ଭବାନୀପାଟଣା,୭।୧(ସ୍ବ.ପ୍ର.): ବର୍ତ୍ତମାନ ଚାଷୀଙ୍କୁ ଘାରିଛି ମଣ୍ଡି ସମସ୍ୟା। କେତେବେଳେ କଟନି ଛଟନି ତ କେତେବେଳେ ଟୋକନ ସମସ୍ୟା। ମଣ୍ଡିରେ ଚାଷୀଙ୍କୁ ଶୋଷଣ କରିବା ପାଇଁ ପ୍ରଶାସନ ଓ ମିଲର୍ସ କୋଣସି ସୁଯୋଗ ଛାଡୁ ନାହାନ୍ତି। ସରକାର ଧାନ କିଣା ପ୍ରକ୍ରିୟାରେ ସ୍ବଚ୍ଛତା ଆଣିବା ପାଇଁ ଅନେକ ନିୟମ କରୁଛନ୍ତି, କିନ୍ତୁ ନିୟମ ତା ବାଟରେ ଯାଉଛି ଓ ଦୁର୍ନୀତି ତା ବାଟରେ ହେଲେ ସରକାର ସବୁ ଜାଣି ଚୁପ। କଳାହାଣ୍ଡି ଜିଲାରେ ଧାନ କିଣା ପ୍ରକ୍ରିୟାରେ ମହାଦୁର୍ନୀତି ସାମାନାକୁ ଆସିଛି। ଏଫଏକ୍ୟୁ ମାନ ନ ଥିବା ଦର୍ଶାଇ ୫ରୁ ୭ କେଜି କଟନି ସହିତ ବସ୍ତା ବାବଦକୁ ୬୦ ଟଙ୍କା ଏହିଭଳି କୁଇଣ୍ଟାଲ ପିଛା ୧୬୦ ଟଙ୍କା କ୍ଷତି ସହୁଛି ଚାଷୀ। ଯଦି ଆମେ କଟନି ଛଟନିକୁ ଛାଡି ଦେବା ତାହା ହେଲେ ମଧ୍ୟ ବସ୍ତା ବାବଦକୁ କୁଇଣ୍ଟାଲ ପ୍ରତି ୬ ଟଙ୍କା କ୍ଷତି ସହୁଛି ଚାଷୀ। ସରକାରୀ ନିୟମ ଅନୁଯାୟୀ ଚାଷୀ ନିଜ ଧାନକୁ ମଣ୍ଡିରେ ନେଇ ଢାଳି ଦେଲେ ମିଲର୍ସ ନିଜ ବସ୍ତାରେ ଧାନ ଭରି ଉଠାଇବା ନିୟମ ରହିଛି। ସେଥିପାଇଁ ସରକାର ବସ୍ତା ବାବଦକୁ ମିଲର୍ସଙ୍କୁ ୧୫.୦୫ ଟଙ୍କା ଦେଉଛନ୍ତି। କିନ୍ତୁ ମିଲର୍ସ ଚାଷୀଙ୍କ ବସ୍ତାରେ ଧାନ ନେଉଛି ଓ ବସ୍ତା ଫେରାଉ ନ ଥିବାରୁ ଚାଷୀ ଖୋଲା ବଜାରରୁ ୩୦ ଟଙ୍କାରେ ବସ୍ତା କିଣିବା ପାଇଁ ବାଧ୍ୟ ହେଉଛି। କୁଇଣ୍ଟାଲ ପ୍ରତି ୬୦ଟଙ୍କା କ୍ଷତି ସହୁଥିବା ଚାଷୀ ଅଭିଯୋଗ କରିଛନ୍ତି। ସରକାର କଳାହାଣ୍ଡି ଜିଲାରେ ଚଳିତବର୍ଷ ଖରିଫ ଋତୁ ପାଇଁ ପ୍ରଥମ ପର୍ଯ୍ୟାୟରେ ପ୍ରାୟ ୫୦ ଲକ୍ଷ କୁଇଣ୍ଟାଲ ଧାନ କିଣିବା ପାଇଁ ଲକ୍ଷ୍ୟ ଧାର୍ଯ୍ୟ କରିଛନ୍ତି। ଓଡିଶା ଫୁଡ଼ ପୋଟାଲର ତଥ୍ୟ ଅନୁଯାୟୀ ଏ ପର୍ଯ୍ୟନ୍ତ ଜିଲାର ୫୯ ହଜାର ୭୨୩ଜଣ ଚାଷୀଙ୍କଠାରୁ ୨୯ଲକ୍ଷ ୫୬ ହଜାର ୧୬୮ କୁଇଣ୍ଟାଲ ଧାନ ସଂଗ୍ରହ କରାଗଲାଣି। ସେହି ଅନୁସାରେ କେବଳ ଯଦି ବସ୍ତା ବାବଦକୁ ହିସାବ କଳେ ୧୭ କୋଟି ୭୩ ଲକ୍ଷ ୩୭ ହଜାର ଟଙ୍କା ସିଧା ସଳଖ ମିଲର୍ସଙ୍କ ପକେଟକୁ ଗଲାଣି। ଏ ସମ୍ପର୍କରେ ଧର୍ମଗଡ଼ ଉପଜିଲାପାଳ ବେଦ ଭୂଷଣଙ୍କୁ ପଚାରିବାରେ ଚାଷୀଙ୍କୁ ବସ୍ତା ନ ହେଲେ ବସ୍ତା ବାବଦ ଟଙ୍କା ଫେରାଇବାକୁ ମିଲର୍ସମାନଙ୍କୁ କୁହାଯାଇଛି ବୋଲି କହିଥିଲେ।
