇଛି।
ଶନିବାର ସ୍ନେକ ହେଲ୍ପଲାଇନ୍ ପକ୍ଷରୁ ବୁଦ୍ଧ ମନ୍ଦିର ସମ୍ମିଳନୀ କକ୍ଷରେ ‘ସର୍ପାଘାତ ସୁରକ୍ଷା କର୍ମଶାଳା’ ଅନୁଷ୍ଠିତ ହୋଇଥିଲା। ଏମ୍ସ ଭୁବନେଶ୍ବରର ଫୋରେନ୍ସିକ ମେଡିସିନ୍ ଓ ଟକ୍ସିକୋଲୋଜି ବିଭାଗର ଅତିରିକ୍ତ ପ୍ରଫେସର ଡା. ସୁଦୀପ୍ତ ରଞ୍ଜନ ସିଂହ ଯୋଗଦେଇ, ସାପ ଦେହରୁ ମଣିଷକୁ ସଂକ୍ରମିତ ହେଉଥିବା ଜୁନୋଟିକ ରୋଗ ଏବଂ ଆଖିରେ ସାପ ବିଷ ପଡିଲେ ତାହାର ପ୍ରାଥମିକ ଚିକିତ୍ସା ବିଷୟରେ ବୁଝାଇଥିଲେ। ବିଏମ୍ସି ଡାକ୍ତରଖାନାର ମେଡିସିନ୍ ସ୍ପେଶାଲିଷ୍ଟ ଡା. ନିରଞ୍ଜନ ପାଢୀ ସାପ କାମୁଡାର ପ୍ରାଥମିକ ଚିକିତ୍ସା ସହିତ ଗୋଲ୍ଡେନ ଆୱାରj ଗୁରୁତ୍ୱ ସମ୍ପର୍କରେ କହିଥିଲେ। ମୁଖ୍ୟବକ୍ତା ଭାବେ କଟକ ଏସ୍ସିବି ମେଡିକାଲର ମେଡିସିନ୍ ବିଭାଗ ପ୍ରଫେସର ତଥା ବିଭାଗୀୟ ମୁଖ୍ୟ ଡା. ଜୟନ୍ତ କୁମାର ପଣ୍ଡା ସାପ କାମୁଡାର ଡାକ୍ତରୀ ଚିକିତ୍ସା, ଆଣ୍ଟିଭେନମ, ଆଇସିୟୁ ଓ ସାପ ଧରାଳିମାନେ ବିକଳାଙ୍ଗ ହେବାରୁ କିପରି ବଞ୍ଚତ୍ବେ ସେ ନେଇ ପରାମର୍ଶ ଦେଇଥିଲେ। ସ୍ବାସ୍ଥ୍ୟ ବିଭାଗର ନୋଡାଲ ଅଫିସର (ସ୍ନେକ୍ ବାଇଟ୍) ଡା. ସୁରଜିତ ଗରାବଡୁ ରାଜ୍ୟରେ ସାପ କାମୁଡା ଚିକିତ୍ସା ପାଇଁ ସରକାରୀସ୍ତରରେ ରହିଥିବା ମାଗଣା ବ୍ୟବସ୍ଥା ସମ୍ପର୍କରେ ସୂଚନା ଦେଇଥିଲେ। ସ୍ନେକ ହେଲ୍ପ ଲାଇନର ସାଧାରଣ ସମ୍ପାଦକ ତଥା ଖୋର୍ଦ୍ଧା ଜିଲାର ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ ଉପସ୍ଥିତ ରହି ସାପଧରାଳି ଏବଂ ସାପଙ୍କ ପାଇଁ ରହିଥିବା ସୁରକ୍ଷା ସମ୍ବନ୍ଧରେ ବର୍ଣ୍ଣନା କରିଥିଲେ। ସ୍ନେକ ହେଲ୍ପଲାଇନ୍ ସଭାପତି ଡା. ସୌର୍ଯ୍ୟ ରଞ୍ଜନ ପରିଜା କର୍ମଶାଳାରେ ବିଶେଷଜ୍ଞମାନେ ଦେଇଥିବା ପରାମର୍ଶ ଉପରେ ଗୁରୁତ୍ୱ ଦେବାକୁ କହିଥିଲେ। କର୍ମଶାଳାରେ ରାଜ୍ୟର ବିଭିନ୍ନ ପ୍ରାନ୍ତରୁ ୯୦ଜଣ ସାପ ଉଦ୍ଧାରକାରୀ ଯୋଗଦେଇଥିଲେ।
